Read Pangasinan ZACARIAS 9 Bible Online

ZACARIAS 9 - Pangasinan bible

ZACARIAS 9

¹"Sikato yay salitan papaibaga na Katawan: Inggetar to lan nadusa so dalin na Hadrac tan say siudad na Damasco. Aliwa labat a saray tribu na Israel so kayaryan na Katawan, no ag ingen pati say manonan baley na Siria.

²"Kayaryan met na Katawan so Hamat a miketeg ed Hadrac, saray siudad na Tiro tan Sidon pati saray karunongan da.

³"Amaalagey so Tiro na tirinsira to tan nantitipon na amayamay a pilak tan balituk a singa ra karakel na dabuk!

⁴"Balet alaen na Katawan iray amin a bengatlan kayaryan to. Ibantak tod dayat iray kayamanan na Tiro tan temeken tod apoy.

⁵"Nanengneng ya na siudad na Ascalon, et nataktakot. Nanengneng met ya na siudad na Gaza, et manlikna na ontan lan sulit. Ontan met na Ekron, et nataktakot tan naandian na ilalo. Nabalang na Gaza so ari to tan nataynan so Ascalon.

⁶"Panayaman na totoon nandoroma so kolor na baog da so Asdod. Say Katawan kuanto, Ipaabebak ira yan mapaatagey a Filistio.

⁷"Ag la mangan na karnin kadadala, odino say kakanen a sebel onung ed ganggan. Amin da ray makapaliis ed patey et magmaliw iran kabyangan na totook tan singa ra sakey a boleg ed tribu na Juda. Magmaliw a kabyangan na saray totook iray taga Ekron a singa impagmaliw met na saray Jebuseo.

⁸"Guardiaan koy dalin ko tan ag ko padalanen ed dalin ko iray sondalo. Ag ko la abuloyan a pairapen na saray maruksan totoo iray totook. Anengneng ko so ontan lan impanirap na saray totook.

⁹"Manliket kayo na baleg, sikayon totood Sion! Eyag kayod liket, sikayon totood Jerusalem! Nengneng yo, onsasabid sikayo so ari yo! Onsasabin analo tan sipapalabo, balet mapaabeba tan akakabayod sakey a kilaw na asno

¹⁰Say Katawan kuanto, Ekalen kod Israel iray karwahin para bakal; ekalen kod Jerusalem iray kabayon para bakal; naderal iray panan inkakanad bakal. Say ari yo et mikaaro ed saray arum a bansa; manoley a manlapud sakey a dayat ya anggad sananey a dayat, manlapud Ilog na Eufrates ya anggad saray samput na dalin.

¹¹Say Katawan kuanto, Lapud impisipanan kod sika samay sipanan a pinaletan na dala da ray bagat, ibolus ko ray totoom naagwat irad anggapoy danum a bobun na inkibantak ed arum a bansa.

¹²Pawil kayo la, sikayon nibantak ed arum a bansa a natan wala lay ilalo yo; pawil kayod pasen yon arawid kaatapan. Ibabagak ed sikayo natan a say bindision ya iter kod sikayo et mamidwad karakel na saramay kairapan a nilikna yo.

¹³Ikanak so Juda a singa bekang a panay sondalo tan say Israel a singa pana. Ikanak a singa ispada iray totoo ed Sion, diad pibakal ed saray totood Grecia.

¹⁴Say Katawan ompanengneng ed tagey da ray totoo to; ibolus ton singa kirmat iray pana to. Say Katawan a Dios paknulen toy trumpita; manlapud abalaten manakar ed saray bagyo.

¹⁵Say Katawan a Makapanyarin-amin et iyagel to ray totoo to, tan deralen da ray kalaban da. Diad bakal oneyag iran singa abuek a totoo, tan paterteren day dala ray kalaban da; onagos so dala a singa say dala na bagat a walad yaung ya inibung ed altar.

¹⁶No onsabi tan ya agew, say Katawan iyagel to ray totoo to, a singa say pumapastul iyaagel tod kaatapan iray karniro to. Onkidyam irad dalin to a singa ikikidyam na saray alahas ed koronay ari.

¹⁷Agay lay abig tan dakep so pagmaliwan na dalin! Pabiskegen na trigo tan alak ya iter to iray tobun-balo.