Read Pangasinan Say Kumadwan Libro na SARAY MACABEO 12 Bible Online

Say Kumadwan Libro na SARAY MACABEO 12 - Pangasinan bible

Say Kumadwan Libro na SARAY MACABEO 12

¹"Nen asumsumpal so paknaan na pankakaaro na saray Judio tan saray taga Siria, pinmawil ed ari si Lisias, tan pinmawil ed dadalusan da iray Judio.

²"Balet saray pigaran gobirnador a di Timoteo tan Apolonio a lakin anak nen Gennio, Jeronimo tan Damopon et ag da ra labay a pambilayen ed kareenan; ontan met so ginawa nen Nicanor a pangulo na saray sondalon inupaan a taga Chipre.

³"Diad sarayan panaon, saray taga Jope et nanggawa ra na maruksan bengatla ed saray Judion walad siudad da. Nankonkonwanan iran kaaro da ray Judio tan inimbitaan da ra tan saray kabyangay pamilya ra ya onlogan ed saray bapor ya imparaan da, ta mambaroy irad dayat.

⁴"Bangta nampapaknaan yan gawaen na amin a totood baley, ag balut anginap ira may Judio, kanyan inmabubon ira a pangipanengneng day kaabigay linawa ra. Balet nen wala la rad dayat impalner na saramay taga Jope ira may duan lasus a Judio.

⁵"Kadngel nen Judas ed sayan inaayep ya agawad saray kapara ton Judio, impakabat tod saray totoo to so agawa.

⁶"Kayari ran nampikasi ed Dios a matonung a huis, dinogpaan da ra may managpatey na too. Nen sakey a labin ag da ra nanengneng, pinoolan dan amin iray bapor ed daungan, tan pinatey dan amin iray totoon arumog dan onaamut diman.

⁷"Akatalak iray puirta na siudad, kanyan pinmoliktar lay Judas; balet getma ton ompawil ed arum a panaon, ta pateyen ton amin iray manaayam diman.

⁸"Nangelan nen Judas ya iplaplano na saray taga Jumnia a pateyen da met iray Judion manaayam ed siudad da.

⁹"Kanyan dinogpaan tod labi so Jamnia, tan pinoolan toy daungan tan saray bapor diman. Sankanengneng ed Jerusalem so apoy, anta talomplo tan duan kilomitro so kaarawi tod man.

¹⁰Nen si Judas tan saray totoo to et sakey a duaran kilomitro so kaarawi rad Jamnia diad pibakal dad kinen Timoteo, dinogpaan ira na masoluk a liman libon Arabe a kaiba ray liman lasus a sondalon akakabayo.

¹¹Pinasyan bakal so agawa, balet lapud pananulong na Dios tinalo da ra man a totoon akar-akar ed kalawakan, a kabekta et akikaaro ra lamlamang ed saray Judio. Insipan da ya itdan da ray Judio na saray ayayep tan insipan da met a tulongan da ra diad panamegley na arum iran polaing.

¹²Inmabubon a mikaarod sikara si Judas, ta ninunot ton say pikakaaro ra et nayarin ikanad amayamay a pamaakaran; kayari to ya, pinmawil ed saray tulda ira may Arabe.

¹³Dinogpaan met nen Judas so Caspin, say malet tan aliber na padir a siudad. Alauk a Hintil iray totoon manaayam diman.

¹⁴Nanmatalek irad biskeg na saray padir da tan maniilalo ran magenap so nisimbom a pambilay da legan na kalakob da. Kanyan niluludlurey da si Judas tan saray totoo to, ineeyag da ray salitan panamabaing ed sikara tan inaayew da so Dios da.

¹⁵Balet nampikasi ra may Judio ed Makapanyarin-amin a Katawan na sansinakuban ya angigeba na saray padir na Jerico diad saramay agew nen Josue, anggaman ya ag nikana iray panagbongbong na padir odino saray armas a panlakob. Insan pinaspasya ray indogpa rad samay padir,

¹⁶et lapud linawa na Dios, adakep da may siudad. Diad karakel na totoon pinapatey na saray Judio, say asingger ya ilog, a say kaawang to et sakey a kakatlo na kilomitro, et singa napno na dala.

¹⁷Manlapud siudad na Caspin, nankurang si Judas tan saray totoo to na sakey a siamaplo tan siam a kilomitro ya anggad akasabi rad Caraca a panaayaman na saray Judio tan asingger ed siudad na Tob.

¹⁸Balet ag da nalmod man si Timoteo, lapud tinaynan to la man a lugar. Anggapod man so agawaan to, likud ed impangitilak tod sakey a pasen na mabiskeg a tirinsira tan saray sondalo.

¹⁹Saray duaran panguloy sondalo nen Judas, a di Dositeo tan Sosipatro, et dinogpaan da may tirinsira tan pinatey dan amin iray samplon libon totoo a nipasen diman.

²⁰Insan impankapiga nen Judas ya olup iray sondalo to, tan impasen ton pangulo na sansakey ya olup ira di Dositeo tan Sosipatro. Ginanatan dan inosilan si Timoteo a walay sanlasus tan duamplon libon sondalo ton akaran tan duan libo tan liman lasus a sondalo ton akakabayo.

²¹Nen akabatan nen Timoteo ya oosilan nen Judas, pinaona tod siudad na Karnaim iray bibii tan saray ogogaw a sankaawit da ray balkut da. Sankairapan a lakoben odino sabien so Karnaim, lapud mainget a tuloy iray dalan a mamaarap diman.

