Read Pangasinan Say Ononan Libro na SARAY MACABEO 5 Bible Online

Say Ononan Libro na SARAY MACABEO 5 - Pangasinan bible

Say Ononan Libro na SARAY MACABEO 5

¹"Nen nadngelan na saray kakaabay a bansa ya angipaalagey iray Judio na altar tan impawil day gendat a kipapasen na Timplo, mapalaloy pasnuk da,

²"kanyan ninunot da a deralen ya amin iray Judion manaayam ed pegley da. Kanyan ginapwan dan pateyen iray totoo tayo.

³"Saray taga Idumea et sasabaten da ray Israelita, kanyan linman mibakal ed sikara si Judas diad Akrabattene, tinalo to ra, tan sinamsaman to ra.

⁴"Binakal to met iray totoo ed Baean a lawas tatakotan ira na saray Israelita, lapud sasaneben da ray bumabiahin Israelita.

⁵"Kinolung tod saray tirinsira ra iray taga Baean, sinambaan ton pateyen ira, tan pinoolan to ray tirinsira ra a wadman ya akolung iray taga Baean.

⁶"Insan si Judas sinmulong a mibakal sumpad dalin na Ammon, a diman to nabet so baleg tan makapanyarin olup da ray sondalon ipapangulo na sakey a lakin manngaran na Timoteo.

⁷"Amimpiga-pigan tinalo to rad bakal, et sigput a tinalo to ra diad kaonuran.

⁸"Dinakep toy baley na Jazer tan saray kaliber-liber ton bario, insan amawil ed Judea.

⁹"Nantitipon ed Galaad iray Hintil, ta dogpaan tan deralen da ray Israelitan manaayam ed dalin da. Balet batik ed tirinsirad Datema iray Israelita.

¹⁰Tan angyakar iray sulat ed kinen Judas tan saray agagi to. Saya so logan na sulat: Saray Hintil ed kaliber-liber mi et mititipon irad sondalo nen Timoteo. Batik kami diad sayan tirinsira ya onsalimbeng, balet natan mampaparaan iran manakep ed kawalaan mi tan mamatey ed sikami.

¹¹

¹²Dakerakel la ray apatey ed sikami. Gali dia kari, ta iyagel yo kami.

¹³Amin da ray lalakin Judio a manaayam ed Tob et apatey ira; saray kaasawaan da tan saray anak da et adakep ira, tan nibatik ya amin iray kayaryan da. Sakey a sanlibon lalaki so apatey diman.

¹⁴Babasaen ni yan sulat nen sinmabi ray arum ya ibabaki a pinipilat da ray kawes da a pangipatnag na ermen da, a taruk day balita a nanlapud Galilea.

¹⁵Inkuanda, Saray sondalon taga Tolemaida, Tiro, Sidon, tan say intiron Galilea et sinmabi ran mamatey ed sikami.

¹⁶Nen nadngel yan amin nen Judas tan saray totoo, nantitipon iray amayamay a totoo ta aralen da no antoy nepeg dan gawaen ya itulong ed sarayan kabansaan da a nanairapan lapud panagdogpa na saray kalaban da.

¹⁷Inkuanen Judas ed agi ton Simon, Mamili ka na pigaran lalaki, ta iyagel yo ray kapara tayon Judio ed Galilea; onla kami nen Jonatan ya agi ta ed Galaad.

¹⁸Intilak nen Judas iray nakdaan a sondalo, ta sikaray mangguardiad Judea, tan impasen ton makaoley ed saray totoo iray duaran pangulo a di Azarias tan Jose a lakin anak nen Zacarias.

¹⁹Inkuantod sikara: Itilak ta kayon mangipangulo dia, balet ag kayo ompapaway a mibakal ed saray Hintil ya anggad ipawil mi.

²⁰Talon libon lalaki so akilad kinen Simon ya onlad Galilea tan walon libo so akilad kinen Judas ya onlad Galaad.

²¹Linmad Galilea si Simon tan amayamay so bakal ya akilabanan tod saray Hintil. Tinatalo to ra

²²tan inosilan to ra ya anggad siudad na Tolemaida; apatey toy sakey a talon libo ed sikara tan sinasamsaman to ra.

²³Insan to inaala ray Judion walad Galilea tan Arbatta, pati saray kaasawaan da, saray anak da, tan amin a kayaryan da, tan inawit to rad Judea. Lapud saya, baleg so liket da.

