Read Pangasinan Say Ononan Libro na SARAY MACABEO 1 Bible Online

Say Ononan Libro na SARAY MACABEO 1 - Pangasinan bible

Say Ononan Libro na SARAY MACABEO 1

¹"Ginmapo ra yan agawgawa nen si Alejandro a Matalonggaring, say lakin anak nen Felipe a taga Macedonia, et nampikal ed Macedonia tan dinmogpa ed kinen Dario ya ari na Persia tan Madian. Pinaawang nen Alejandro so Impirio na Grecia nen tinalo toy Dario tan sinamsam toy trono to.

²"Amayamay so akibakalan to, dinakep to ray amayamay a siudad ya aliber na padir, tan pinatey to ray arari ed saray pasen a sinakop to.

³"Diad isosolung tod amin a sokung na mundo, sinasamsaman to ray amayamay a bansa; nen adakep toy intiron mundo, nagmaliw a mapaatagey tan mapasirayew.

⁴"Diad impangiletneg to na mabiskeg ya olup na sondalo, nipasilong tod pakayari to so intiron bansa tan saray manoley da, tan pinasoot to ran mambayar na buis ed sikato.

⁵"Nen kumalabinduay taon na panooley ton impirador, nansakit tan alikas ton ngalngali la ompatey. Impatawag to ray kaogawan ton pangulo na saray sondalo to, inapag toy impirio, tan initdan toy balang sakey ed sikara na betang to.

⁶

⁷

⁸"Kayari na impatey to, saramay pangulo so nanoley,

⁹"tan kapag sakey ed sikara et impakoronaan ya ari na dilin dalin to. Saray kabyangan na sarayan arari so nanoley na andokey a panaon tan baleg a kairapan so inter dad sankamundoan.

¹⁰Say maoges a manoley a si Antioco Epifanes, a lakin anak nen Ari Antioco a Kumatlo na Siria, et kabyangan na boleg na sakey ed saray pangulo na sondalo nen Alejandro. Si Antioco Epifanes et sakey ed saray niakar a priso ed Roma kasakbayan a nagmaliw ya ari na Siria nen taon 137.

¹¹Diad saman a panaon linmetaw ed dalin na Israel so sakey a grupo na saray Judion traidor ya ag da italtalek so Ganggan tan maoges so impapatnag dad amayamay a totoo tayo. Inkuanda, Mikaaro tayod saray Hintil, ta golo labat so bunga na ag tayo pililimug ed sikara.

¹²Agustoan na amayamay a totoo so sayan kanunotan,

¹³tan diad mapalalon pampilalek dan nagawa ya, linma rad ari tan akerew da so abuloy a mangalig ed saray kaogaliyan da ray Hintil.

¹⁴Angipaalagey irad Jerusalem na baleg a panaggalawan, a singa saray walad saray siudad na Grecia.

¹⁵Nampapaopira ra, pian niamut day inkasegat da, inkaindan day masanton sipanan, ginapwan day milimug ed saray Hintil, tan nanggagawa ray nandoroma nin arum a kaogsan.

¹⁶Nen malet lay inliletneg na panaari nen Antioco, ginetma ton dakepen so Egipto tan oleyan to man a bansa, pati say Siria.

¹⁷Dinogpaan toy Egipto na baleg ya olup na saray bapor tan saray makapanyarin sondalo a pati saray karwahi, saray ilipanti, tan saray akakabayon sondalo.

¹⁸Nen dinmogpa si Antioco, batik si Ari Tolomeo na Egipto, tan amayamay so inaatey a sondalo to.

¹⁹Adakep nen Antioco iray siudad na Egipto ya aliber na padir tan sinasamsaman to man ya intiron dalin.

²⁰Nen taon 143, kayariy impakadakep na Egipto, si Antioco sinmulong ya amaarap ed Israel tan diad siudad na Jerusalem a kaiba to ray amayamay a sondalo.

²¹Diad inkalangas to, nilooban toy Timplo tan inaala toy balituk ya altar, saray panangipatoonan na lamparaan a pati saray kagawaan to,

²²say lamisaan a panagtapewan na saray tinapay a nibagat ed Katawan, saray kupa tan saray yaung, saray balituk a pananginay ngalab, saray kurtina, tan saray korona. Inokwap ton amin iray balituk a walad arap na Timplo

²³tan imbatik to ray pilak tan balituk tan amin a bengatlan mabmabli, pati amin a kayamanan a nalmo ton akasinup diman.

²⁴Insan to ra inawit ya amin ed dilin bansa to. Pinapatey to met iray amayamay a totoo, insan to ni ipanpanta yan ginawa to.

²⁵Walay baleg ya ermen ed inerman a pasen ed dalin na Israel.

²⁶Mandageyem lapud ermen iray manoley tan saray pangulo. Kinmapoy iray tobun-balon lalaki tan bibii. Kinmupas so ganggana da ray bibiin anak tayo.

²⁷Amin a nubio nankanta na kantan para tolur, tan amin a nubia manyodyorung a maermen ed kuarto to.

²⁸Abalkut na kababaingan iray totoo tayo, tan yenmegyeg so dalin tayo lapud sikara.

²⁹Kalabas na duay taon si Antioco angibaki na amayamay a sondalon nanlapud Misia, ta dogpaan da ray baley ed Judea. Nen akaloob ed Jerusalem iray sondalo,

³⁰akisalitad saray totoo so pangulo ra. Imbaga ton kareenan so makasengeg na inyakar dad man, balet pinalikdo to ra. Biglan dinogpaan to na pinasya so siudad, tan amayamay a totooy pinapatey to.

³¹Sinasamsaman to so siudad, pinoolan to, tan inggegeba to ray paalagey tan saray padit.

