Read Pangasinan Say Ononan Libro na SARAY MACABEO 10 Bible Online

Say Ononan Libro na SARAY MACABEO 10 - Pangasinan bible

Say Ononan Libro na SARAY MACABEO 10

¹"Nen taon 160, si Alejandro Epifanes a lakin anak nen Antioco a Kumapat, et linmoob ed Tolemaida tan adakep to. Maliket iray totood man ya angawat ed sikaton ari ra.

²"Nen nadngelan ya nen Ari Demetrio, anipon na amayamay a sondalo tan inmabet a mibakal ed kinen Alejandro.

³"Diad saman a panaon, si Demetrio angipawit na sulat na pikakaro ed kinen Jonatan balet amayamay so konkonwarin dayew ed samay sulat to,

⁴"ta labay ton makapigampid sikato si Jonatan tan makapikaarod saray Judio kasakbayan a si Alejandro et makapipaknaan ed sikara sumpad sikato.

⁵"Abaloan nen Demetrio a nanunotan nen Jonatan iray amin a makapoy a ginagawa tod sikato, saray agagi to, tan say intiron bansa na saray Judio.

⁶"Kanyan ginawa nen Demetrio a kagampi to si Jonatan tan initdan to na pakaoley a manipon na saray sondalo tan mangiter na armas ed sikara. Ingganggan to met a nipalimad kinen Jonatan iray akolung ed tirinsirad Jerusalem.

⁷"Kanyan linmad Jerusalem si Jonatan tan binasa to may sulat ed saray totoo tan saray lalakin walad tirinsira.

⁸"Mapalaloy inkataktakot na sarayan totoo nen akabatan da ya initdan na ari si Jonatan na pakaoley a manipon na saray sondalo.

⁹"Impawil dad kinen Jonatan ira may akolung, insan to ra impawil ed saray kaatengan da.

¹⁰Angipasen si Jonatan na ayaman tod Jerusalem tan ginapwan ton pasimbaloen ya ipaalagey so siudad.

¹¹Ingganggan to ray kantiro a saray kuadradon bato so ikana rad saray padir na siudad tan diad samben a padir ed kaliber-liber na Palandey na Sion. Onya so agawa.

¹²Tinaynan na saray sangkaili iray tirinsiran impaalagey nen Bakides;

¹³tinaynan na balang sakey ed sikara so akaipasenan to tan pinmawil la ed dilin bansa to.

¹⁴Balet atilak nin Bet-sur iray arum a Judion inkaindan day Ganggan nen Moises tan saray bilin to. Diman so samput a nansalimbengan da.

¹⁵Akabatan nen Ari Alejandro iray insipan nen Demetrio ed kinen Jonatan tan akabatan to met so nipaakar ed kinen Jonatan a dili, saray akilabanan ton bakal, saray mapuson ginagawa to, tan saray gunigon ya intetepel to, tan saray agagi to.

¹⁶Ag to nanduaruwaan ya anggapo lan balut so narumog ton toon singa si Jonatan, kanyan ginetma ton pikaaroan tan pigampian.

¹⁷Sinulat toy Jonatan na onya:

¹⁸Nanlapud Ari Alejandro yan sulat a para kaaro ton Jonatan. Awat mo pay maliket a pabanok.

¹⁹Nadngelan kon mapuso kan too, tan lapud ginagawam nalam so kanepegan a kaaro na ari.

²⁰Diad sayan agew toroen ta ka a Pangulon Pari na bansam tan niiter ed sikay ngaran a Kaaro na Ari. Nepeg a kagampi mi ka tan nepeg a tulongan mo kami. Impawitan to met na kawes na ari tan sakey a koronan balituk.

²¹Insolung nen Jonatan imay kawes na Pangulon Pari nen kumapiton bulan na taon 160, nen Pista na saray Abung-abung. Anipon na sondalo tan angisinup na amayamay ya armas.

²²Nen nadngelan nen Demetrio yan agawa, agunigon tan kuanto,

²³Panoy impakapaolyan tayon naonaan itayo nen Alejandro? Pinabiskeg toy kipapasen to diad impigampi tod saray Judio.

²⁴Sulaten ko met ira na marakerakep tan itdan ko ra na atagey a kipapasen tan saray rigalo, pian tulongan da ak.

