Read Pangasinan Say Ononan Libro na SARAY MACABEO 11 Bible Online

Say Ononan Libro na SARAY MACABEO 11 - Pangasinan bible

Say Ononan Libro na SARAY MACABEO 11

¹"Si Ari Tolomeo a Kumanem na Egipto et anipon na sondalon dakil ni nen buer ed gilig na dayat, tan amayamay met so tinipon ton bapor. Ginetma ton patitan si Alejandro, sakopen toy nanarian to, insan to iyarum ed dilin nanarian to.

²"Kanyan linmad Siria tan insipan ton mikaarod sikara, et nilokasan na saray totood man iray puirta ra tan maliket dan inawat. Ingganggan nen Ari Alejandro ya onyay gawaen da, lapud katolangan to si Tolomeo.

³"Balet nen mampapabaybay si Tolomeo, angipasen na saray sondalo ed kapag baley.

⁴"Nen asabi toy Asdod, impanengneng na saray totood man so apoolan a timploy Dagon tan amin ya aderal-deral ed siudad tan saray kaliber-liber ton baley. Ataytayak ed amin a pasen iray bangkay. Diad dalan nen Tolomeo wadman a nantatapewan iray bangkay na saramay pinopoolan nen Jonatan legan na bakal.

⁵"Imbaga na saray totoo ed kinen Tolomeo imay ginagawa nen Jonatan, ta inilaloan dan tetelen toy Jonatan, balet ag inmesel si Tolomeo.

⁶"Inabet nen Jonatan si Tolomeo diad Jope, tan ginawa to ray manepeg a sirimonya. Nambanowan ira tan nansanlabi rad man.

⁷"Inolup nen Jonatan ya anggad Ilog na Eleutero, insan pinmawil lad Jerusalem.

⁸"Diad onya si Ari Tolomeo, diad komplut ton sumpad Alejandro, et inoleyan to ray baley ed gilig na dayat ya anggad baybay ed Seleucia a walad abay na dayat.

⁹"Manlapud man si Ari Tolomeo sinulat toy Ari Demetrio na onya: Mampaknaan itan dua. Say anak ko et asawa la nen Alejandro, balet babawien ko lad sikato, paasawak ed sika, tan panoleyen ta ka ed nanarian nen amam.

¹⁰Magbabawi ak ed impangiter kon asawa nen Alejandro, lapud labay to ak a pateyen.

¹¹Onyay impangakusa nen Tolomeo ed kinen Alejandro, lapud labay ton sakopen so nanarian to.

¹²Kanyan binawi nen Tolomeo ed kinen Alejandro imay anak to tan inter tod kinen Demetrio; inekal toy impisiglaotan tod kinen Alejandro, kanyan nagmaliw iran mankalaban.

¹³Insan linmoob ed Antiokia si Tolomeo tan inala toy trono na Siria, kanyan akatoon ed olo toy korona na Egipto tan say korona na Siria.

¹⁴Diad saman a panaon walad Cilicia si Ari Alejandro, lapud onlalaban ed pakaoley iray totood man.

¹⁵Balet nen nadngelan toy ginawa nen Tolomeo, ginmalaw a dogpaan to. Dakerakel a sondalo so impilaban nen Tolomeo, kanyan analo.

¹⁶Nen asabi nen Tolomeo so katagtageyan na pakayari to, batik ed Arabia si Alejandro ta paiyagel diman,

¹⁷balet walad may sakey a toon Arabe a manngaran na Zabdiel ya amotut na olo to tan impawit tod kinen Tolomeo.

¹⁸Kalabas na duay agew, inatey met si Tolomeo tan pinapatey na saray ombaley iray sondalon intilak tod saray tirinsira.

¹⁹Kanyan nen taon 167, si Demetrio a Kumadwa so nagmaliw ya ari.

²⁰Diad saman met a panon tinipon nen Jonatan iray lalaki ed Judea, ta dogpaan toy tirinsira ed Jerusalem. Nanggagawa ra na amayamay a plataporman panlakob ya ikana ra ed idogpa ra.

²¹Balet wala ray pigaran traidor a Judio, a kabosul day dilin bansa ra, a linma rad kinen Demetrio a Kumadwa tan imbaga rad sikato a mampaparaan si Jonatan ya ondogpad Jerusalem.

²²Nen nadngelan ya nen Demetrio, mapalaloy pasnuk to tan inyalis ton tampol ed Tolemaida so ayaman to. Sinulat toy Jonatan tan ingganggan ton tondaan toy pampaparaan ton ondogpa tan pinengnengan ton tampol ed Tolemaida, ta mantongtong ira.

²³Nen apasabi nen Jonatan so impaibaga nen Demetrio, ingganggan ton ituloy so panlakob da tan amili na pigaran pangulo na saray Judio tan pigaran pari a milad sikato. Imposta toy bilay to

²⁴diad inyakar tod ari ed Tolemaida. Angawit na saray kawes, pilak tan balituk, tan amayamay a rigalo, et indayew na ari.

