Read Pangasinan Say Ononan Libro na SARAY MACABEO 3 Bible Online

Say Ononan Libro na SARAY MACABEO 3 - Pangasinan bible

Say Ononan Libro na SARAY MACABEO 3

¹"Sinmalat ed kinen ama ton Matatias si Judas Macabeo.

²"Tinmulong ed sikato iray agagi ton lalaki tan amin a matoor a totoo nen ama to, tan maliket iran angituloy na bakal na Israel.

³"Baleg a kagalangan so impagamur nen Judas ed saray totoo to. Singa alan no akakawes na para bakal. Inala to ray armas to tan linman akibakal; inyagel toy kampo to diad panamegley na dilin ispada to.

⁴"Singa sakey a masebeg a lion a mangwam no ondogpa.

⁵"Inanap nen Judas iray anumlang na Ganggan tan pinoolan ton amin iray managpairap ed saray totoo to.

⁶"Diad gaway takot dad sikato, saray totoon mananumlang na ganggan et mambubuntonan iran manggiwgiw, tan ag da amtay nabatik-batik da. Diad panamegley na saray ginagawa to pinaaligwas toy bilay a walay kawayangan.

⁷"Ginawa ton makapasinagem so bilay na amayamay ya arari, balet liket so inter tod saray Israelita. Andi-anggaan ya idayew tayo, lapud saray ginagawa to.

⁸"Linlinmad saray baley na Judea tan dineral ton amin iray totoon anggapoy Dios da. Inekal tod Israel so makapasinagem a kairapan.

⁹"Kinmayat ed intiron mundo so inkabantug to, nen impantitipon to ray totoon napapatakod a napatey ira.

¹⁰Insan tinipon nen Apolonio iray sondalon Hintil, pati saray amayamay a sondalon walad Samaria, ta dogpaan da ray Israelita.

¹¹Nen nadngelan ya nen Judas, sinmulong a mibakal, tinalo to ray kalaban, tan pinatey toy Apolonio. Amayamay iray Hintil ya inaatey, tan batik iray nakdaan.

¹²Nen atipon iray asamsam ed bakal, inala nen Judas so ispada nen Apolonio tan inkana ton pibakal ya anggad agew na impatey to.

¹³Akabatan nen Seron a pangulo na saray sondalo na Siria a si Judas et nantipon na saray sondalon matoor, ta mibakal ira diad panangipangulo to.

¹⁴Si Seron kuantod sikaton-dili, Pagmaliwen kon bantug ed intiron impirio so siak a dili diad panalok ed kinen Judas tan saray totoo to ya ag da ikabkabilangan so ganggan na ari,

¹⁵Insan to inggapoy balon idogpad kinen Judas. Akikasakey ed sikato iray mabiskeg a sondalon anggapoy Dios da tan manggonaet iran ontulong ed sikaton ombawid Israel.

¹⁶Nen akasabi rad dalan na Bet-horon, pinmaway si Judas a kaiba to ray daiset a totoo to, ta onabet ira.

¹⁷Nen anengneng na saramay totoo nen Judas iray amayamay a sondalon onaasingger ya onlaban ed sikara, tinepet da, Panoy ilaban tayon dagdaiset a totoo ed saratan a sondalon dakerakel? Sakey ni, sanagew ti lan ag ni angan, tan naknaksawan ti la!

¹⁸Inmebat si Judas, Aliwan mairap a taloen na melag a grupo so baleg a grupo. Para Katawan, anggapoy doma no iyagel itayo na dakel a totoo odino daiset.

¹⁹Say panalod bakal et aliwan lapud karakel na sondalon mibakal; say pakayari na Katawan so panlalapwan na pananalo.

²⁰Pinasyan panagderal so taruk na saray kalaban tayon onsasabi ya onlaban ed sikatayo; getma ran samsamen iray kayaryan tayo tan pateyen da ray kaasawaan tayo tan saray anak tayo.

