Read Pangasinan Say Ononan Libro na SARAY MACABEO 4 Bible Online

Say Ononan Libro na SARAY MACABEO 4 - Pangasinan bible

Say Ononan Libro na SARAY MACABEO 4

¹"Intagar nen Gorgias so liman libo a sondalon akaran tan sanlibo ya akakabayon sondalo to a sankaraklan iray salsali, tan tinaynan day kampo nen labi.

²"Inwanwan ira na saray totoon manaayam ed tirinsira ed Jerusalem. Ninunot ton biglaan a dogpaan iray sondalon Judio,

³"balet akabatan nen Judas yan plano to. Kanyan pinmikal a kaiba to ray totoo to, ta dogpaan da ray sondalo na ari a wala rad Emaus,

⁴"legan ya arawid kampo si Gorgias tan saray kaiba ton sondalo.

⁵"Nen si Gorgias tan saray sondalo to et akasabi rad kampo di Judas ed saman a labi, arumog dan anggapoy tood man. Abaloan da ya ombabatik ira di Judas tan saray totoo to, kanyan ginapwan dan inanap ira ed kapalandeyan.

⁶"Diad palbangon sinmabid patar si Judas tan saray talon libon totoo to, ya aliwan amin ed sikara et dugay armas da.

⁷"Anengneng day ontan lan karakel na sondalon Hintil a marunong a mibakal, dugay armas da, tan apaliberan iray akakabayon sondalo.

⁸"Balet inkuanen Judas ed saray totoo to, Ag kayo mapagad karakel na saray sondalo ra, tan ag kayo natatakot no ondogpa ra.

⁹"Ag yo lilingwanan no panoy inkilaban na saray lalaki tayo diad Dayat ya Ambalanga nen oosilan ira na ari na Egipto tan saray sondalo to!

¹⁰Kerewen tayo natan ed Katawan a kasian to itayo. Pikasi tayo a sumpalen toy impisipanan tod saray lalaki tayo tan mekmeken to ra tan a sondalo no dogpaan tayo ra natan ed sayan agew.

¹¹Diad satan naamtaan na amin a Hintil a say Israel et walay Dios ton mangyagel tan mangilaban ed sikara.

¹²Nen anengneng na saray Hintil a mampaparaan a mibakal ira di Judas tan saray totoo to,

¹³pinmaway irad kampo ra ta mibakal ira. Insan pinaknul di Judas tan saray sondalo to iray trumpita ra

¹⁴tan dinmogpa ra. Agewgew iray Hintil tan batik irad patar,

¹⁵balet apatey ya amin iray atilak ed beneg. Inosilan na saray Israelita iray kalaban da ya anggad Gezer, diad saray patar na Idumea, tan diad saray baley na Asdod tan Jamnia. Talon libon amin so apatey dan kalaban da.

¹⁶Nen kayarin inmosil si Judas tan saray sondalo tan pinmawil la ra,

¹⁷inkuantod saray totoo to, Paolyan yo ni ray asamsam tayo. Wala nid asingger a kapalandeyan si Gorgias tan saray sondalo to, kanyan pinasya niy pibakal tayo. Nepeg tayo niy mampabiskeg a mibakal. Kayari to, nayari yo lan alaey labay yo ed saray asamsam.

¹⁸

¹⁹Nen nansusumpal nen Judas so pansasalita to wala ray ispian sondalo ed kapalandeyan ya inmosdung ira

²⁰tan anengneng da a batik iray kakaiba ra. Diad impakanengneng dad asewek, naamtaan da a napopoolan so kampo ra.

²¹Ataktakot irad impakanengneng dad saya tan nen anengneng dan walad patar iray sondalo nen Judas tan akaparaan iran mibakal,

²²batik irad Filistia.

²³Insan pinmawil si Judas ya angakokus ed saray atilak-tilak ed kampo; inaala to ray amayamay a balituk tan pilak, saray asul tan ambalangan abel, tan saray arum nin wadman a mabmabli.

²⁴Nen pinmawil ed dilin kampo ra iray Judio, nankanta ray imno: Say Katawan et manepeg a dayewen; mansiansian anggad angga so panangasi to.

²⁵Diad saman ya agew, baleg so impanalo na saray Israelita.

²⁶Saray sondalon akabatik et linma rad kinen Lisias tan imbalita rad sikatoy amin ya agawa.

²⁷Nen nadngelan nen Lisias ya atalod bakal iray sondalo to, atalagnaw tan kinmapoy so linawa to lapud ag atalo ray Israelita kanyan ag asumpal so ganggan na ari.

²⁸Diad ontombuk a taon, anipon si Lisias na anemaplon libon nipasapasal a sondalon akaran tan liman libo ya akakabayo, ta getma ton taloen iray Judio.

²⁹Linma rad Idumea, insan ira nankampo ed Bet-sur. Linman onabet ed sikara si Judas a kaiba to ray samplon libon lalaki.

³⁰Nen anengneng nen Judas so ontan lan biskeg na saray sondalon kalaban, nampikasi, Idayew mi ka, Manangilaban na Israel. Pinoter moy pakayari na alan diad panamegley na aripen mon David tan inabuloy mon tinalo nen Jonatan a lakin anak nen Saul tan say tobun-balon umaawit na armas to iray amin a sondalon Filisteo.

³¹Ontan met natan, panalom pa ray totoom ya Israelita ed saray kalaban da a singa ginawam nen saman. Ipelag mo pa rad kababaingan, anggaman ya ontan lay panagmatalek dad saray akaran tan akakabayon sondalo ra.

