Read Pangasinan Say Kumadwan Libro na SARAY MACABEO 10 Bible Online

Say Kumadwan Libro na SARAY MACABEO 10 - Pangasinan bible

Say Kumadwan Libro na SARAY MACABEO 10

¹"Diad panangipangulo na Katawan abawi nen Judas Macabeo tan saray mananombuk to so Timplo tan say siudad na Jerusalem.

²"Inggegeba da iray altar ya impaalagey na saray sangkaili diad tindaan tan dinederal da ray arum a nipaalagey a pasen a panangigalangan.

³"Nilinisan da so Timplo onung ed ganggan tan angipaalagey ira na balon altar. Insan diad panamegley na balon apoy a pinmaway diad impanggasgasan na bato, angibagat ira a sikatoy onaan a bagat da kasumpal na duay taon, nampool iray insinso, sinelselan da ray lamparaan, tan inlira da ray tinapay.

⁴"Kayari da yan ginawa, tinmiklab ira tan impikasi ran say Katawan et ag to lan balut iyabuloy a nadalan ira lamet na onman iran desyang. Kinerew dad sikato a kasian to ra no dusaen to ra, lapud saray kasalanan a nagawa rad arapen a panaon tan ag to la ra ipalima ed pakayari na saray maruksa tan paganon Hintil.

⁵"Pinasimbalo ran insaklang so Timplo diad kumaduamplo tan liman agew na bulan na Kislev; sikato ya may agew tan bulan a saray Hintil et ginawa ran aliwan masanto so Timplo.

⁶"Waloy agew so maliket ya impansilibra ra, a singa say Pista na saray Abung-abung, tan anunotan na saray totoo ya aganggano ni so impamalabas day Pista na saray Abung-abung a sikaray mantatawataw ed kapalandeyan a singa ra ayayep tan manaayam irad saray ongib.

⁷"Balet natan, sankaawit da ray birdin sanga na saray palmira tan saray sangay kiew ya inarkosan na saray bolung na yirda, nanlilibot ira, nankakanta ray pisasalamat tan panangidayew ed Dios ya angyabuloy a nalinisan onung ed ganggan so dilin Timplo to.

⁸"Nampapaknaan na amin a totoo a nepeg a silibraan a tinaon na intiron bansa so sayan pista.

⁹"Asabi lay pangangga na saray agew nen Antioco Epifanes.

¹⁰Natan salitaen mi so nipaakar ed Antioco Eupator ya anak na sayan toon anggapoy Dios, tan iter miy segek na saray kaogsan ya inter na saray bakal ya impangulo to.

¹¹Nen sikatoy ari, tinoro toy sakey a toon manngaran na Lisias a sikatoy makaoley ed kimey na gobirno tan sikatoy manonan gobirnador na Baleg a Siria.

¹²Sinaltan toy Tolomeo Macron a sikatoy onona-onan gobirnador a maung so impanengneng tod saray Judio. Maumaung so impisiglaotan nen Macron ed saray Judio, pian nasalatan na kamaungan iray kakapoyan ya agawgawad sikara.

¹³Lapud saya, linmad kinen Eupator iray Kakaaro na Ari tan inakusa ran traidor ed bansa to si Macron, lapud inkaindan toy isla na Chipre ya inmatalek ed sikato nen Ari Filometor na Egipto, tan akigampid kinen Antioco Epifanes. Diad tuay tua, amin a totoo et tinawag dan traidor si Macron. Ag to la napansiansiay galang a manepeg ya iter ed sikato lapud betang a bebembenan to, kanyan nambikkel diad impaninom to na samal.

¹⁴Nen nagmaliw a gobirnador na Idumea si Gorgias, anogyup na saray sondalon inupaan tan dinogpaan to ray Judio kapag walay pankanawnawa to.

¹⁵Aliwan saya labat, no ag ingen saray Idumeo et walad silong na pakayari so pigaran pinilin pasen tan naynay so panataktakot dad saray Judio. Maliket dan inaawat iray ontataynan a manlapud Jerusalem tan ginawa ray anggaay nayarian da a lawas walay kabakal na saray Judio.

¹⁶Kanyan kayarin kinmerew na tulong ed Dios si Judas Macabeo tan saray totoo to, bigla ran pinmaway tan pinaspasya ran dinogpaan iray tirinsira da ray Idumeo.

¹⁷Pinapasoner da ray angyagel na saray padir tan adakep da ray tirinsira, tan pinapatey dan amin iray narumog dan totoo, a sakey a duamplon libo ran amin.