²⁴Diad sayan panaon, si Judas Macabeo tan si agi ton Jonatan et abaliw da lay Ilog na Jordan tan taloy agew iran binmeltang ed kalawakan.

²⁵Akabet ira na saray makaaron taga Nabatea ya angibagad sikara na amin ya agawad saray Judio diad Galaad.

²⁶Imbalita ra ya amayamay iray Judion apriso ed saray aliber na padir a siudad na Bozra, Alema, ma, Casfo, Maked, tan Karnaim,

²⁷balet apriso ray arum ed saray ankelag a baley na Galaad. Imbalita ra met a nankakasakey iray kalaban ya ondogpad ontombuk ya agew ed saray tirinsira da ray Judio, tan iilaloan dan napatey ya amin iray Judio ed saksakey ya agew.

²⁸Kanyan si Judas tan saray sondalo to et bigla ran amoliktar tan dinogpaan day Bozra a walad abay na dalan ed kalawakan, adakep da so baley, tan pinapatey dan amin iray totood man. Sinamsaman da so siudad, insan da pinoolan.

²⁹Tinmaynan irad man tan nankurang iran sanlabi ya anggad tirinsira ed Datema.

³⁰Nen palbangon anengneng di Judas tan saray totoo to so amayamay a sondalon ondodogpa ed tirinsira; ililira da ray takayan, saray plataporman panaglakub, tan saray panagbongbong na padir, pian nadakep da may tirinsira.

³¹Nen nadngel nen Judas so eyagan tan say tanul na saray trumpita a manlalapud siudad, naamtaan to la a ginmapo la so bakal,

³²kanyan inkuantod saray totoo to, Mibakal kayod sayan agew para saray kapara yon Judio!

³³Ingganggan ton nankatlon talonton ya onsulong iray totoo to tan dogpaan dad beneg iray kalaban da. Nen onsusulong ira, pinaknul da ray trumpita tan ineeyag day pikakasi ra.

³⁴Nen anengneng na saray sondalon ipapangulo nen Timoteo iray sondalo nen Judas Macabeo, pinmoliktar ira tan batik ira. Tinalo ra nen Judas tan pinatey tod saman ya agew so sakey a walon libon lalaki.

³⁵Insan tinmaynan diman si Judas, ta dinogpaan toy baley na Alema; adakep to tan pinatey ton amin iray totood man. Sinamsaman to may baley, insan to pinoolan.

³⁶Manlapud man linma tan dinakep toy Casfo, Maked, Bosor, tan saray arum a baley ed Galaad.

³⁷Kayari to ya, nantipon lamet si Timoteo na sondalo tan nankampo ra ed kasumbaliwan na Rafon, diad biek na sakey ya ilog.

³⁸Angibaki si Judas na pigaran totoo to a manispia ed kampo, et imbalita rad sikato nen kapawil da ya amin da ray Hintil ed saman a pasen et akitipon irad kinen Timoteo, kanyan dakerakel la ran sondalo.

³⁹Angupa si Timoteo na saray sondalon taga Arabia a mangibad sikato, tan nankampo ra ed biek na ilog ya akaparaan la ran ondogpa ed kinen Judas. Kanyan pinmaway si Judas tan inabet to ran pibakalan.

⁴⁰Nen asingger lay Judas tan saray sondalo to ed abay na danum, inkuanen Timoteo ed saray opisyal to, No ituloy toy kurang to tan baliwen toy ilog, ag tayo la napaer so idogpa to, et taloen to itayo.

⁴¹Balet no antakot tan ontondad biek na ilog, ombaliw itayon ondogpad sikato, et taloen tayo.

⁴²Nen asabi nen Judas so pandel na ilog, ingganggan to ray opisyal to ya ag da abuloyan ya ontonda so siopaman, no ag ingen dagdagen da so balang sakey a mibakal.

⁴³Si Judas so akaonan binmaliw ed ilog a mibakal ed saray kalaban, tan tinombuk na amin a totoo to. Agewgew iray Hintil a walad arap da, imbabantak da ray armas da, tan batik irad paganon timplo diad Karnaim.

⁴⁴Balet dinakep nen Judas tan saray totoo to so siudad tan pinoolan da may timplo, pati amin a totoon wadman. Lapud adakep la so Karnaim, ag la makalaban iray Hintil ed kinen Judas.