³²Patakot mo pa ra; paandim pay ipapangaya ran biskeg; pagiwgiw mo ra ed sankanengneng dan katalo ra.

³³Inaro mi ka tan gagalangen mi ka, kanyan abuloyan mo pan napatey mi ray kalaban mi pian nakantaan mi ka na saray dayew.

³⁴Ginmapo so bakal, tan diad impanlalaban dan lima-limaan sakey a liman libon totoo nen Lisias so apatey.

³⁵Nen anengneng nen Lisias a natatalo ray sondalo to tan nen anengneng toy ontan lan tepel na linawa nen Judas tan saray totoo to, ya impanengneng dan sipaparaan iran mambilay o ompatey a walay kagalangan, pinmawil lad Antiokia. Nantipon diman na saray inupaan a sondalo tan implano ton ompawil ed Judea ed arapen a panaon a kaiba toy lalon dakdakel a sondalo.

³⁶Inkuanen Judas tan saramay agagi ton lalaki, Natan ta atalo la ray kalaban tayo, onla tayod Jerusalem, ta linisan tayoy Timplo onung ed ganggan tan pasimbaloen tin isaklang ed Dios.

³⁷Kanyan nantitipon ya amin iray sondalo tan linma rad Palandey na Sion.

³⁸Nalmo rad man a nikaindan so Timplo, arotakan so altar, apoolan iray puirta, tinuboan na dikarika iray patio, tan nigeba ray kuarto na saray papari.

³⁹Lapud ermen da, pinipilat day kawes da, naneeyag iray makmaksil, iniitdan day dapul so kaolowan da,

⁴⁰tan dinmakmomo ran anggad dalin so lupa ra. Nen apaknul so trumpita a pangiter na tanda, tinmawag ed Katawan so balang sakey ed sikara.

⁴¹Insan ingganggan nen Judas iray pigaran sondalo to a dogpaan da ray totoo a walad tirinsira, legan a lilinisan toy Timplo.

⁴²Nampili na pigaran papari a manepeg tan matoluk ed Ganggan.

⁴³Nilinisan da may Timplo tan ineekal da ray baton arotakan onung ed ganggan tan imbabantak da rad marotak a pasen.

⁴⁴Nansisingbatan ira no antoy gawaen dad samay altar a panangisaklangan na saray bagat a popoolan a dinotakan na

⁴⁵saray Hintil onung ed ganggan. Nannononungan da a gebaen da may altar pian andi lad man a pakanudnunotan ed kababaingan da. Inggeba da sirin imay altar

⁴⁶tan inyan da ray bato ed manepeg a pasen, diad pokdul a kawalaay Timplo, a diman ira nisinup ya anggad iletaw na sakey a propita a mangibaga no antoy nepeg a gawaen.

⁴⁷Insan ira angala na saray baton ag tinabas, onung na ibabagay Ganggan nen Moises, tan amaalagey iray balon altar a kapara na samay daan.

⁴⁸Inapiger day paway tan dalem na Timplo tan insaklang dad Dios iray patio to.

⁴⁹Nanggawa ra na saray balon kagawaan ya ikanad pangigalang ed Dios tan inyakar dad Timplo so panangipatoonan na lamparaan, say altar a para insinso, tan say lamisaan a para tinapay.

⁵⁰Pinoolan day insinso ed tapew na altar tan sinelselan da ray lamparaan ed panangipatoonan, et awalaan na liwawa so dalem na Timplo!

⁵¹Inlira dad tapew na lamisaan iray tinapay, imbitin da ray kurtina, tan sinumpal day amin a kimey.

⁵²Diad kumaduamplo tan liman agew na kumasiam a bulan na Kislev, nen taon 148, sikatoy agew na impandotak na saray Hintil ed samay altar. Diad saman ya agew nisaklang ed samay balon altar so sakey a bagat onung ed Ganggan nen Moises. Nisaklang ed Dios imay balon altar tan akanta ray imno ya inolup na saray arpa, plauta, tan piangpiang.

⁵³

⁵⁴

⁵⁵Amin da ray totoo et dinmakmomon anggad dalin iray kalupaan da tan inggalang tan indayew day Katawan lapud impanalo to ra.

⁵⁶Waloy agew a pinistaan day impangisaklang lamet ed altar. Malikeliket iran angyakar na saray bagat a popoolan, tan angisaklang ira na saray bagat a para kareenan tan para pisasalamat.

⁵⁷Inarkosan da na saray balituk a korona tan saray balituk a samper so arap na Timplo, impaalagey da lamet iray puirta tan say kuarto da ray papari, tan pinepeketan da ra na kaput.

⁵⁸Natan ta nakal da lay kababaingan ya inter ed sikara na saray Hintil, nansilibra ra na baleg.

⁵⁹Insan si Judas, saray agagi ton lalaki, tan amin ya Israelita et impaakseb da so ganggan a say impangisaklang lamet ed altar et nepeg a silibraan a katekep na liket tan gayaga diad apasakey a panaon kapag taon, manlapud kumaduamplo tan liman agew na bulan na Kislev tan mansiansian waloy agew.

⁶⁰Insan ira angipaalagey na atagey iran padir tan mabiskeg iran tori diad kaliber-liber na Palandey na Sion, pian ag makaloob iray Hintil a manggatingatin tan mandotak-dotak lamet na siudad.

⁶¹Si Judas et angipasen na saray sondalod man a mangguardiad Timplo. Pinaliberan to met na padir so baley na Bet-sur, pian nawalaan iray Israelita na tirinsira ya akaarap ed Idumea.