²⁵Sayay sulat to: Nanlapud Ari Demetrio yan sulat a para saray Judio. Awat yo pay maliket a pabanok.

²⁶Maliket kamin akapikabat a totooren yo ray kanepegan yod samay paknaan tayo, mansiasiansia kayon matoor ed sikami, tan ag kayo migagampid saray kalaban mi.

²⁷No mansiansia kayon matoor ed sikami, tumangan ta kayo na baleg.

²⁸Ag mi kayo pambayaren na amayamay a buis tan itdan mi kayo ray arum a pankanepegan.

²⁹Diad panamegley na sayan sulat ibobolus kon amin iray Judio tan ag la ra mambayar na saray tinaon a buis, saray buis na asin, tan saray arum a nidoma-doman buis.

³⁰Sakey ni, manlapud sayan agew, ag ta kayo la pambayaren na kakatloy ani yo tan say kakadwa na bungay tanaman yo. Manlapud natan, ag ko la singilin ed sikayo ra yan buis na Judea tan saray taloran distrito a niarum ed Judea manlapud Samaria tan Galilea.

³¹Say Jerusalem tan saray kaliber-liber ton pasen et nepeg ya ibilang a masanton siudad tan nepeg ya ag mambayar na antokaman a buis.

³²Ekalen ko met so pakaoley ko ed tirinsirad Jerusalem tan ipalimak lad Pangulon Pari a nayarin mangipasen na siopaman a toon mangguardiad man.

³³Mabolus kon itdan na kawayangan iray amin a Judion adakep lapud bakal, inermay aprisoan da diad loob na nanarian ko. Amin da et ag la ra mambayar na buis, anggan say buis na saray ayayep da.

³⁴Ag nayarin alaen na buis so siopaman a Judio no Agew na Panagpainawa, Pista na Balon Bulan, tan arum ni ran masanton agew. Sakey ni, ag nayarin alaen so buis taloran agew kasakbayan odino kayari na saray manonan masanton agew.

³⁵Anggapoy toon walay kanepegan ton mangalay buis ed sarayan agew odino manggunigon ed sikayo diad anggan anton polaing.

³⁶Saray Judio et nayarin ibilang iran sondalo na ari, anggad nasabi ray talomplon libon lalaki, tan nasuildoan ira na singa suildo na saray arum a sondalo na ari.

³⁷Nayarin nipasen so arum ed sikara diad saray ankakabaleg a tirinsira na ari, tan nipabemben ed saray arum iray atagey a betang ed gobirno. Naoleyan ira na saray Judion pangulo tan opisyal, tan naabuloyan iran mangonur na saray dilin ganggan tan kaogaliyan da, onung na impangyabuloy na ari ed saray totood Judea.

³⁸Saray taloran distrito ya ataksing ed Samaria tan niarum ed Judea et magmaliw a sigput iran kabyangan na Judea tan nipasen iran walad silong na pakaoley labat na Pangulon Pari.

³⁹Saray buis a naalad siudad na Tolemaida tan saray dalin a kayaryan to et iter kon gastosen ed pangikurang na Timplod Jerusalem.

⁴⁰Isisipan ko met a mangiter ak a tinaon na labinliman libon pilak a kuarta a manlapud kayamanan na ari.

⁴¹Saray ag mi abayaran nen imbeneg iran taon a tulong na gobirno et niiter la ra tan, manlapud natan, nituloy yan bayaran para kimey ed Timplo.

⁴²Sakey ni, ag mi la singilen imay tinaon a liman libon iiter yon manlapud napapaloob na Timplo. Kayaryan la ya na saray paparin manlilingkur ed Timplo.

⁴³Ag la nayarin erelen odino alaen so kayaryan ton walad nanarian ko so siopaman a walay utang tod ari odino antokaman ya utang ya onsalimbeng ed Jerusalem odino diad dinanman a pasen a kayaryan na Timplo.

⁴⁴Iter a manlapud kayamanan na ari so gastos a pamasimbalon pamaalagey tan pangapiger na Timplo.

⁴⁵Ontan met a manlapud kayamanan na ari so pamasimbalon pamaalagey na saray padir na Jerusalem tan saray kaliber-liber ton tirinsira, tan say padir na saray nibitlan baley ed Judea.

