Read Pangasinan Say Ononan Libro na SARAY MACABEO 15 Bible Online

Say Ononan Libro na SARAY MACABEO 15 - Pangasinan bible

Say Ononan Libro na SARAY MACABEO 15

¹"Manlapud saray isla na Grecia si Antioco a lakin anak nen Ari Demetrio et impawit toy onggendan a sulat ed kinen Simon a Pangulon Pari tan gobirnador na saray Judio tan amin a totoo ed bansa:

²"Si Ari Antioco so nanlapwan na sayan sulat a para Simon a Pangulon Pari tan gobirnador, tan para bansa na saray Judio. Awat yo pay maliket a pabanok.

³"Onung na kabat yo la, say nanarian na saray lalakik et adakep na saray traidor. Getmak a babawien tan ipawil ed gendat ya inkatalonggaring to. Anipon ak la na amayamay a sondalon inuupaan tan angiparaan ak na saray bapor a para baka.

⁴"Planok a looban so bansa tan dogpaan ko ray totoon nandederal na saray baley tan say bansa.

⁵"Natan sirin, papaletan koy ag yo la pambabayar na buis tan saray arum a babayaran, say palabon impagamur ed sikayo na saray akaonan arari.

⁶"Iitdan ta kayoy abuloy a manggaway dilin kuarta ya ikana ed dilin bansa yo.

⁷"Ag la nepeg a mambuis so Jerusalem tan say Timplo. Mansiansian kayaryan yo iray armas a ginagawa yo tan saray impapaalagey yon tirinsira a panaayaman yo la natan.

⁸"Sakey ni, apaandi lan anggad kapigan iray utang yo natan ed kayamanan na ari, odino anggan saray nautang yo ed arapen a panaon.

⁹"Kapangipawil ko na nanarian ed pakaoley ko, iter kod sika, diad bansam, tan diad Timplo so baleg a kagalangan, pian nibantug ed intiron mundo so talonggaring na bansa yo.

¹⁰Nen taon 174, nilooban nen Antioco so dalin na saray lalaki to. Karaklan na saray sondalo et akigampid sikato, kanyan dagdaiset iray atilak ya akigampid kinen Trifo.

¹¹Si Trifo ya oosilan nen Antioco et batik ed siudad na Dor a walad gilig na dayat.

¹²Abirbir ton anggapo lay nagawaan to, natan ta imbatikan la na amin a sondalo to.

¹³Insan nilakob nen Antioco so Dor a kaiba toy sanlasus tan duamplon libon nipasapasal a sondalo tan walon libon sondalon akakabayo.

¹⁴Diad pananulong na saray bapor ton ondodogpa, sigput ton alakob so baley, kanyan apasoot ton anggapo lay toon makaloob odino makataynan diman.

¹⁵Legan to yan panaon, si Numenio tan saramay kakaiba to et sinmabi rad Jerusalem a nanlapud Roma a sankaawit day onggendan a sulat a para saray nandoroman arari tan bansa:

¹⁶Nanlapud kinen Lucio a mangilalaman na saray taga Roma so sayan sulat a para Ari Tolomeo. Awat mo pay maliket a pabanok.

¹⁷Sakey ya olup na saray manangilaman na saray kakaaro tan kagampi mi a Judio so sinmabid sikami, ta pasimbaloen day akaona lan pankakaaro tan pantutulongan mi. Imbaki ra na Pangulon Pari a si Simon tan saray Judio,

¹⁸tan sankataruk day rigalon balituk a samper, a mambelat na kapalduan tonilada.

¹⁹Kanyan nampapaknaan mi a sulaten iray nandoroman arari tan bansa, ta ipupurek mid sikaran ag da didiwiten a balut iray Judio, saray baley da, odino say bansa ra. Ag da nepeg a bakalen iray Judio, odino tulongan iray ondogpad sikara.

²⁰Nampapaknaan mi ya awaten imay samper tan insipan min iyagel ira.

²¹Kanyan no wala ray traidor ya akataynan ed Judea tan piyagel ed dalin yo, ipalima yo ra ed kinen Simon a Pangulon Pari, pian nadusa to ra onung ed ganggan na saray Judio.

²²Onyay insulat nen Lucio ed kinen Ari Demetrio, kinen Atalo, Ariarates, tan kinen Arsaces,

²³tan amin da ray onggendan a bansa: Samsames, Esparta, Delos, Mindos, Sicion, Caria, Samos, Panfilia, Licia, Halicarnaso, Rodas, Faselis, Coas, Side Arado, Gortina, Nido, Chipre, tan Cirene.