²⁵Anggaman a si Jonatan et inakusa na pigaran traidor a kabansaan to ya ag mangitaltalek ed ganggan,

²⁶siansian maung so impanangkaili na ari ed sikato, a singa sarayay akaonan nanari nen say sikato. Pinagalangan to ed arap na amin a sumisimbawa to,

²⁷pinaletan toy kipapasen to a Pangulon Pari, impawil tod sikato iray amin a gendat a kagalangan to, tan tinoro ton sankatageyan ed saray Kakaaro na Ari.

²⁸Kinerew nen Jonatan ed ari a say dalin na Judea tan saray taloran lugar na Samaria et ag la mambayar na saray buis. Insipan nen Jonatan a no gawaen ya nen Ari Demetrio, bayaran to na samplon libon kilon pilak.

²⁹Inmabubon si ari tan sinulat toy Jonatan a pamalet tod saya:

³⁰Nanlapud Ari Demetrio yan sulat a para Ari Jonatan tan amin da ray Judio. Awat mo pay maliket a pabanok.

³¹Pian sikakabat kayo, ipapawit koy kopia na sulat kod Kagalgalang a Lastenes nipaakar ed sikayo:

³²Nanlapud Demetrio yan sulat a para Kagalgalang a Lastenes. Awat mo pay maliket a pabanok.

³³Ginetmak ya itdan na pigaran palabo iray Judio, lapud matoor ira a kagampi tayo tan susumpalen da ray nabebetangan da ed impipaknaan dad sikatayo.

³⁴Papaneknekan koy pankanepegan da ed dalin na Judea tan saray taloran lugar na Efraim, Lida, tan Arimatea a natan et nataksing la ra ed Samaria tan sakop la ra na Judea, pati saray dalin a nasasakopan da. Pankaabigan ya na amin da ray onlan mangibagat ed Jerusalem. Bangta say pambayaran na tinaon a buis na saray bungay dalin na sarayan lugar et aliwa lan diad ari no ag ta diad Timplo la.

³⁵Ontan met ya ag ko la ra pambayaren ed siak na kuartan manlapud kakaplo, buis na asin, tan saray arum a buis.

³⁶Sarayan abitla ed sayan sulat et nepeg ya anggapoy ekalen ed arapen a panaon.

³⁷Nakaukolan a mampagawa ka na nagnap a kopia na sayan ley tan iter mod kinen Jonatan, ta paipeket tod mapalaway a pasen diad pokdul a kawalaay Timplo.

³⁸Nen anengneng nen Ari Demetrio a manaariy kareenan ed dalin diad silong na pakaoley to tan anggapo la ray onsusumlang, binuyak to ray sondalo to tan pinasempet to la rad kaabungan da, likud ed saray uupaan ton sondalo a nanlapud saray islan Grigo. Lapud saya, amin a sondalon nanlingkur nen panaon na saray akaonan arari et akapasnuk irad sikato lapud naandian iray anapay-bilay.

³⁹Si Trifo, sakey ed saray kagampi nen Alejandro, et anengneng to a manririklamon amin iray sondalo lapud ginawa nen Demetrio, kanyan linmad kinen Imalkue a sikatoy mamapabaleg ed kinen Antioco, say malangwer a lakin anak nen Alejandro.

⁴⁰Nanayam ya abayag diman si Trifo tan kinokoyung toy Imalkue ya ipalima tod sikato imay ogaw, pian nagawa ton ari a kasalat nen ama to. Imbaga to met ed kinen Imalkue so nipaakar ed saray ley ya impaakseb nen Demetrio tan no panoy pamobosul ed sikato na saray sondalo.

⁴¹Impaibaga nen Jonatan ed kinen Ari Demetrio so kerew to ya ekalen to ray sondalo ton walad tirinsira ed Jerusalem tan saray tirinsira ed Judea, lapud tataktakoten da ray Judio.

⁴²Inmebat si Demetrio: Gawaen ko so kekerewen mo tan no onsabiy pankanawnawa, iter kod sika tan say bansam so sankatageyan a kagalangan.

⁴³Balet natan natulongan mo ak diad pangibakim na saray sondalom ya ibakalan da ak, lapud onlalaban ed siak ya amin iray sondalok.

⁴⁴Kanyan si Jonatan angibakid Antiokia na talon libon impasal a sondalo to. Akaliket so ari nen sinmabi ra,

⁴⁵lapud nantitipon ed siudad so sanlasus tan duamplon libon totoo a getma ran pateyen so ari.

⁴⁶Balet akabatik ed palasio nen wala lad pakaoley na karaklan iray dalan tan gapwan da lay manggulo.

⁴⁷Insan say ari kinmerew na tulong ed saramay Judion sondalo, et ginanatan day dinmagon tinmulong ed sikato. Nanliber irad intiron siudad tan akapatey ira na ag onkulang a sanlasus libon totoo.

⁴⁸Inlaban day bilay na ari, balet sinamsaman day siudad tan pinoolan da.