¹⁸Balet sakey a siam a libon kalaban so akasalimbeng ed duaran mainomay ya iyagel a tirinsira, a wadman ya amin so nakaukolan da, anggaman a nalakob iran mabayag.

¹⁹Nakaukolan ya onlad arum a lugar na bansa si Judas, saray lugar a lalo niy pankaukolan dad sikato, balet intilak to ra di Simon tan Jose, pati si Zakeo tan saray totoo to. Dakel ni ra yan sondalo, kanyan nayarian dan ituloy imay panlalakob da,

²⁰balet maagom iray pigaran totoo nen Simon. Nen naitdan iray anemaplon kilon pilak, inabuloyan dan makabatik a manlapud saramay tirinsira iray pigaran kalaban.

²¹Nen nadngelan nen Judas imay agawa, impantitipon to ray pangulo na saray sondalo to tan inakusa to ra man a totoo a sikaray angilako na saray kadalaan da diad impangibolus dad saray kalaban da a nayarian da lamet so onlaban ed sikara.

²²Insan to impapatey ira may traidor tan adakep ton tampol ira may duaran tirinsira.

²³Lawas anatalo ed bakal si Judas. Diad indogpa tod saramay duaran tirinsira, akapatey na masoluk a duamplon libon totoo.

²⁴Si Timoteo ya aminsan a tinalo la na saray Judio, et nantipon na amayamay a sondalon akakabayo a taga Asia tan dakerakel a sondalon inupaan. Onsusulong natan ya ondogpa ed Judea, pian nadakep to.

²⁵Balet legan ya onsasabi ray kalaban a sondalo, nampikasi ed Dios si Judas tan saray totoo to. Nankawes ira na sako, ininan day dabuk so kaoloan da,

²⁶tan tinmikleb irad saray balitang na altar. Kinerew dad Dios a tulongan to ran mibakal ed saray kalaban da, onung na insipan tod Ganggan to.

²⁷Kayari ran nampikasi, inaala ray armas da, linma rad pasen ya arawid Jerusalem, tan nampalabas iray labi diad asingger ed saray kalaban da.

²⁸Diad kaimbwasan, saramay duaran olup na sondalon mankalaban et nambabakal ira. Saray Judion sondalo et nanmatalek ira ed sebeg da tan diad ilalo ran panaloen ira na Katawan, balet saray kalaban da et nanmatalek ira ed karunongan dan mibakal na pinasya.

²⁹Nen kaksilan na bakal, anengneng na saray kalaban so limaran guapon lalakin manloglogan ed saray kabayon balituk so rinda ra tan mangipapangulo ed saray sondalon Judio.

³⁰Pinaliberan na sarayan linmaran lalaki si Judas, ikakana ray dilin kawes dan para bakal a pagyaagel ed sikato tan iyooran dad saray kalaban iray pana tan kirmat. Nikelawan tan agewgew ed satan iray kalaban, kanyan abuybuyak ira, et tinatartar ira na saray Judio.

³¹Saray inaatey a kalaban et duamplon libo tan liman lasus a sondalon akaran tan anem a lasus ya akakabayo.

³²Akabatik si Timoteo ed malet ya inkaguardiaan a tirinsira ed Gezer, a si agi ton Kereas so pangulod man.

³³Diad loob na apat agew, maseseg si Judas tan saray totoo to a nanlakob ed samay tirinsira.

³⁴Balet saramay totoo ed dalem et nanmatalek irad kinabiskeg na kawalaan da, kanyan nambabando ra na amin a klasin anagasang a panamabaing ed saray Judio tan say Dios da.

³⁵Diad palbangon na kumaliman agew, duamplon totoo nen Judas, diad gaway petang na olo ra lapud saramay panamabaing a nadngel da, et masebesebeg dan kinalab so padir tan andi-panangasin pinatey day balang sakey a toon nabet da.

³⁶Diad saman met a bekta, kinalab na saray arum iray padir ed biek na tirinsira tan pinoolan da ray tori. Amayamay ed saray kalaban so inatey ya apoolan legan a kinmayamkam so pool. Say kumatlon olup na saray sondalo et inggeba ra iray puirta tan pinaloob da ray arum a totoo nen Judas a manakep na siudad.

³⁷Inmamut ed dalem na bobun si Timoteo, balet pinatey da a pati si agi ton si Kereas tan si Apolofanes.

³⁸Nen asumpal yan agawa, sinilibraan na saray Judio so impanalo ra diad impankakanta ra na saray imno tan saray kansion a pangiter na pisasalamat ed Katawan, ya angiter ed sikara na baleg a panangasi tan pananalo.