²⁴Nipatolur met ed kinen Simon a Pangulon Pari so sakey a kopia na sayan sulat.

²⁵Pinidwa nen Ari Antioco a nilakob so Dor, tan naynay ton dinogpaan. Nanggawa na saray plataporman panlakob, tan lapud impansara to, ag makaloob odino makapaway si Trifo tan saray totoo to.

²⁶Angibaki si Simon na duan libon nipasapasal a sondalo to, pian natulongan day Antioco. Angipawit met na pilak tan balituk tan amayamay a kagawaan a para bakal.

²⁷Balet ag ira inawat nen Antioco, tan binoral ton amin iray impipaknaan tod kinen Simon, tan nagmaliw a kalaban to.

²⁸Insan imbaki nen Antioco so napanmatalkan ton opisyal a si Atenobio, pian makapitongtong ed kinen Simon. Inkuantod kinen Simon, Manaayam kad Jope, Gezer, tan say tirinsira ed Jerusalem; siudad iran sakop na nanarian ko.

²⁹Dinederal mo ra tan lugar tan amayamay a gunigon so inyakar mod bansa. Dakel iray pasen ya impasilong mod pakayarim, anggaman a sakop ira na nanarian ko.

³⁰Natan nepeg mon ipawil la ra tan a siudad a dinadakep mo, tan nepeg mon iter ed siak iray kuartan buis ya inaalam ed saray lugar a sinasakop mo a wala rad paway na Judea.

³¹No ag mo labay yan gawaen, nepeg mo ak sirin a bayaran na labintalon libo, sanlasus tan walomplon kilon kaaruman a pilak, pian nabayaran ak ed saray bengatlan aderal-deral tan saray abalang a buis. No ag ka onabuloy a manggawad anggan dinan ed saraya, bakalen mi kayo.

³²Nen akasabid Jerusalem si Atenobio, nikelawan nen anengneng toy ontan lan karakep na palasio nen Simon, saray balituk tan saray pilak a kobyirto diad baleg a kuarton ponsiaan, tan saray arum a mangipapanengneng na baleg a kayamanan. Inyawat to may sulat na ari ed kinen Simon.

³³Inmebat si Simon, Ag kami nin balut anakop na dalin ed arum iran bansa, odino anamsam na antokaman a kayaryan na arum a totoo. Say katwaan to et binabawi mi labat iray kayaryan a tinawir mid saray lalaki mi, say dalin a sinamsam ed sikami na saray kalaban mi.

³⁴Aanamuten mi labat yan pankanawnawa min mamawi na saray tinawir mid saray lalaki mi.

³⁵No nipaakar ed Jope tan Gezer ya ibabaga yon sakop yo, itdan mi kayo na duan libo, piton lasus tan duamplo tan piton kilon pilak, anggaman a saray totood saratan a siudad et mapalaloy impamapairap dad bansa mi. Ag inmebat si Atenobio,

³⁶balet mapalaloy pasnuk ton pinmawil ed ari. Nen imbaga tod ari so imbaga nen Simon, tan imbalita toy nipaakar ed ontan lan karakep na palasio nen Simon tan amin ya anengneng to, mapalalo so impakapasnuk na ari.

³⁷Legan to ya, linmogan si Trifo ed bapor tan batik ed baley na Ortosia.

³⁸Tinoro nen Ari Antioco si Cendebeo a pangulo na saray sondalo ed saray pasen ya asingger ed dayat, initdan to na saray sondalon akaran tan saray sondalon akakabayo,

³⁹tan ingganggan ton bakalen toy Judea. Ingganggan to met a pasimbaloen ton ipaalagey so baley na Kidron tan paletan to ray puirta to, pian labanan to ray Judio. Intuloy na ari ya inosilan si Trifo.

⁴⁰Insan akasabid Jabnia si Cendebeo tan ginapwan ton tinataktakot iray Judio diad inloob tod Judea, impandakep tod saray totoo, tan impanpatey tod sikara.

⁴¹Pinasimbalo ton impaalagey so Kidron tan angipasen diman na saray sondalon akakabayo tan saray sondalon akaran, pian nadogpaan toy Judea tan naguardiaan to ray dalan, onung na ingganggan ed sikato na ari.