⁴⁵Insan tinipon nen Judas ya amin iray Judio a walad Galaad, ta awiten to ran amin ed Judea. Baleg ya olup ira a nandoroman klasin totoo, pati saray kaasawaan da, saray anak da, tan amin a kayaryan da.

⁴⁶Linma ra ya anggad Efron, sakey a baleg tan aliber na padir a baley. Ag nayarin onsaliberber ira ed anggan dinan a diking, no ag ta nepeg ya ondalan irad baley.

⁴⁷Balet ag ira palabasen na saray totood man; sinaraan da ingen na saray bato iray puirta na baley.

⁴⁸Sinulat ira nen Judas na pikakaaro. Onyay logan na sulat: Palabas yo kami pa ed baley yo, ta onsempet kami la. Anggapoy mandiwit ed sikayo; onlabas kami labat. Balet siansian ag da lokasan iray puirta.

⁴⁹Kanyan imbaga nen Judas ed balang sakey, likud ed saray lalakin mibabakal, a mankampo ra ed kawalaan da.

⁵⁰Saray totoon mibabakal et niganggan iran mamparaan ya ondogpa ed baley. Akibakal iran sangew tan sanlabi anggad adakep da may baley.

⁵¹Impapatey nen Judas ya amin iray lalaki ed Efron, sinamsaman day baley, tan pinalanas da. Insan si Judas tan saray totoo to et dinmalan irad baley diad tapew da ray bangkay.

⁵²Binaliw day Ilog na Jordan tan linma rad maawang a patar a kasumbaliwan na Betsan.

⁵³Legan dan nankurang ed ipawil da, tinitipon nen Judas iray akabatik a kalaban tan pinapabiskeg toy linawa da ray totoo, anggad impakasabi rad Judea.

⁵⁴Mapalaloy liket tan pisasalamat da diad intatdang dad Palandey na Sion. Insan angisaklang ira na saray bagat a popoolan, lapud anggapoy anggan sakey ya apatey tan akapawil iran amin.

⁵⁵Nen walad Galaad si Judas tan si Jonatan, tan si agi ran Simon et dodogpaan toy Tolemaida diad Galilea,

⁵⁶nadngelan di Jose tan Azarias a sikaray pangulo na saray sondalod Judea iray mabayanin impibakal da tan saray impanatalo ra.

⁵⁷Inkuandad sakey tan sakey, Mibakal tayod saray Hintil a walad kaliber-liber tayo, pian magmaliw ta met a bantug.

⁵⁸Kanyan sikara tan saray totoo ra et akibakal irad saray totood Jamnia.

⁵⁹Pinmaway ed baley si Gorgias tan saray totoo to, ta abeten da ran pibakalan.

⁶⁰Tinalo da ra di Jose tan Azarias tan inosilan da ra ya anggad saray ketegan na Judea. Sakey a duan libon Israelita so apatey ed saman ya agew.

⁶¹Agaway onyan baleg ya inkatalo, lapud saramay pangulon Judio et labay day magmaliw a palbayani tan ag da tinoluk si Judas tan saray agagi to.

⁶²Sakey ni, ag ira kabyangan na pamilya na saray Macabeo, a sikaray pinili na Dios a mangiter na kawayangan ed saray Israelita.

⁶³Balet si Judas Macabeo tan saramay agagi ton lalaki et baleg so impamagalang ed sikara na amin da ray Israelita tan amin da ray Hintil. Nen nadngelan na saray totoo so inkabantug da,

⁶⁴dakerakel a totoo so nantitipon a mangidayew ed sikara.

⁶⁵Insan akibakal si Judas tan saray agagi to ed saray taga Edom a walad abalaten. Dinogpaan toy Hebron tan saray kaliber-liber ton baley, dinederal to ray padir to, tan pinopoolan to ray tori ed kaliber-liber to.

⁶⁶Insan sinmulong ed dalin da ray Filisteo tan dinmalan ed Marisa.

⁶⁷Diad saman ya agew, dakel iray paparin apatey ed bakal lapud labay day magmaliw a palbayani, et akibabali ran pinmaway ya akibakal.

⁶⁸Inarap nen Judas so Asdod diad Filistia. Inggegeba to ray altar, pinopoolan to ray talintao na saray diriyos da, sinasamsaman to ray baley da, insan pinmawil ed Judea.