Read Pangasinan Say Ononan Libro na SARAY MACABEO 13 Bible Online

Say Ononan Libro na SARAY MACABEO 13 - Pangasinan bible

Say Ononan Libro na SARAY MACABEO 13

¹"Akabatan nen Simon ya anipon na dakerakel a sondalo si Trifo, ta implano ton looban so Judea tan sigput a deralen to.

²"Naamtaan to a sayan balita et sikatoy makasengeg na katatalagnawan tan katatakotan na saray totoo, kanyan linmad Jerusalem. Impantitipon to ray totoo,

³"tan pinabiskeg toy linawa ra diad impangibaga to na onya: Amta yo so ginawa na pamilya nen amak, saray agagik a lalaki, tan siak makasengeg ed Ganggan nen Moises tan say Timplo. Amta yo met iray bakal ya akilabanan mi tan saray kairapan ya asagmak mi.

⁴"Apatey ya amin iray agagik lapud Ganggan tayo, say Timplo tayo, tan say bansa tayo, tan bukbukor ko lay atilak.

⁵"Balet ag komun nibaga a sinalik ya inyagel so bilay kon dili no panaon na kaatapan; ag ko ipapasen a maung ak ni nen saray agagik a lalaki.

⁶"Andin balut! Tua a lapud pambosul na saray bansan Hintil nantitipon iran maneral ed sikatayo, balet onlaban ak ed pangyagel koy bansak, say Timplo, tan saray inaro yod bilay.

⁷"Sarayan salita et apabiskeg dan tampol so linawa da ray totoo,

⁸"kanyan inmebat iray makmaksil, Sika la natan so pangulo mi a kasalat na saray agagim a di Judas tan Jonatan.

⁹"Milaban kad saray pibakalan tayo, et gawaen miy antokaman a kerewen mo.

¹⁰Kanyan impantitipon nen Simon iray amin a sondalo tan ginanatan dan sinumpal iray padir na Jerusalem tan pinaletan dan amin iray tirinsira to.

¹¹Imbaki tod Jope si Jonatan a lakin anak nen Absalom a kaiba toy amayamay a sondalo. Pinagit na sayan Jonatan iray totood saman a baley tan sinakop to.

¹²Tinaynan nen Trifo so Tolemaida a kaiba toy amayamay a sondalo, ta looban day Judea. Sankaawit dan priso si Jonatan ya agi nen Simon.

¹³Inlira nen Simon so kampo to ed Adida diad samput na patar.

¹⁴Nen akabatan nen Trifo a sinalatan nen Simon si agi ton Jonatan tan akaparaan a mibakal ed sikato, impaiter to yan sulat ed sikato:

¹⁵Inerel koy agim a Jonatan, lapud ag to binayaran iray utang tod panagsinupay kayamanan na ari nen sikatoy wala nid pakaoley.

¹⁶Balet ibolus ko no bayaran mo ak na duan libo, piton lasus tan duamplo tan piton kilon pilak, tan ibakim iray duaran anak ton lalaki ta ipriso ra a kaletan na ag to la ilaban ed sikami no sikatoy nablus la.

¹⁷Anggaman ya amta nen Simon a papalikdoen da labat, nampaalay kuarta tan impaawit to ra may duaran lalakin anak, lapud ag to labay a bosulen na saray Judio.

¹⁸Antakot si Simon, ta ompan ibaga naani na saray Judio ya apatey si Jonatan lapud ag to impaiter so kuarta tan saramay anak a lalaki.

¹⁹Kanyan ginawa to may imbaga nen Trifo, balet ag sinumpal nen Trifo imay sipan to tan ag to imbolus si Jonatan.

²⁰Insan ginmalaw si Trifo a looban toy dalin tan deralen to; sinmaliberber ed dalan a mamaarap ed Adora. Balet si Simon tan saray sondalo to et inarap da ed inerman a laen to.

²¹Saray kalaban a sondalon walad tirinsira ed Jerusalem et mabetbet a mangibaki ray totoo da a mangibagan mapilpilit ed kinen Trifo a dagoen to la ran tampol. Imbaga ra met a diad idago to, ondalan ed kalawakan tan ipawitan to ray abasto.

²²Impanparaan nen Trifo iray sondalo ton akakabayo ta ondogpa ra, balet walay mabiskeg a bagyon nantaruk na yilo ed saman a labi, kanyan ag to ayariay tinmatdang ed kapokdulan. Kanyan sinmoner tan linmad Galaad.

²³Nen walad asingger ed Baskama, impapatey toy Jonatan tan impaipompon tod man.

²⁴Insan amoliktar lay Trifo tan pinmawil lad dilin bansa to.

²⁵Impaiyakar nen Simon ed pigaran totoo to so bangkay nen agi ton Jonatan diad Modin, tan diman nipompon ed baley na saray lalaki ra.

²⁶Mapalalo tan abayag so impanermen na amin a totood Israel, lapud inkaandi nen Jonatan.

²⁷Diad tapew na lobuk nen ama to tan saray agagi ton lalaki, amaalagey si Simon na atagtagey a monuminto a nanengneng ed arawdawi. Pinasileng a bato so nipaklap ed arap tan beneg na samay monuminto.

²⁸Amaalagey na pitoran nanaabay a piramidi a para si ama to, si ina to, tan saray apatiran agagi to.