³²Si Antioco tan amin da ray sondalo et inaala dan dinakep iray bibii tan saray ogogaw tan ineerel da ray ayayep.

³³Insan si Antioco tan saray sondalo to et angipaalagey ira na atatagey a padir tan saray mabibiskeg a tori diad nibaybay na Timplo, tan impagmaliw dan sakey a tirinsira.

³⁴Angyakar ira na olup na saray traidor a Judio tan impasen da rad man.

³⁵Angyakar met ira na saray armas tan saray abasto tan insinup dad tirinsira iray amin ya asamsam dad Jerusalem. Nagmaliw a makapataktakot yan tirinsira ed siudad.

³⁶Say tirinsira et tatakotan nen saman na Timplo, lawas sakey a maoges so iiter tod Israel.

³⁷Pinapatey ed kaliber-liber na altar iray totoon anggapoy kasalanan; dinotakan na saray managpatey na totoo so Masanton Pasen.

³⁸Tinmaynan ed takot iray totood Jerusalem, tan nagmaliw ya asakop na saray sangkaili so siudad. Sangkailid dilin totoo to so Jerusalem, saray totoo ton apasoot a kaindanan day siudad.

³⁹Say Timplo to et anggapoy kargan singa kalawakan; nagmaliw iran agew na panagermen iray pista to, nagmaliw a kababaingan so liket na Agew na Panagpainawa. Nagmaliw a balbalawen tan elek-elekan so kagalangan to.

⁴⁰Nagmaliw a singa kabaleg na kagalangan to nen saman so kababaingan to, tan nagmaliw a makapasinagem ya ermen so panagpaatagey to.

⁴¹Angipaakseb na ganggan si Antioco ya amin a bansan nasasakopan na impirio to et nepeg ya ikaindan day dilin ogali ra tan magmaliw iran sakey a totoo. Tinmoluk ya amin iray Hintil tan saray amayamay ya Israelita ed sayan ganggan. Akinonung la rad paganon rilihion, nambagat la rad saray talintaoy diriyos, tan ag da la ngingilininan so Agew na Panagpainawa.

⁴²

⁴³

⁴⁴Say ari angibaki met na saray totoon angipaamta ed Jerusalem tan amin da ray baley ed Judea na sakey a ganggan a saray totoo et tombuken da ray kaogaliyan na saray sangkailid bansa.

⁴⁵Ingganggan tod sikaran ag ira mangisasaklang na saray bagat a popoolan, saray bagat a trigo, odino saray bagat ya alak ed Timplo, tan ingganggan to met ya ag da ngingilinay Agew na Panagpainawa tan saray agew na pista.

⁴⁶Niganggan ni ingen ed sikara a dotakan day Timplo tan saray bengatlan masanto a wala rad dalem to.

⁴⁷Niganggan ed sikara a mangipaalagey iray paganon altar, saray timplo, tan saray santuario tan mangibagat irad man na saray baboy tan saray arum a marotak ya ayayep onung ed ganggan.

⁴⁸Nisebel ed sikara a segaten da ray lalakin anak da tan kinaukolan a gawaen day anggaay nayarian dan dotakan so sikaran dili onung ed ganggan,

⁴⁹pian nalingwanan day Ganggan ya inter na Katawan diad panamegley nen Moises tan nasumlang da ray amin a bilin.

⁵⁰Patey so dusa na ag itoluk ed sayan ganggan na ari.

⁵¹Say ari ag to labat impaakseb yan ganggan ed intiron impirio to, no ag ingen anoro met na saray opisyal a mambantay ed saray totoo. Ingganggan to met so balang baley ed Judea a mangisaklang na saray paganon bagat.

⁵²Amayamay iray Judion sipaparaan a mangilingwan ed Ganggan tan mangonur ed sarayan opisyal. Dinotakan day dalin lapud kaogsan da,

⁵³tan say kagagawa ra so makasengeg na inyaamut na amin da ray tuan Israelita diad iner man a pasen a naamutan da.

⁵⁴Diad kumalabinliman agew na bulan na Kislev nen taon 145, si Ari Antioco inlira to so Say Makapataktakot a Managderal diad tapew na altar na Timplo, tan nipaalagey iray paganon altar diad saray baley ed intiron Judea.

⁵⁵Nisaklang iray paganon bagat ed arap na saray abung tan diad saray dalan.

⁵⁶Amin da ray libro na Ganggan a nalmo et pinipilat tan pinopoolan,

⁵⁷tan pinatey diad panangiganggan na ari so siopaman ya akalmoan na kopia na masanton libro odino angonur na Ganggan.

⁵⁸Binulan a sarayan maoges a totoo et impakana ray pakayari ran sumpad saray Israelitan narel ed saray baley.

⁵⁹Diad kumaduamplo tan liman agew na bulan, sarayan maoges a totoo et angisaklang ira na saray bagat ed tapew na paganon altar a nipaalagey ed tapew na altar diad dalem na Timplo.

⁶⁰Saray inan inabuloyan dan asegat iray anak da et pinapatey ira, onung ed ganggan na ari.

⁶¹Insasabit ed beklew da iray anak dan mansususo, tan pinapatey met iray pamilya ra tan saray nansesegat ed sikara.

⁶²Balet amayamay iray Israelitan mapeget ya anumlang ed ganggan na ari tan ag da nilabay so angan na kakanen a marotak onung ed ganggan.

⁶³Kinaliktan da ni so ompatey nen say deralen da so masanton sipanan tan mangan ira na marotak a kakanen onung ed gangganamayamay a tuay inatey ed sikara.

⁶⁴Lapud pasnuk na Dios, mapalaloy impamapairap tod Israel.