Read Pangasinan Say Kumadwan Libro na SARAY MACABEO 14 Bible Online

Say Kumadwan Libro na SARAY MACABEO 14 - Pangasinan bible

Say Kumadwan Libro na SARAY MACABEO 14

¹"Kalabas na taloy taon, akabatan nen Judas tan saray totoo to a si Demetrio a lakin anak nen Seleuco et nambaroy tan sinmakbit ed daungan na Tripolis a kaiba to ray makapanyarin sondalo tan say sakey ya olup na saray bapor.

²"Nibalita a pinatey toy Ari Antioco tan si Lisias a managasikasod sikato, tan ooleyan toy bansa.

³"Walay sakey a toon manngaran na Alcimo a Pangulon Pari nen saman balet maliket ton inagamil so panagbilay na saray Grigo legan na bakal a sumpad gobirno. Diad impakapikabat ton ag to la nayariay magmaliw lamet a Pangulon Pari tan diad takot tod nayarin gawaen ed sikato na saray Judio,

⁴"linma ed kinen Ari Demetrio nen taon 151. Diad sayan inyakar to, inyawat tod ari so sakey a balituk a korona tan sakey a sangay palmira tan pigaran sangay oliba, a sikaray naogaliyan ya ipaparontal ed Timplo, balet anggapoy sinalita to nipaakar ed saray plano to.

⁵"Balet ag abayag, awalaan na pankanawnawan mangigapo na saray inaambagel a plano to, nen tinawag nen Demetrio a mitongtong ed saray sumisimbawa to tan tinepetan to no antoy gegetmaen a gawaen na saray Judio. Inkuanen Alcimo,

⁶"Saray mananombuk nen Judas Macabeo et ipapasen day sikaran dili a matoor tan maaro ed bansa ra; labalabay day mibakal tan sosogsogan da lawas iray totoo ya onlaban ed gobirno tan ag da labay a manari so kareenan ed bansa.

⁷"Kasalanan da so ag ko la pambebemben na mapagalang a betang a Pangulon Pari, say betang a kanepegan ko lapud kakanaan na nianakan kon boleg. Wadya ak natan,

⁸"a say manonan makasengeg et say pangisasakit kod pankaabigan mon ari, balet nununoten ko met so pankaabigan na saray kabansaan ko, ta saray andi-kabaliksan a ganggan nen Judas tan saray mananombuk to et mangiiter na makapasinagem a kairapan ed intiron bansa.

⁹"No say Kagalang kon Ari et asokayan to lan amin iray bengatlan nipaakar ed sayan pamaakaran, ipangasim a gawaen mo, onung ed gendat a panangasi tan inkabonluk mo, so antokaman a makapaandi na panamairap ed bansa mi tan saray totoo to.

¹⁰Legan a mabilay si Judas, ag nayarin balut a makapanari so kareenan ed bansa mi.

¹¹Katonda nen Alcimo a nansalita, inalan tampol na saray arum a sumisimbawa so pankanawnawa ran mamapetang na olo nen Demetrio sumpad kinen Judas, ta kabosul da met si Judas.

¹²Kanyan tinoron tampol nen Ari Demetrio si Nicanor, say pangulo na saray sondalon akalogan ed ilipanti, a manggobirnador na Judea, tan imbaki tod man

¹³a sankaawit toy ganggan a mamatey ed kinen Judas, mangibuybuyak ed saray mananombuk to, tan manggawad kinen Alcimo a Pangulon Pari na sankatalonggaringan a Timplo ed intiron mundo.

¹⁴Amin da ray sangkailin imbatikan day Judea lapud saray dogpa nen Judas, et ginanatan day akigampid kinen Nicanor, lapud abaloan dan pankaabigan da so katalo odino kagunigon na saray Judio.

¹⁵Nadngelan na saray Judio a si Nicanor et ondodogpa tan ontutulong ed sikato iray sangkailid bansa ra. Kanyan iniinan day laman da na dabuk tan nampikasi rad Dios da, a sikatoy amilid bansa ra a kayaryan tod ando lan ando tan ag nin balut amaolyan ed sikara diad pankaukolan da.

¹⁶Insan ingganggan ira nen Judas a pangulo ra, et tampol a kinmurang iran mibakal ed saray kalaban da diad asingger ed bario na Adasa.

