Read Pangasinan Say Ononan Libro na SARAY MACABEO 16 Bible Online

Say Ononan Libro na SARAY MACABEO 16 - Pangasinan bible

Say Ononan Libro na SARAY MACABEO 16

¹"Tinaynan nen Juan a lakin anak nen Simon so Gezer, ta imbalita tod kinen ama to so ginawa nen Cendebeo.

²"Inkuanen Simon ed kinen Juan tan si Judas, saray duaran sankatakkenan ya anak ton lalaki, Amin da ray kabyangay pamilya nen amak, saray lalakin agagik, tan siak et akilaban kami legay bilay mi ed saray akibakalan na Israel, tan amimpigan nampalabo kamin angilaban na Israel.

³"Masiken ak la natan, balet salamat ed Dios ta kakkaksilan yo. Sikayo lay onsalat ed siak tan si agik a mibakal para bansa. Olupen kayo komun na dilin Dios.

⁴"Insan anogyup si Juan na Israelitan duamplon libon nipasal a sondalo tan saray sondalon akakabayo, tan nankurang iran mibakal ed kinen Cendebeo. Nampalabas iray labi ed Modin,

⁵"insan diad kabkabwasan ed ontombuk ya agew inmalis ira ed patar. Diman ira inabet na amayamay a sondalon akaran tan akakabayo, balet walay ilog a nambaetan na saray duaran olup na sondalo.

⁶"Linmira si Juan tan saray sondalo to ya onarap ed saray kalaban da, balet nen anengneng nen Juan ya antakot iray sondalo ton ombaliw ed ilog, sikatoy inmonan binmaliw. Nen anengneng na saray sondalo to, tinmombuk ira.

⁷"Inapag nen Juan iray sondalo to tan inyan tod pegley na saray sondalon akaran iray sondalon akakabayo, lapud amayamay iray kalaban ya akakabayo.

⁸"Apaknul iray trumpitan tanda na idogpa, et atalo si Cendebeo tan saray sondalo to, tan amayamay ed sikaray apatey. Saray nakdaan ed sikara et pinmoliktar iran batik ed tirinsira rad Kidron.

⁹"Asugatan ed bakal si Judas, balet intuloy nen Juan ya agi to ya inosilan iray kalaban ya anggad Kidron, a pinasimbalon impaalagey nen Cendebeo.

¹⁰Saramay batik a sondalo et linma rad saray tori ed kaalogan na Asdod, et pinoolan nen Juan so siudad. Diad saman ya agew, duan libon sondalo na kalaban so apatey. Pinmawil ed Judea si Juan ya anggapoy maoges ya agawad sikato.

¹¹Si Simon a Pangulon Pari et tinoro ton pangulo na saray sondalo ed Patar na Jerico si Tolomeo a lakin anak nen Abubo. Mayamyaman a too si Tolomeo,

¹²lapud sikatoy manugang nen Simon.

¹³Balet atagtagey so pirawat to tan nanggonaet a sikatoy manoley ed bansa. Kanyan namplano a pateyen to si Simon tan saray anak to.

¹⁴Si Simon tan saray anak ton di Matatias tan Judas et ombibisita ra ed saray baley, pian niiter day nakaukolan na saray totoo. Sinmabi ra ed Jerico diad bulan na Sebat, say kumalabinsakey a bulan diad taon 177.

¹⁵Si Tolomeo, a mamplaplano ni na pamatey tod kinen Simon tan saray duaran anak to, et inawat to ra ed sakey a melag a tirinsira a tatawagen na Dok ya impaalagey to. Insaklangan to ra na baleg a ponsia, balet pinaamut tod dalem na tirinsira iray pigaran totoo to.

¹⁶Nen abuek la ra di Simon tan saramay anak to, pinmaway si Tolomeo tan saramay totoo to ed panaamutan da. Bigla ran linmoob ed kawalaay ponsia a sankabembenan da ray ispada ra tan diman da pinatey si Simon, saramay anak to, tan pigaran aripen.

¹⁷Kaogsan so imbales nen Tolomeo ed kamaungan, lapud sayan makapasinagem ya impantraidor to.

¹⁸Insan insulat nen Tolomeo so nipaakar ed ginawa to tan impawit tod ari. Diad sulat kinerew ton mangibaki so ari na saray sondalon ontulong ed sikato tan nipalimad sikato so bansa tan saray siudad.

¹⁹Sinulat to ray opisyal na saray sondalo ya inimbitaan to ran mikasakey ed sikato tan insipan ton itdan ira na pilak, balituk, tan saray arum a rigalo. Insan angibaki ed Gezer na pigaran totoo to, ta pateyen day Juan.

²⁰Imbaki to met ed Jerusalem iray arum a totoo to, ta oleyan da so Jerusalem tan say pokdul a kawalaay Timplo.

²¹Balet walay sakey a toon batik ed Gezer ya inonaan to ra may totoo nen Tolomeo. Imbalita tod kinen Juan so impamatey ed kinen ama to tan saramay agagi ton lalaki tan say impangibaki nen Tolomeo na saray sondalo ton mamatey ed sikato.

²²Ataktakot si Juan ed sayan balita, balet lapud apasakbayan, adakep tan apatey to ra may totoon nibaki a mamatey ed sikato.

²³Saray ginagawa nen Juan manlapud insalat tod kinen ama to: saray bakal ya akilabanan to, saray ginagawa ton manlapud sebeg na linawa, say impamasimbalo ton impamaalagey na saray padir, tan saray arum a ginagawa to,

²⁴et nisulat ira ed awaran na impanoley to a Pangulon Pari.