⁴⁶Nen nadngelan nen Jonatan tan saray totoo ira may kanunotan nen Ari Demetrio, ag da sinisia odino inawat, lapud ag da nalingwanan so inkaruksa tod sikara tan saray makapasinagem a ginagawa tod sikara.

⁴⁷Nilabay da niy akigampid kinen Alejandro lapud sikatoy akaonan angibagay pikakaaro to, kanyan nansiansia ran kagampi to legan ton nambilay.

⁴⁸Nantipon na amayamay a sondalo si Ari Alejandro tan imparaan to ran mibakal ed kinen Demetrio.

⁴⁹Balet nen nanaabet iray sondalo na saramay duaran ari, pinmoliktar iray sondalo nen Alejandro tan batik ira. Inosilan ira nen Demetrio tan analod bakal.

⁵⁰Pinasyay impilaban nen Alejandro ya anggad mansironget, et apatey ed saman ya agew si Demetrio.

⁵¹Insan si Alejandro angibaki na totoo to ed ari na Egipto a si Tolomeo a Kumanem tan onyay impaibaga to:

⁵²Pinmawil ak ed nanarian ko tan manyodyorung ak la ed trono na saray lalakik. Wala lad limak so gobirno tan ooleyan ko lay bansa.

⁵³Akibakal ak ed kinen Demetrio, et tinalok tan saray sondalo to, tan asakop koy nanarian to.

⁵⁴Sipaparaan ak la natan a migampid sika. Ipaasawam ed siak so anak mo, et itdan ta ka na saray rigalon manepeg ed sikayon dua.

⁵⁵Inmebat si Ari Tolomeo, Matalonggaring ya agew nen pinmawil kad bansam tan inalam so trono na saray lalakim.

⁵⁶Onaabobun ak ed ibabagam, balet miabet ka nid siak ed Tolemaida. Makapankabat tad man, insan ipaasawak ed sikay anak ko.

⁵⁷Kanyan nen taon 162, si Tolomeo tan si anak ton Cleopatra et tinaynan day Egipto tan sinmabi rad Tolemaida.

⁵⁸Binana rad man nen Alejandro, et impaasawad sikato nen Tolomeo so anak to. Agawad man ed Tolemaida so bansal a kataruk na baleg a liket, onung ed kanepegay anak na ari.

⁵⁹Sinulat nen Alejandro si Jonatan, ta kinerew tod sikato ya abeten to.

⁶⁰Kanyan linmad Tolemaida si Jonatan ya impanengneng toy kagalangan to, ya akiarapan ed saramay duaran ari. Initdan to ra na rigalon pilak tan balituk, tan initdan to met na amayamay a rigalo iray atagey ya opisyal ya angolup ed sikara. Amin da et indaydayew day Jonatan.

⁶¹Diad saman met a bekta, wala ray pigaran Judion traidor a labay dan itday gunigon si Jonatan, kanyan inakusa ra balet ag ira inasikaso nen Ari Alejandro.

⁶²Ingganggan to ya itdan day Jonatan na saray kawes na ari ya isolung to,

⁶³tan pinagalangan to diad impamayorung tod sikato ed diking to. Imbaga nen Alejandro ed saray opisyal to ya iyakar dad pegley na siudad si Jonatan tan ibawag dan ag nayarin akusaen na anggan siopa tan anggan antoy makasengeg, tan ag nayarin gunigonen na siopaman.

⁶⁴Nen anengneng na saramay angakusad sikato so kagalangan a niiter ed sikato, nadngel da may nibawag, tan anengneng dan akasolung na kawes na ari, batik iran amin.

⁶⁵Inaruman ni na ari so kagalangan nen Jonatan, ta impalista ton sakey ed saray manonan kabyangan na Saray Kakaaro na Ari tan ginawa ton pangulo tan gobirnador na luyag to.

⁶⁶Makaliliket a pinmawil si Jonatan, ta akagamur na palabo.

⁶⁷Nen taon 165, si Demetrio a Kumadwa, a lakin anak nen Demetrio ya Onona, et tinaynan toy Creta tan sinmabi ed Siria, say dalin na saray lalaki to.

⁶⁸Nen nadngelan ya nen Alejandro, agunigon tan pinmawil ed Antiokia a manonan baley na Siria.

