Read Pangasinan Say Kumadwan Libro na SARAY MACABEO 13 Bible Online

Say Kumadwan Libro na SARAY MACABEO 13 - Pangasinan bible

Say Kumadwan Libro na SARAY MACABEO 13

¹"Nen taon 149, akabatan nen Judas Macabeo tan saray mananombuk to a si Antioco Eupator et onsasabin kaiba toy amayamay a sondalo, ta dogpaan day Judea.

²"Akabatan da met a kaiba to si Lisias a managasikaso ed ogaw ya ari tan pangulo na gobirno to. Grigo ra so sondalo to, a say bilang da et sanlasus tan samplon libon sondalo ya akaran, tan liman libo tan talon lasus a sondalon akakabayo; kaiba ra met so duamplo tan duan ilipanti, tan talon lasus a karwahi a wala ray matmatdem a tarem ya akapeket ed saray dalig da.

³"Si Menelao, diad impananamut toy pankanawnawa tod sayan nagagawa, et akigampid sikara tan pinabiskeg toy linawa ra, aliwan lapud imamasakit toy pankaabigan na bansa, no ag ingen lapud iilaloan ton napaletan so kipapasen ton Pangulon Pari.

⁴"Balet say Dios ya Ari na saray arari et impanpasnuk to na mapalalo si Antioco ed kinen Menelao. Pinaneknekan nen Lisias ed kinen Antioco a si kriminal a Menelao so sengegan na amin da ray gunigon to. Lapud saya, ingganggan nen Antioco ya iyakar ed siudad na Berea si Menelao tan sikatoy pateyen, onung na panagpatey dad man.

⁵"Diad saman a siudad, walay tori a say kaatagey to et sakey a duamplo tan talon mitro. Napno na dapul tan walad kaliber-liber na dalem to so singa imbudon pakaroskosan ya ondapod samay dapul.

⁶"Saray totoon asintinsiaan a nanggaway kaogsan sumpad saray diriyos odino arum ni ran ambelat a kasalanan et niakar irad man tan nibontuk irad dapul, tan diman la ra ompatey.

⁷"Onmay impamatey dad kinen Menelao, ya ag anggan nipompon,

⁸"onung ed kanepegan to. Naynay ton dinodotakan, onung ed ganggan, so masanton dapul na apoy ed altar ed Timplo, kanyan inatey natan ed dapul.

⁹"Intuloy nen Ari Antioco so maruksan idodogpa tod Juda, tan walay plano ton lalon maoges ni nen si ama to so gawaen tod saray Judio.

¹⁰Nen akabatan ya nen Judas, imbaga tod saray totoo a mampikasi ran labi-agew ed Katawan, ta nayarin nabalang da so Ganggan da, say bansa ra, tan say masanton Timplo ra. Ag ni asali nen saman so pankaukolan da natan na tulong tan panangyagel na Dios ed sikara,

¹¹pian ag napelag ed pakayari na saray anggapoy Dios a Hintil so bansa ran aganggano nin nipawil ed gendat a kipapasen to.

¹²Taloy agew ya anggapoy arum a ginawa na saray totoo no ag say impantitikleb dad dalin, say impanaayuno ra tan impanaakis da, tan say impankekerew day panangasi na Katawan. Insan nansalita si Judas a pamabiskeg toy linawa ray totoo, tan ingganggan ton mamparaan a mibakal.

¹³Kayari to ya, akitongtongan a bukor nen Judas iray pangulo na saray Judio tan nampapaknaan da a diad pananulong na Dios onsulong iran mibakal ed ari, nen say alagden dan onsabi si Antioco ya onloob ed Judea tan manlakob ed Jerusalem.

¹⁴Impalima nen Judas ed Manamalsa na mundo so kasumpalay bakal, insan to pinabiskeg so linawa da ray totoo to a masebeg iran mibakal tan maabuloy iran ompatey, lapud pangyagel dad saray ganggan da, say Timplo, say Jerusalem, say bansa ra, tan say intiron panagbilay da. Nankampo ra ed abay na siudad na Modin.

¹⁵Imbaga nen Judas ed saray totoo to so eyag na pibabakal, Manlalapud Dios so Pananalo. Diad saman a labi sikato tan saray pinilin sankasebegan a tobun-balon sondalo to et dinogpaan day pasen ya asingger ed tulda na ari, tan pinatey da so duan libon kalaban. Dinoyuk da met ya anggad ag inatey so manonan ilipanti tan say akalogan.

¹⁶Mapalaloy inkataktakot na amin da ray walad kampo tan agewgew ira nen si Judas tan saray totoo to et tinmaynan la ran analo

¹⁷kasakbayan na palbangon. Agawa yan amin lapud tulong tan panangyagel na Katawan.

¹⁸Sayan impakasali lad sebeg na saray Judio et nagnap lan akapaneknek ed kinen Antioco a nepeg toy mananap na magmaung a polaing a pakadakep ed kawalaan da ray Judio.

¹⁹Dinogpaan to so mabiskeg a tirinsira na saray Judio ed Bet-sur, balet amimpigan apasoner tan atalod kaonuran.

²⁰Nampapawit si Judas na abasto ed saray mangyaagel ed samay tirinsira,

²¹balet walay sakey a sondalon Judio a manngaran na Rodoco ya angibagad saray kalaban na bengatlan iyaamut. Balet nalmoan ed ginawa to, kanyan pinatey da.

²²Pinidwa na ari so impanali ton mipaknaan ed saray totood Bet-sur, et nen akapampapakna ra, pinataynan to ray sondalo to. Insan dinogpaan to si Judas, balet atalo lamet.

²³Legan to yan panaon, atilak ed Antiokia si Felipe a mangikurang ed gobirno, balet akabatan nen Ari Antioco a linmaban si Felipe. Ag amta nen ari so gawaen to, kanyan inggapo toy mitongtong a mikaaro ed saray Judio, akipaknaan ed saray labay da, tan insipan ton kaptekan so gawaen tod sikara. Diad pangigapo toy paknaan, angibagat si Antioco, angiter na mabonbonluk a rigalon pangipanengneng toy panamagalang tod Timplo,

²⁴tan malikeliket ton inawat si Judas Macabeo. Kayari to man, tinoro na ari si Hegemonides a gobirnador na pasen a nanleetan na saray siudad na Tolemaida tan Gerar,

²⁵insan linman dili ed Tolemaida. Mamapasnuk iray totood man, lapud impipaknaan tod saray Judio. Diad gaway ontan lan pasnuk da, labay dan naandiay kakanaan imay paknaan.

²⁶Balet nampaliwawad karaklan si Lisias; ginawa toy anggaay nayarian ton angyagel ed samay paknaan. Nen apareen to la ray totoo tan apanisia to la ran dugay imbaga to, pinmawil lad Antiokia. Diad onya, say indogpa nen Ari Antioco et nagmaliw ya insoner.