²¹Balet mibabakal itayo lapud pangyagel tayod bilay tayo tan say rilihion tayo.

²²No ondogpa itayo, mekmeken na Katawan iray kalaban tayo, kanyan ag kayo ontatakot ed sikara.

²³Kapangibaga nen Judas ed saya, sikato tan saray totoo to et bigla ran dinmogpa ed kinen Seron tan saray sondalo to, et sigput da ran tinalo.

²⁴Inosilan da rad leksab na Bet-horon ya anggad patar tan pinatey day sakey a walon lasus a totoo. Linmad Filistia iray akabatik.

²⁵Kayari to ya, tinmakot ed kinen Judas tan saray agagi to iray Hintil ed inerman a pasen.

²⁶Nadngelan nen Ari Antioco so inkabantug nen Judas, tan pitongtong na saray totoo so nipaakar ed Judas tan saray impanatalo to.

²⁷Nen nadngelan nen Antioco so agawa, mapalaloy petang na olo to. Ingganggan ton mantitipon ya amin iray sondalo ed impirio to.

²⁸Manlapud kayamanan na impirio, binayaran to ray sondalo na sakey taon a suildo ra tan ingganggan to ran mamparaan ed antokaman a biglan nagawa.

²⁹Balet asokayan ton naoput lay kuartad panagsinupan. Dinmaiset so napapaloob a buis, lapud gewgew tan saray gunigon ya impasabi tod mundo lapud impangekal tod saray ganggan ya abayag la ran natotombuk.

³⁰Dakel ni ray rigalon iiter nen Antioco nen saray akaonan arari, balet natan mapaga ta ompan ag to la ya nagawaan, odino ag la makagenap so gastosen toaminsan odino amidwa lan onyay agawa.

³¹Mapalaloy inkagunigon to; balet diad kaonuran ginetma toy onlad Persia, ta manala na saray buis ed saray luyag diman, pian dakel a kuartay nisempet to.

³²Tinoro toy Lisias, sakey a lakin bibirbiren ton apalaboan na ngaran a Kanayon na Ari, a gobirnador a mangasikaso na saray kimey na ari ed intiron pasen a nanleetan na Ilog na Eufrates tan say ketegan na Egipto.

³³Say ari impagmaliw to met si Lisias a managasikaso ed lakin anak ton Antioco a Kumalima, anggad ag to ipawil.

³⁴Impagmaliw ton makaoley si Lisias ed amin ya ilipanti tan say kapalduad saray sondalo to. Insan to indalatdat iray bilin ton nipaakar ed saray labay ton nagawa, nagkalalo lad labay ton nagawa ed saray manaayam ed Judea tan Jerusalem.

³⁵Niganggan ed kinen Lisias a mangibaki na saray sondalo ya onlaban ed saray Judio, nagkalalo lad saray Judion walad Jerusalem, pian napaandi toy pakayari ra tan naderal to ra, et anggapoy natilak a pakanudnunotan ed sikara.

³⁶Niganggan ed sikato ya alaen toy dalin da tan iter tod saray taga arum a bansa, ta panayaman da.

³⁷Nen taon 147 say ari pinmikal a nanlapud Antiokia a manonan siudad to; kaiba toy kapaldua na saray sondalo to. Binaliw toy Ilog na Eufrates tan bineltang toy Mesopotamia.

³⁸Pinili nen Lisias ira di Nicanor, Gorgias, tan Tolomeo a lakin anak nen Dorimenes a sikaray mangipangulo na saray sondalo; nayari ra yan talon lalaki tan naitdan iray ngaran a Saray Kakaaro na Ari.

³⁹Impasen to ran makaoley ed apataplon libon sondalo ya akaran tan piton libo ya akakabayo. Ingganggan to ran looban day dalin na Judea tan deralen da, onung na imbilin na ari.

⁴⁰Pinmikal ira yan pangulo tan saray sondalo ra; nen akasabi rad saray patar ya asingger ed Emaus, nankampo rad man.

