Read Pangasinan Say Ononan Libro na SARAY MACABEO 6 Bible Online

Say Ononan Libro na SARAY MACABEO 6 - Pangasinan bible

Say Ononan Libro na SARAY MACABEO 6

¹"Nen ondadalan ed Mesopotamia si Ari Antioco a Kumapat, nadngelan toy nipaakar ed sakey a siudad na Persia a tatawagey Elimais; bantug yan siudad lapud karakel na kayamanan ton pilak tan balituk.

²"Mayamyaman so timplo, ta wala rad dalem to iray balituk a samper, saray kawes a para bakal, tan saray armas ya intilak nen Alejandro a lakin anak nen Ari Felipe na Macedonia, a sikatoy onaan a manoley na Impirio na Grecia.

³"Linmay Antioco, ta labay ton looban so siudad tan samsaman, balet ag to ayarian, lapud saray totood man et akabatan da so plano to.

⁴"Impantitipon da ray sondalo a mibakal ed sikato. Kanyan mapalaloy ermen nen Antioco a pinmawil ed Babilonia.

⁵"Diad Persia walay sakey a managbalita ya akasabid sikato ya angipakabat na inkatalo na saray sondalon imbaki tod Judea.

⁶"Apasoot si Lisias tan saray mabayanin sondalo to ya ibatikan da ray Judio a natan et lalon apabiskeg ira na saray armas, saray abasto, tan saray asamsam dad saray tinatalo ran sondalo.

⁷"Inggeba na saray Judio imay bengatlan tatawagen da na Say Makapataktakot a Managderal ya impaalagey nen Antioco ed tapew na altar ed Jerusalem. Pinaliberan da met na atagey a padir so Timplo a singa nen saman. Adakep da met so baley na Bet-sur, sakey ed saray dilin baley na ari, tan pinaliberan da na padir.

⁸"Nen nadngel na ari so sayan balita, ag akaskasel tan mapalaloy inkatalagnaw to, kanyan ontan lay ermen ton naogip lapud ag asumpal iray inilaloan to.

⁹"Abayag a naninagem, tan nakalay ilalo. Abirbir tod satan a magano lan ompatey.

¹⁰Tinawag ton amin iray initdan toy ngaran na Kakaaro na Ari tan kuantod sikara, Ag ak makaogip tan nalmay so pusok lapud ermen tan paga.

¹¹Diad inmona tinepet kod siak a dili no akin et onya lay pakakaermenan ko, anta mapangasi ak tan labalabay ak na totoo legan na panooley ko.

¹²Balet anunotan ko ray ginagawak a makapoy diad Jerusalem nen inalak ya amin iray pilak tan balituk a kagawaan ed Timplo tan sinalik a pateyen, anggaman ya anggapoy manepeg a makasengeg, iray manaayam ed Judea.

¹³Amtak a sikara yay makasengeg no akin et agawad siak ira yan makapasinagem a bengatla tan ngalngali ak la ompatey a nakalay ilalo ya diad sayan ag ko bansa.

¹⁴Insan to tinawag si Felipe a sakey ed saray napanmatalkan ton mananimbawa, tan impasen ton makaoley ed intiron impirio.

¹⁵Inter tod sikato so korona to, say kawes to, tan say singsing na ari, tan initdan toy pakaoley a mambangat ed anak ton Antioco a Kumalima tan mangiparaan ed sikaton manari.

¹⁶Inatey diman si Ari Antioco nen taon 149.

¹⁷Nen akabatan nen Lisias ya inatey lay ari, ginawa ton ari ya onsalat ed kinen ama to si malangwer nin Antioco. Pinabaleg nen Lisias si Antioco tan natan nginaranan to na Eupator.

¹⁸Legan to ya, saray kalaban ed tirinsira diad Jerusalem et sasaraan da ray Israelita diad pasen a kaliber-liber na Timplo; lawas da ran gugunigonen tan tutulongan iray Hintil.

¹⁹Kanyan si Judas ginetma ton pateyen ira. Tinawag ton amin iray totoo, ta looban day tirinsira.

²⁰Nantitipon iray totoo tan imparaan day iloob da nen taon 150. Nanggawa ra na saray plataporman panlakob tan saray panagbongbong na padir.

