Read Pangasinan MALAKIAS 3 Bible Online

MALAKIAS 3 - Pangasinan bible

MALAKIAS 3

¹"Say Katawan a Makapanyarin-amin onebat, Paonlaen koy ibabakik a mangiparaan na dalanen ko. Insan say Katawan ya anapen yo et biglan onsabi ed Timplo to. Onsabi so ibabaki a pampilpilalekan yon nanengneng tan ibawag toy sipanan ko.

²"Balet siopay makapangitepel na agew na isabi to? Siopay nabilay no sikatoy ompanengneng? Sikatoy singa mabayanin sabon, singa apoy a manlinis ed mital.

³"Sikatoy onsabi a manintinsia a singa toon mamasileng tan malinis ed pilak. No panoy pamapasileng na platiro ed pilak tan balituk, ontan met so panlilinis na Katawan ed saray papari, pian mangyakar irad Katawan na manepeg iran bagat.

⁴"Diad ontan magmaliw a makapaliket ed Katawan iray bagat ya iyakar ed sikato na saray totood Juda tan Jerusalem, a singa gendat a ginagawa da la nen saman.

⁵"Say Katawan a Makapanyarin-amin kuanto, Onsabi ak a manintinsia ed sikayo, tan mantasi ak a tampol sumpad saray managsalamangkiro, saray managlawan, saray mantatasi na tila-tila ed korti, saray manasaol na suildo da ray kumikimey, tan saray mamapasegsegang ed saray balon bibii, saray olila, tan saray sangkailiamin da ray mangigagalang ed siak.

⁶"Siak so Katawan, ag ak mangoman. Kanyan sikayo ran kabyangay boleg nen Jacob et ag kayo ni sigput a naoput.

⁷"Singa saray lalaki yo nen saman, impolisay yo ray ganggan ko tan ag yo ra inonur. Pawil kayod siak, et ompawil ak ed sikayo. Balet tetepeten yo, Antoy gawaen mi, pian makapawil kamid sika?

⁸"Tetepetan ta kayo, maung kasin takewan na too so Dios? Andi-duaruwa ya aliwan maung, balet tatakewan yo ak. Panon mi kan tatakewan? tepet yo. Diad saray kakaplo tan diad saray bagat.

⁹"Nisasamba kayon amin, lapud tatakewan ak na intiron bansa.

¹⁰Iyakar yod Timplo iray amin a kakaplo yo, pian walay daakan a pantaganod man. Subok yo ak, et nanengneng yon lokasan koy puirtay tawen tan ikalbok ed sikayo so daakan a bindision.

¹¹Ag ko abuloyan a deralen na saray bigis iray tanaman yo, et diad ontan mambunga na amayamay iray sengeg na ubas yo.

¹²Insan saray totoo ed amin a bansa tawagen da kayo a maliket, lapud magmaliw a marakep a panayaman so dalin yo.

¹³Anagasang iray sinasalita yo a nipaakar ed siak, kuay Katawan. Balet tetepeten yo, Antoy imbaga mi nipaakar ed sika?

¹⁴Inkuanyo, Andi-kakanaan so manlingkur ed Dios. Antoy kana na panumpal na saray salita to odino say pangipanengneng tayod Katawan a Makapanyarin-amin a sikatayoy maermen lapud saray ginagawa tayo?

¹⁵Onung na nanenengneng tayo, saray mapaatagey a totoo so maliket. Ag labat onaaligwas iray totoon maoges, no ag ingen panusubok dad anos na Dios iray maoges a gagawaen da tan napapaliisan da.

¹⁶Insan nantotongtong iray totoon walay takot dad Katawan. Dinmengel so Katawan ed sikara, et nadngel toy imbabaga ra. Diad arap to nisulat so sakey a libro a nipaakar ed saray tinmakot ed Katawan tan angigagalang ed sikato.

¹⁷Sikaray magmaliw a totook, kuay Katawan a Makapanyarin-amin. Diad agew a siak so onggalaw, sikaray magmaliw a petepeteg kon kayaryan. Kasian ko ra a singa pangakasi na ama ed anak ton laki a manlilingkur ed sikato.

¹⁸Maminsan ni nanengneng na saray totook so pandomaan na nagawad saray matonung tan saray maoges a totoo, say pandomaan na pansumpalan da ray totoon manlilingkur ed siak tan diad saray ag manlilingkur ed siak.