⁴¹Akitipon ed sikara iray sondalon taga Idumea tan Filistia. Nadngelan na saray nigosianti ed saman a pasen so kinabiskeg na saman ya olup na sondalo, kanyan linma rad kampo a sankaawit da ray golunggolung tan dakerakel a kuarta, ta abaloan dan makasaliw ira na pigaran aripen a Judio.

⁴²Anengneng nen Judas tan saray agagi to a maniirap lan maniirap so kipapasen da, lapud nankampod saray ketegan da iray sondalo na arum a bansa. Akabatan da met ya ingganggan na ari a deralen a sigput iray totoon Judio.

⁴³Kanyan ginetma ran ipaalagey lamet so aderal-deral a bansa ra tan mibakal ira, pian niagel day bansa ra tan say Timplo.

⁴⁴Insan amin a totoo ed bansa et nantitipon iran namparaan a mibakal tan mikerew ed Dios na panangasi to.

⁴⁵Begtebegtew a singa kalawakan so Jerusalem; anggapoy toon akeraan odino linmoob ed siudad. Dinotakan na saray sangkaili so masanton Timplo, tan nankampod tirinsira na siudad iray Hintil; kanyan inmandi so liket ed saray totood Israel, tan anggapo lay narengel a togtog na musika.

⁴⁶Insan nantitipon si Judas tan saray totoo to tan sinmulong iran amaarap ed Mizpa a kasumbaliwan na Jerusalem, lapud wala nen saman dimay pasen a panangigalangan na saray Israelita.

⁴⁷Nanayuno ran sanagew ya agaylay ermen da, nankakawes iray sako, iniinan day kaoloan da na dapul, tan pinipilat day kawes da.

⁴⁸No saray Hintil so walad sayan kipapasen, nampanon la ra komun ed saray talintaoy diriyos da, balet nilokasan na saray Israelita so libro na Ganggan pian narumog day panangiwanwan na Dios.

⁴⁹Inawit da ray kawes na pari, saray onaan a naanin bagat, tan saray kakaplo, insan da intagar iray pigaran Nazareo ya akasumpal la na saray sipan da.

⁵⁰Nampikasi ya amin iray totoo, Katawan, antoy gawaen mid sarayan bengatla? Iner so pangyakaran mi,

⁵¹natan ta agatin-gatinan so masanton Timplo tan dinotakan na saray Hintil, tan maneermen ed kababaingan iray paparim?

⁵²Sinmabi ray Hintil ya ondogpan maneral ed sikami. Amtam so getma ran gawaen!

⁵³No ag mo kami tulongan, panoy pakalaban mid sikara?

⁵⁴Insan da pinaknul iray trumpita tan inmeyag iray makmaksil.

⁵⁵Kayari to ya, impagmaliw nen Judas a pigaran olup iray totoo to; wala ray asamplora, alimamplo, asanlasus, tan asanlibo, tan anoro na saray makaoley ed kapag olup.

⁵⁶Insan diad panangonur tod ibabagay Ganggan, pinasempet to ray kapankasal, saray kapangipaalagey day abung, odino saray kapantanem day kaubasan, tan saray natatakot.

⁵⁷Kayari to yan ginawa, kinmurang iray sondalo tan linmira ra ed niabalaten na Emaus,

⁵⁸tan diman inkuanen Judas: Mamparaan kayon mibakal tan pabiskeg yoy linawa yo! Nabwas na kabkabwasan, mantarya ki lan mibakal ed saratan a Hintil a nankakasakey na biskeg ya ondogpad sikatayo, pian napatey da tayo tan naderal day Timplo tayo.

⁵⁹Maung niy ompatey tayon mibabakal nen say manalalagey tayon anggapoy galagalaw tayo legan a bambantayan tayoy kadederal na bansa tan Timplo tayo.

⁶⁰Balet gawaen na Katawan so panliketan to.