²¹Balet akabatik iray pigaran lalakin walad dalem na tirinsira, kanyan linma rad ari a kaiba da ray pigaran Judio ya akigampid sikara. Inkuandad ari,

²²Anggad kapigay panalagar mon ombawi ed agawgawad saray kabansaan mi?

²³Akaparaan kami nen saman a manlingkur ed kinen amam, ontoluk ed saray bilin to, tan ononur ed saray ganggan to.

²⁴Balet anton kamaungan so agunggona mi? Saray kabansaan mi et nagmaliw la ra natan a kalaban mi. Diad tuay tua amayamay la ray pinapatey dad sikami diad inermay pakalmoan dad sikami, tan tinatakew da ray kayaryan mi.

²⁵Aliwan sikami labat so papairapen da; dinodogpaan da ray amin a kakaabay dan bansa.

²⁶Natan dodogpaan dan looban so tirinsira ed Jerusalem tan getma ran dakepen. Pinaliberan da met na padir so Timplo tan say baley na Bet-sur.

²⁷No ag ka onggalaw a tampol, mapalalo ni so gawaen da, et ag la ra nayarian a patondaen.

²⁸Nen nadngel ya na ari, mapalaloy pasnuk to. Impantitipon ton amin iray pangulo na saray sondalo, saray opisyal da ray sondalon akakabayo, tan saray panmamatalkan ton sumisimbawa.

²⁹Angupa met na saray sondalon taga arum a bansa tan saray isla na Grecia.

³⁰Say karakel da et sanlasus libon sondalon akaran, duamplon libon akakabayo, tan talomplo tan duan ilipantin nipasal a mibakal.

³¹Say ari tan saray sondalo to et dinmalan irad Idumea tan imparaan day idogpa rad Bet-sur, a dimay abayag dan akibakalan. Nanggawa ray panagbongbong na padir tan saray plataporman panaglakob, balet masebeg ya akibakal iray kalaban da, pinmaway irad baley, tan pinoolan da ra may plataporman panaglakob.

³²Insan si Judas pinataynan tod tirinsira ed Jerusalem ira may sondalo to tan inlira toy kampo to ed Bet-Zacarias, a diman to sabaten iray onsusulong a sondalo na ari.

³³Diad kabkabwasan na ontombuk ya agew, say ari ginanatan ton inyalis iray sondalo to diad dalan a mamaarap ed Bet-Zacarias, a diman namparaan a mibakal iray sondalo to tan amaknul na saray trumpita.

³⁴Impanparaan da met a mibakal ira may ilipanti diad panamegley na impangipanengneng da na tabul na ubas tan tabul na moras.

³⁵Nibunog ed saray sondalon akaran ira may ankakabaleg ya ayep. Sanlibon lalaki ya akaarmas na golunggulong tan akahilmit na gansa so angolup na sakey ya ilipanti. Kapag ilipanti et inolup met na liman lasus a nidomadoma ran sondalon akakabayo,

³⁶a sikara lawas so katambayan na ilipanti.

³⁷Nisinger a malet ed beneg na kapag ilipanti so sakey a mabiskeg tan atirinsiraan a kiew a plataporman panaglakob. Taloran sondalo so akalogan ed beneg na kapag ilipanti, likud ed kutsiro.

³⁸Inlira nen Lisias iray arum a sondalon akakabayo diad duaran diking na saray sondalon akaran, pian niagel ira na saray sondalon akakabayo legan dan dodogpaan iray kalaban.

³⁹Saray gansa tan balituk a samper et impakaninag dad kapalandeyan so liwaway agew, kanyan singa ra mandarlang a nipotan a silew.

⁴⁰Wala ray sondalo na ari a pinmanat irad nipokdul ya alusadsar na palandey tan wala met iray sondalo a pinmanat irad patar a dalin, balet maoksuy so impankurang dan amin.

⁴¹Napalaloy inkataktakot na amin a totoo nen nadngel day pankakkling na saray mantutupaan ya armas tan say pankukurang na saramay amayamay tan makapanyarin sondalo.

⁴²Sinmulong a mibakal ira di Judas tan saray sondalo to, et akapatey iran tampol na anem a lasus a sondalo na ari.

⁴³Nen anengneng nen Eleazar Avaran a say sakey ed saray ilipanti et baleg nen saray arum tan asalimbengan na saray kawes na arin para bakal, abaloan ton wadman so ari a manloglogan.

