Read Pangasinan Say Ononan Libro na SARAY MACABEO 8 Bible Online

Say Ononan Libro na SARAY MACABEO 8 - Pangasinan bible

Say Ononan Libro na SARAY MACABEO 8

¹"Nadngelan nen Judas so nipaakar ed saray taga Roma tan say inkabantug dan makapanyari ran sondalo. Amta to a maliket iran mangawat ed saray labay da so migampid sikara tan andi-duaruwan kakaaro na Roma iray ondagod sikara.

²"Imbagad sikato na saray totoo so nipaakar ed saray bakal ya akilabanan na saray taga Roma tan saray mabayanin ginagawa ra ed saray taga Galia a tinalo da ra tan pinasoot da ran mambayar na buis.

³"Nibagad sikato so ginagawa ra ed Espanya nen adakep da ray minas na pilak tan saray minas na balituk diman.

⁴"Lapud inapiapiger a panagplano tan panagseet da, adakep day intiron bansa, anggaman ya arawi ed Roma. Tinatalo da ray ararid arawid pasen a linmalaban ed sikara; mapalaloy impanalo rad sikara, kanyan tinaon a mambayar na buis iray akapaliis ed patey.

⁵"Binakal tan tinalo ray Felipe tan Perseo ya ararid Macedonia, tan amin ya akigampid sikaran linmaban ed Roma.

⁶"Tinalo da met ya anggan si Antioco a Matalonggaring ya ari na Siria a dinmogpad sikara a taruk toy sanlasus tan duamplon ilipanti, saray sondalon akakabayo, saray karwahi, tan saray makapanyarin sondalo.

⁷"Dinakep dan mabilay so ari tan pinasoot da tan saray sinmalat ed sikato a mambayar na dakel a buis, mangiter na totoon pamasengegan na panumpal na labay da, tan mangisuko na

⁸"India, Media, Lidia, tan saray pigaran sankaabigan a dalin da. Inaala da ra ya, insan da ra inter ed kinen Ari Eumenes.

⁹"Nen implano na saray Grigo a dogpaan tan pateyen da ray taga Roma,

¹⁰akabatan da yan komplut, kanyan angibaki ra na sakey a pangulo na saray sondalo a mibakal ed sikara. Amayamay a Grigo so pinapatey na saray taga Roma, inaala dan priso iray kaasawaan da tan saray anak da, sinasamsam da ray kayaryan da, nanaaayaman day dalin da, inggegeba da ray tirinsira ra, tan ginagawa da ran aripen, ya anggad natan.

¹¹Pinapatey da met odino impagmamaliw dan aripen iray arum a nanarian, saray isla, tan amin a linmalaban ed sikara.

¹²Balet impansiansia ray pikakaaro dad saray akigagampid sikara tan saray impapaiyagel ed sikara. Pinasuko da ray ararid asingger tan arawin pasen tan tinmakot ya amin iray akadngel na kipapasen da.

¹³Tinutulongan dan nagmaliw ya ari iray arum a totoo, balet ineekal da ray arum; nagmaliw iran makapanyari ed sankamundoan.

¹⁴Anggaman ya onyay agawa, anggapoy taga Roma a sinali toy mampatulod kipapasen to diad pangisulong to na korona odino saray kawes na ari.

¹⁵Anibokel ira na sakey a sinado, tan inagew-agew a nantitipon iray talon lasus tan duamplon sinador, pian natongtong da so nipaakar ed kabibilay na saray totoo tan say pankaabigan da.

¹⁶Tinaon ya impalima rad sakey a laki so panoley ed sikara tan pangikurang na intiron dalin. Tinmoluk so amin a too ed sayan laki, tan anggapoy ibeg odino imon ed sikara.

¹⁷Pinili nen Judas si Eupolemo a lakin anak nen Juan tan apo nen Accos, tan si Jason a lakin anak nen Eleazar, tan imbaki to ra ed Roma, ta migawaan iray paknaan na pikaaro tan pigampi rad saray taga Roma.

¹⁸Ginawa to ya, pian naandi so panamairap na saray taga Siria, bangta anengneng a malinew na saray Judio a magmamaliw la ran aripen.

¹⁹Kayari na andokey tan mairap ya impanbiahi di Eupolemo tan Jason, akasabi rad Roma tan linmoob irad Sinado. Onyay inkuandad saray sinador:

²⁰Si Judas Macabeo, saray agagi to, tan amin a Judio et imbaki da kami dia, ta mipaknaan kamin manaagegalan itayo, pian nibilang kamin kakaaro yo tan kagampi yo.

²¹Inawat na saray taga Roma imay imbaga ran paknaan

²²tan say onggendan so kopia na sulat a nitatak ed saray tapyak a gansa tan nipawit ed Jerusalem, pian walay pakanengnengan na saman a paknaan:

²³Andi-anggaan komun a maung so kipapasen na bansa na saray taga Roma tan say bansa na saray Judio diad dalin tan diad dayat! Ag ira la komun nawalaan na saray kalaban tan ag la ra komun mibakal!

²⁴Balet no walay mangigapon mibakal ed Roma odino dinanman a kagampi ton bansa,

²⁵say bansa na saray Judio et impuspuson tulongan da, onung na nakaukolan a gawaen.

²⁶Onung ed ginawan paknaan ed Roma, saray Judio et ag ira mangiter na abasto, armas, kuarta, odino bapor ed saray mibabakal ed Roma. Nepeg a gawaen na saray Judio so kanepegan da tan ag da ilaloay mangawat na tumang.

²⁷Ontan met, no walay ononan mibakal ed bansa na saray Judio, saray taga Roma et impupuson tulongan da, onung na nakaukolan a gawaen.

²⁸Onung ed ginawan paknaan ed Roma, ag ira mangiter na abasto, armas, kuarta, odino bapor ed saray kalaban na saray Judio. Nepeg a gawaen na saray taga Roma so kanepegan da tan ag ira mampalikdo.

²⁹Sikara yay nampaknaan na saray taga Roma tan saray Judio.

³⁰Balet no diad arapen a panaon et pantongtongan da a walay iyarum odino bawasen ed sayan paknaan, sumpalen da so nantotongtongan da, tan walay belat na antokaman ya iyarum odino ekalen da.

³¹Sakey ni, nipaakar ed saray makapoy a gagawaen nen Ari Demetrio sumpad saray Judio, sikatoy sinulat mi na onggendan, Akin et mapalaloy pamapairap mod saray Judio a kakaaro tan kagampi mi?

³²No idalem da ka nin maminsan ed sikami, tulongan mi ra tan mibakal kamid sika diad dalin tan diad dayat.