²⁹Pian marakep a nengnengen ira may piramidi, amaalagey na saray lusek. Akortian ira may lusek na saray kawes a para bakal tan saray bapor. Sakey yan pakanudnunotan ed impanatalo ra, a nayarin bisitaen na saray bumabiahin manlapud biek-taew.

³⁰Wadman nid Modin ya anggad natan imay ginawa ton pantion.

³¹Legan to yan panaon, pinatey nen Trifo so malangwer ya ari a si Antioco a Kumanem,

³²tan sinali ton inoleyan so nanarian na Siria. Ankakabaleg a gunigon so inter tod saman a bansa.

³³Pinasimbalo nen Simon ya impaalagey iray tirinsira ed Judea; pinaalageyan to ra na saray atagey a tori, saray mabiskeg a padir, tan saray binalewetan a puirta, insan angyan diman na amayamay ya abasto.

³⁴Angibaki si Simon na saray totoo to, ta kerewen dad kinen Ari Demetrio a Kumadwa ya ag to la ra pambayaren na buis na dalin, bangta tatakewen ira labat nen Trifo.

³⁵Impawit nen Demetrio so onggendan a bales a sulat:

³⁶Nanlapud Demetrio yan sulat a para Pangulon Pari a si Simon, say kaaro na saray arari, para bansa na saray Judio, tan para saray pangulo ra. Awat yo pay maliket a pabanok.

³⁷Naawat ko may balituk a korona tan samay balituk a sanga na palmira ya impawit yo. Sipaparaan ak a mipaknaan ed sikayo; mankakaaro itayo tan bilinen ko ray opisyal a sumisingil na buis ya ag da kayo la pambuisen.

³⁸Papaletan ko ra may gendat a paknaan tayo, tan mansiansian kayaryan yo ray tirinsiran impaalagey yo.

³⁹Pipirdonaen ta kayo ed saray impanumlang yo ya anggad natan nipaakar ed paknaan tayo, tan ag ta kayo la pambayaren na nidoma-doman buis a nepeg yo nin bayaran tan saray arum a nasisingil ed Jerusalem ya anggad natan.

⁴⁰Amin a Judion nayarian toy manlingkur ed ari et nayarin mampalista. Mankakaaro itayo.

⁴¹Kanyan nen taon 170, nakal ed tenger na saray Judio so pako na saray Hintil a managpairap.

⁴²Ginapwan na saray totoo ya itdan na pitsa iray kasulatan tan saray kaletan da diad panamegley na sarayan salita: Diad ononan taon na impanoley nen Simon, say matalonggaring a Pangulon Pari, pangulo na saray sondalo tan saray Judio.

⁴³Diad saman a panaon nilakob nen Simon so Geser tan pinaliberan to na saray sondalo. Amaalagey na nialis-alis a plataporman panlakob, inyakar tod abay na padir na baley, dinogpaan toy sakey ed saray tori, tan adakep to.

⁴⁴Saray lalakin wadman ed plataporman panlakob et ginanatan day linmoob ed baley, et agaway aligewgewan.

⁴⁵Saray lalaki ed baley, saray kaasawaan da, tan saray anak da et pinipilat day kawes da lapud ermen da, tan kinmalab irad toktok na padir na baley. Inkasikasil day akikasi ed kinen Simon a mipaknaan la.

⁴⁶Kinerew da, Kasian mo kami. Ag mo kami pa dudusaen, onung ed kanepegan mi!

⁴⁷Kanyan akipaknaan si Simon ed sikara tan tinondaan to lay bakal. Pinataynan tod baley iray totoo; insan to nilinisan onung ed ganggan iray kaabungan a wala ray talintaoy diriyos. Nen agawa la ya, sikato tan saray totoo to et linmoob irad baley a mangankanta na saray imno tan saray kanta a panangidayew.

⁴⁸Inekal ton amin iray makarotak ed baley onung ed ganggan tan impanayam tod man iray totoon ontoluk ed amin a bilin a walad Ganggan nen Moises. Pinabiskeg to ray tirinsira na baley tan amaalagey diman na palasio to.

⁴⁹Saramay totood tirinsira ed Jerusalem et asebelan la ra natan ya ontaynan a mangaliw odino manlako na antokaman. Mapalaloy inkaerasan da tan amayamay ed sikaray inatey ed eras.

⁵⁰Diad kaonuran, inapireng dad kinen Simon a mampapakna ra. Inmabuloy si Simon, pinaekal to rad man ed tirinsira, tan nilinisan to onung ed ganggan.

⁵¹Diad kumaduamplo tan talon agew na kumadwan bulan na taon 171, agaway baleg a panliliket ed siudad, lapud apatonda imay baleg a katatakotan na saray totood Israel. Linmoob si Simon tan saray totoo to ed samay tirinsira a mangankanta ra na saray imno a panangidayew tan pisasalamat, legan a sankaegnaan da ray sangay palmira tan manotogtog ira na saray arpa, saray piangpiang, tan saray lira.

⁵²Impaakseb nen Simon a maliket a silibraan a tinaon iman ya agew. Pinabiskeg to ray tirinsira a pokdul a kawalaan na Timplo diad dapag ya akaarap ed tirinsira, tan diman so nanayaman to tan saray totoo to.

⁵³Baleg la natan si Juan ya anak nen Simon, kanyan impagmaliw nen Simon a pangulo na amin a sondalo. Diad Gezer so nanayaman nen Juan.