⁴⁴Insaklang nen Eleazar so bilay to a pangilaban ed saray kadalaan to tan pakala toy andi-anggaan a kinabantug.

⁴⁵Mapuspuson batik ed kawalaan na samay ilipanti a walad pegley na sakey ya olup na akaran a sondalo. Sinmulong tan pinapatey to ray walad nikawanan tan nikawigi to, kanyan sinmener ed nantopag a diking to iray sondalon kalaban.

⁴⁶Sinmilong ed samay ilipanti, insan to sinakal ya anggad ag to apatey. Atumbaan na samay ilipanti, kanyan inatey.

⁴⁷Balet nen abirbir na saray Judio so ontan lan kabiskeg na saray sondalo na ari tan ontan lan sebeg dan mibakal, sinmener ira.

⁴⁸Say ari tan saray sondalo et sinmulong iran mibakal ed saray Judio diad Jerusalem tan imparaan day idogpa rad intiron Judea tan Jerusalem.

⁴⁹Akikaarod saray Judio et Bet-sur, insan ira tinmaynan. Anggapoy magenap a kanen da ed baley, pian nayarian dan sumpaen so iloloob na kalaban. Taon na panagpainawa ed saman, kanyan anggapoy tanaman a nitanem.

⁵⁰Sinakop na ari so Bet-sur tan angipasen na saray sondalon mangguardiad man.

⁵¹Insan to nilakob so Timplo tan abayag ton lolooban. Angilira na saray plataporman panaglakob, saray panagbongbong na padir, saray kagawaan a pangibasyo na apoy tan bato, tan saray arum a kagawaan a pangitupak na pika tan ankabaleg a bato.

⁵²Saramay mangyaagel et nanggagawa met iray kagawaan ya ikana rad pibakal ed saray kalaban, kanyan abaybayag so bakal.

⁵³Balet anggapo lay atilak a kakanen ed saray kuarton panagsinupan diad Timplo, lapud taon na panagpainawa ed saman. Saramay totoon imbatikan da ray Hintil tan sinmalimbeng ed Judea et inoput day kakanen a nisinup diman.

⁵⁴Mapalaloy inkulang na kakanen, kanyan amayamay a totoo so pinmapawil lad kaabungan da. Dagdaiset a lalaki so atilak ed Timplo.

⁵⁵Legan to ya, si Felipe, a tinoro nen Ari Antioco kasakbayan ya inatey a panaralen ton magmaliw ya ari so anak ton laki,

⁵⁶et pinmawil a nanlapud Persia tan Media. Pinmawil a kaiba to ray sondalo na ari tan implano ton sikatoy mambenben na oley. Nen nadngelan nen Lisias yan balita,

⁵⁷tampol a namparaan ya ompikal. Inkuantod samay malangwer nin ari, saray opisyal to, tan saray totoo to, Inagew-agew ya onkakapoy itayo; kulang lay abasto tayo, tan mabiskeg yay pasen a lolooban tayo. Insan sakey ni, wala ray nepeg tayon arigloan a kimey ed gobirno.

⁵⁸Kanyan natan mipaknaan tayo lad saray Judio tan say intiron bansa ra a mankakaaro ti la.

⁵⁹Abuloyan tayo ran mangonur na saray dilin ganggan da tan saray kaogaliyan da, a singa ginagawa ra nen saman. Ginmapogapo yan gulo nen pinapetang tayoy kaoloan da diad impamaandi tayod saray ganggan tan saray kaogaliyan da.

⁶⁰Sayan kanunotan et apaknaan na ari tan saray opisyal to, kanyan si Lisias imbaga tod saray Judio so pankakaaro ra, et apaknaan da met.

⁶¹Nen sinambaan na ari tan saray opisyal to a sumpalen day impipaknaan da, pinmaway ira may Judio ed tirinsira ra.

⁶²Balet nen linmoob so ari ed pasen a kawalaay Timplo diad Palandey na Sion tan anengneng ton mabiskeg a tirinsira iman a pasen, binenegan toy salita to tan ingganggan ton igeba iray padir ed kaliber-liber na Timplo.

⁶³Insan nangganat a tinmaynan tan pinmawil ed Antiokia. Nalmoan tod man a manooley ed siudad si Felipe. Dinogpaan na ari imay siudad, et adakep to.