Read Pangasinan ZACARIAS 7 Bible Online

ZACARIAS 7 - Pangasinan bible

ZACARIAS 7

¹"Nen kumapat ya agew na kumasiam a bulan (say bulan a Kislev) na kumapat a taon na panooley nen Dario, sinmabid siak so salita na Katawan.

²"Saray taga Betel imbaki da ra di Sarezer tan Regemmelek tan saray totoo ran lalaki ya onla rad Timplo na Katawan a Makapanyarin-amin, ta onkerew ira na bindision na Katawan,

³"tan itepet da ed saray papari tan saray propita yan tepet: Ituloy tayo niy manermen lapud inkaderal na Timplo, diad panamegley na panayuno tayod kumaliman bulan a singa ginagawa tayo lad amayamay ya imbeneg a taon?

⁴"Sikato yay sinmabid siak a salita na Katawan,

⁵"Ibagam ed saray totood bansa tan saray papari ya ag da ak pinagalangan nen nanayuno tan nanermen ira nen kumalima tan kumapiton bulan legan na saraman a pitomplon taon.

⁶"Pinepenek day sikaran dili labat nen naniinom tan nanaakan ira.

⁷"Sikato yay imbaga na saray inmonan propita sanen maaligwas so Jerusalem tan sikatoy napno na saray totoo tan sanen amayamay iray totoo a manaayam ed saray baley a kaliber-liber na siudad tan diad bandad abalaten tan diad alusadsar na kapokdulan ed bandad sagur.

⁸"Say Katawan kuantod kinen Zacarias,

⁹"Nen saman saya so salitak ed saray totook: Nepeg yon gawaen so inkatonung, tan mankakasiyan tan manaarowan so sakey tan sakey ed sikayo.

¹⁰Ag yo papairapen iray balo, saray olila, saray sangkailin manaayam ed dalin yo, odino siopaman a walad pankaukolan. Tan ag kayo mannununot a manggaway maoges ed siopaman.

¹¹Balet anawet so olo da ray totook; ag ira dinmengel. Kinaputan day isip da.

¹²Pinaawet dan singa bato so kapusoan da. Mapalaloy impakapasnuk ko lapud ag ira dinmengel ed saray ganggan kon impaibangat kod saray propitan nambibilay nen saman a panaon.

¹³Lapud ag ira dinmengel nen nansalita ak, ag ko ra inebatan nen nampikasi ra.

¹⁴Singa ak bagyon angibantak ed sikara ed saray arum a bansa a diman ira nanayam. Nagmaliw ya ataynan yan marakep a dalin, anggapoy anggan sakey ya atilak a toon manaayam.