²²Balet diad bektan nanengneng la ra may onaan ya olup na saray sondalo nen Judas, agewgew ira may sondalon kalaban, lapud sakey a pasingayew ya impanengneng na Dios a sankanengneng toy amin a bengatla. Diad gaway takot da, ag da amtay abatik-batik da tan amayamay ed sikaray agugatan na saray ispada na dilin kakaiba ra.

²³Kanyan si Judas tan saramay totoo to et pinaspasya ran inoosilan ira may kalaban, tan akapatey ira na masoluk a talomplon libo.

²⁴Adakep si Timoteo na saramay sondalo di Dositeo tan Sosipatro. Balet masilib a tuloy, kanyan apanisia to ra ya amayamay iray priso to a kakanayon na saray Judio tan pateyen da ra no walay nagawad sikato.

²⁵Nen insipan ton pasempeten to ray kakanayon da tan anggapoy maoges a nagawad sikara, imbolus da.

²⁶Insan dinogpaan nen Judas so siudad na Karnaim tan say timplod man na diosan Atargatis, et akapatey na duamplo tan liman libon totoo

²⁷tan sigput ton dineral so siudad tan say timplo. Insan to dinogpaan so aliber na padir a siudad na Efron a panaayaman nen Lisias tan saray totoon manaayam diman a nanlapud amin a bansa. Sipaparaan a nanalagey ed arap na saray padir iray mabiskeg a lalakin tobun-balo tan masebeg iran akilaban; tan nisinup iray amayamay ya abasto tan armas ed dalem na siudad.

²⁸Balet saray Judio et kinmerew ira na tulong ed Katawan a mamopoter na pakayari da ray kalaban to. Kanyan adakep da may siudad tan apatey day sakey a duamplo tan liman libon totoo.

²⁹Manlapud man nangganat iran linmad siudad na Betsan, a walomplon kilomitro so kaarawi tod baybay na Jerusalem.

³⁰Saray Judiod man et imbaga rad kinen Judas so ontan lan kinamaung ed sikara na saray totood saman a siudad, nagkalalo la no panaon na kairapan.

³¹Kanyan akisalamatan nen Judas tan saray kakaiba to iray totood man tan kinerew ton ituloy day kamaungan dad saray Judio diad arapen a panaon. Insan ira amaarap ed Jerusalem, tan akasabi ra nen magano lan onsabi so Pista na Panagani.

³²Kayari na Pinticostis (a sikatoy tawag ed salitay Grigo na Pistay Panagani) ginanatan nen Judas tan saray totoo to so linman mibakal ed Gorgias a gobirnador na Idumea,

³³ya inabet to ra na talon libon sondalon akaran tan apat a lasus ya akakabayo.

³⁴Diad sayan bakal ya agawa, pigaran Judio iray apatey.

³⁵Insan si Dositeo, sakey a Judion taga siudad na Tob tan sakey a makapanyarin kumakabayo, et siningkat tod kawes si Gorgias, insan to inggayugoy diad biskeg to, ta labay ton naerel a mabilay iman ya andi-kakanaan a too. Balet biglan say sakey ed saray kumakabayon taga Tracia et binmatibatik a dinmago, tan pinotut toy taklay nen Dositeo, kanyan akabatik ed siudad na Marisa si Gorgias.

³⁶Abayag la natan a mibabakal iray Judion ipapangulo nen Esdrin tan naknaksawan la ra. Kanyan nampikasi si Judas ya ipanengneng na Katawan a kagampi to ra tan sikatoy mangipapangulo ed saray sondalo ra.

³⁷Insan legan nen Judas a mangakantad dilin salita to na eyag na pibakal, biniglaan na saray Judio a dinogpaan si Gorgias tan saramay totoo to, et pinabatik da ra.

³⁸Kayari na bakal, inwanwan nen Judas ed baley na Adulam iray totoo to. Agew ed saman na kasakbayan na Agew na Panagpainawa, kanyan nilinisan day sikaran dili onung na kaogaliyan na saray Judio, insan da nginilinan so masanton agew.

³⁹Diad ontombuk ya agew, nakaukolan a tiponen da ray bangkay na totoon apatey ed bakal tan ikotkot da ra ed saray lobuk na pamilya ra.

⁴⁰Balet diad dalem na kawes na kapag bangkay akarumog ira na saray ankekelag a talintao da ray diriyos a gagalangen ed Jamnia; isesebel na Ganggan ya isolung ira ya na saray Judio. Naamtaan ed satan na amin a totoo so inateyan na saraman a lalaki.

⁴¹Kanyan indayew da iray kagagawa na Katawan, say matonung a huis a mangipapaamtad saray bengatlan akaamut.

⁴²Kinerew dad sikato a napaandi lan sigput komun iyan kasalanan. Insan si Judas a matalonggaring a too et impurpurek tod saray totoo ya arawian day kasalanan, ta anengneng dan dili so agawad saramay totoon nankasalanan.

⁴³Akiala met na kuarta ed saray totoo to, tan masoluk a sakey tan kapalduan kilon pilak so atipon to. Impaiyakar to ya ed Jerusalem, pian nikana ed pangisaklang na bagat a para kasalanan. Ginawa nen Judas yan kamaungan, lapud manisia ed kiolid bilay na saray inaatey.

⁴⁴No ag to anisia a napaolid bilay iray inaatey, inaambagel tan andi-kakanaan komun so pangipikasid sikara.

⁴⁵Lapud malet tan masimoon a pananisia nen Judas ya amin a matoor a totoo na Dios et makaawat ira na makapakelaw a tumang, sikatoy angisaklang na bagat a para kasalanan, pian nabolus ed kasalanan da ira may inaatey.