⁴⁹Nen anengneng na saray totoo a say siudad et sigput lan walad pakaoley na saray Judio, nakalan iray ilalo tan inmapireng irad ari. Kinerew dad

⁵⁰sikaton mipaknaan a nagaway kareenan tan patondaen toy idodogpa na saray Judio.

⁵¹Inikbanan na saray mananumlang iray armas da tan sinmuko ra. Say ari tan balang tood nanarian et wala natan so baleg a panamagalang dad saray Judio, a pinmawil irad Jerusalem ya awit day dakerakel ya asamsam da.

⁵²Si Demetrio et malmalet lay inkiletneg ton ari, tan nanarid bansa so kareenan legan na impanoley to.

⁵³Balet ag to tinoor ya amin iray sipan to tan kinalaban toy Jonatan. Ag to tinumangan si Jonatan ed matoor ya impanglingkur to, no ag ingen intuloy ton tinataktakot.

⁵⁴Ag abayag, pinmawil si Trifo a kaiba toy malangwer ya Antioco tan kinoronaan ton ari.

⁵⁵Amin da ra may sondalon ineekal nen Demetrio et tinulongan da may malangwer ya ari. Tinalo day Demetrio, et batik.

⁵⁶Adakep nen Trifo iray ilipanti tan naplag ed pakaoley to so Antiokia.

⁵⁷Sinulat nen malangwer ya Ari Antioco si Jonatan tan pinaletan toy kipapasen nen Jonatan a Pangulon Pari tan manoley ed apatiran lugar tan initdan toy ngaran a Kaaro na Ari.

⁵⁸Impawitan to na sakey a tipon na balituk a kagawaan na lamisaan tan initdan toy kanepegan ya oninom ed saray balituk a kupa, mangisolung na kawes na ari, tan mangipeket na balituk a kibilya na takeb a nitutumang ed Saray Kakanayon na Ari.

⁵⁹Tinoro to met si Simon ya agi nen Jonatan a gobirnador na lugar a manlapud gilig na dayat diad Fenicia ya anggad ketegan na Egipto si Simon.

⁶⁰Insan si Jonatan nankurang a kaiba to ray sondalo to diad saray baley na Baleg a Siria, tan akigampid sikato iray amin a sondalon Siriano. Linmad Ascalon, a diman inawat tan pinagalangan na saray totoo.

⁶¹Insan linmad Gaza, balet saray totood man et binalewetan da ray puirta ra, ta ag da labay a palooben. Kanyan nilakub to so siudad tan pinoolan tan sinamsaman to ray kaliber-liber a pasen.

⁶²Insan kinerew na saray totood Gaza a mankaaro ra, kanyan akipaknaan ed sikara si Jonatan. Inaala nen Jonatan iray lalakin anak na saray pangulo tan imbaki to rad Jerusalem a pamasengegan to ra na labay ton nagawa. Kayari to ya, nankurang ya anggad Damasco.

⁶³Akabatan nen Jonatan a linmad Cades ed Galilea iray opisyal nen Demetrio a kaiba ray amayamay a sondalo, ta getma ran paeren so plano nen Jonatan.

⁶⁴Kanyan intilak tod Judea si agi ton Simon tan linma ya abeten to ran bakalen.

⁶⁵Insan nilakob nen Simon so Bet-sur tan abayag ton binakal.

⁶⁶Kinerew na saray totood man a mankakaaro ra, et inmabubon si Simon. Sinakop to may baley, pinagit to ray totood man, tan angipasen na saray sondalon manayam diman.

⁶⁷Nankampo si Jonatan tan saray sondalo to ed gilig na Dayat na Galilea. Diad kabkabwasan ed ontombuk ya agew, pinakurang to ray sondalo to ed patar na Hazor,

⁶⁸a diman so susulongan na karaklan na saray sondalon taga arum a bansa, ta abeten da. Ag akabatan nen Jonatan ya angitilak ira na saray sondalo a mananeb ed sikara diad kapalandeyan,

⁶⁹tan nen pinmaway a dinmogpa ira may mananeb,

⁷⁰pinmoliktar ya amin iray sondalo nen Jonatan tan batik ira. Anggapoy atilak ed sikara, likud ed duaran opisyal a di Matatias a lakin anak nen Absalom tan si Judas a lakin anak nen Calfi.

⁷¹Apaabeba si Jonatan, kanyan pinipilat toy kawes to, ininan toy dabuk so olo to, tan nampikasi.

⁷²Insan pinmawil ya akibakal, pinapairap to ray kalaban, tan pinabatik to ra.

⁷³Nen anengneng ya na saramay ombabatik a sondalo to, pinmoliktar ira tan inmosil met ira. Inosilan da ray kalaban ya anggad kampo ra ed Cades, insan da dinakep imay kampo.

⁷⁴Ag onkulang ed talon libon kalaban a sondalo so apatey ed saman ya agew. Insan pinmawil lad Jerusalem si Jonatan.