⁶⁹Pinasimbalo nen Demetrio so impanoro ed kinen Apolonio a gobirnador na Baleg a Siria. Anipon na amayamay a sondalo si Apolonio, inlira toy kampo to ed abay na Jamnia, tan impawit to yan sulat ed kinen Jonatan a Pangulon Pari:

⁷⁰Lapud sika naleleglemew ak, balet akin et sikan wadtan ed saray kapalandeyan et itutuloy moy ilaban mo, anta anggapoy ontutulong ed sika?

⁷¹No tuan walay panagmatalek mod saray sondalom, lasur ka diad patar ta mibakal ka, pian nasubok so biskeg na balang sakey ed sikata. Aral moy kipapasen mo, et narumog mon tutulongan ak na saray sondalo ed saray siudad.

⁷²Nakakabatan mo no siopa ak tan siopa ray kagampi mi, tan nabirbir mo ya anggapoy pakalaban mod sikami. Saray akaonan nanoley ed sika et amidwa la ran atalo ed dilin dalin da;

⁷³kanyan panoy paniilalom a natalom diad patar iray sondalok ya akakabayo tan saray arum a sondalok? Anggapo diay naamutan ya anggan melag a bato tan anggapoy nabatikan.

⁷⁴Nen naawat nen Jonatan imay sulat nen Apolonio, akapasnuk. Angalad Jerusalem na samplon libon pinili a sondalo; angawit met si agi ton Simon na saray sondalo to, tan inlira dan dua

⁷⁵so kampo ra ed paway na Jope. Ag ira palooben na saray totood man, lapud walad may olup na sondalo nen Apolonio, balet dinogpaan ira nen Jonatan.

⁷⁶Diad inkataktakot na saray totood siudad, nilokasan da ray puirta, kanyan adakep nen Jonatan so Jope.

⁷⁷Nen nadngelan nen Apolonio so agawa, intagar toy talon libon sondalo ton akakabayo tan amayamay a sondalo ton akaran, tan konwarin sinmener iran amaarap ed Asdod. Balet lapud panagmatalek tod biskeg na sarayay sondalo ton akakabayo, nankurang ed patar a kaiba toy karaklan na sondalo to,

⁷⁸inlira toy sanlibon sondalon akakabayo ed pasen a nadogpaan dad bandad beneg iray sondalo nen Jonatan. Inosilan ira nen Jonatan ya anggad Asdod, a dimay nambabakalan na saray sondalo.

⁷⁹

⁸⁰Diman labat naamtaan nen Jonatan a sikatoy asaneb. Aliktub iray sondalo to, tan naoran ira na saray pana na kalaban, manlapud kabwasan ya anggad labi.

⁸¹Balet nansiansian mabiskeg so inlaban na saray sondalo nen Jonatan onung na ingganggan tod sikara, tan nakekesawan a siansia ira may akakabayon ondodogpa.

⁸²Nen naknaksawan la ra, sinmabiy Simon a kaiba to ray sondalo to. Dinmogpa ra tan pinatalagnaw da ra may akaran a sondalon kalaban, et kibatiktik ira.

⁸³Saramay sondalon akakabayo, a natan et abuybuyak la rad bakalan, et batik irad Asdod a diman ira sinmalimbeng ed timplo na Dagon a dios da.

⁸⁴Balet pinoolan nen Jonatan imay siudad tan timplo na Dagon, et akalut ya amin ira may sinmalimbeng. Insan to pinoolan iray kaliber-liber a baley tan sinasamsaman to ra.

⁸⁵Diad saman ya agew, sakey a walon liboy apatey ed bakal odino apoolan.

⁸⁶Tinmaynan si Jonatan tan inlira toy kampo ed Ascalon; pinmaway diman iray totood siudad tan maliketliket iran angawat ed sikato tan baleg so impamagalang dad sikato.

⁸⁷Pinmawil ed Jerusalem si Jonatan tan saray totoo to, a dakerakel so awit dan asamsam.

⁸⁸Nen nadngelan nen Ari Alejandro so ginawa nen Jonatan, pinabaleg to so inter ton kagalangan ed sikato.

⁸⁹Impawitan to na balituk a kibilya na takeb a niniiter labat ed saray apagalangay ngaran na Kanayon na Ari. Impaoleyan to met ed sikato so siudad na Ekron tan saray kaliber-liber ton pasen.