¹⁷Milalaban ed kinen Nicanor si Simon ya agi nen Judas, balet mankalkalnan natatalo lapud ag inilaloan a galaw na saray kalaban.

¹⁸Balet nen nadngelan nen Nicanor so ontan lan sebeg tan tepel na linawa nen Judas tan saray totoo to ed pilalaban da makasengeg ed bansa ra, ninunot to ya aliwan diad panamegley na bakal so pangapiger ed sayan pamaakaran.

¹⁹Kanyan imbaki to ra di Posidonio, Teodoto, tan Natatias, ta mipaknaan ira ed saray Judio.

²⁰Nen asumpal lan amiy nakaukolan nipaakar ed samay paknaan na pankakaaro, imbalita nen Nicanor so agawa, et nankakasakey iran inmabubon.

²¹Insan nigetar so sakey ya agew a mambukbukor a mantotongtong ira may pangulo. Nipaway ed balang kampo iray yorungan a para sirimonya tan nilira ra.

²²Diad panalwar nen Judas, angilirad saray pinilin pasen na saray sondalon sipaparaan a mibakal, ta ag la pigan mantraidor iray kalaban. Balet marakep so impantongtong na saramay duaran pangulo.

²³Kayari to ya, nanayam nin agano si Nicanor ed Jerusalem. Ag ton balut nanggaway makapoy ed saray Judio, tan pinasempet to la ra may totoon akigampid sikato.

²⁴Nagmaliw a sankaaron malet ira di Judas tan Nicanor, tan mabetbet a kaolup nen Judas si Nicanor.

²⁵Tinanggoyur nen Nicanor si Judas a mangasawa tan mampamilya la. Ginawa ya nen Judas tan nambilay ed mareen a panamaley.

²⁶Nen naimano nen Alcimo so kamaung na panoolup nen Nicanor tan si Judas, akialay kopia na samay paknaan, insan linmad kinen Ari Demetrio. Imbaga tod ari ya aliwan matoor ed gobirno si Nicanor, lapud tinoro ton onsalat ed sikato si traidor a Judas.

²⁷Lapud sarayan tila-tilan dalem, mapalaloy impakapasnuk na ari, kanyan sinulat toy Nicanor. Imbaga ton aliwan maliket ed agawan paknaan, tan ingganggan ton erelen toy Judas Macabeo tan ibaki ton tampol ed Antiokia.

²⁸Nen sinmabi yan sulat ed kinen Nicanor, nilikna to tan ag to amtay gawaen to, lapud ag to labay a naderal so impipaknaan tod toon sinumpal toy kanepegan tod paknaan.

²⁹Balet ag to nayarian a sumpaen so ganggan na ari, kanyan ginapwan toy nananap na polaing a pakaerel tod kinen Judas.

³⁰Naimano balet nen Judas a magmamaliw lan magasal tan aliwliway pipiolup nen Nicanor ed sikato, et amta to a makapoy yan tanda. Kanyan tinipon toy amayamay a mananombuk to tan inmamut ira.

³¹Nen abirbir nen Nicanor a dinaeg nen Judas ed kasiliban, linmad matalonggaring tan masanton Timplo nen mangibabagat iray papari tan ingganggan to ran isuko rad sikato si Judas.

³²Balet sinambaan na saramay papari ya ag da amtay panaamutan nen Judas.

³³Insan inyatagey nen Nicanor so kawanan a lima to ed kawalaay Timplo tan sinambaan ton inkuan, No ag yo ipalimad siak a priso si Judas, ipalanas kod dalin yan Timplo na Dios, deralen ko yan altar, tan diad sayan pasen mangipaalagey ak na mapagalang a timplo nen Dionisio.

³⁴Insan tinmaynan si Nicanor. Tampol a saray papari et inyatagey da ray lima ra ed tawen tan nampikasi rad Dios a matoor a Manangyagel na bansa tayo:

³⁵Katawan, anggapoy nakaukolan mo, balet nanliket kan mangipaalagey na Timplom dia tan manayam ed pegley mi.

³⁶Bukor mo so masanto, tan aganggano nin alinisan onung ed ganggan so Timplom, kanyan iyagel mo pan andi-angga so kasantosan to.

³⁷Say sakey a lakin pangulo ed Jerusalem, a manngaran na Razis, et apaoges ed kinen Nicanor. Nibaga a tinulongan to ray kapara ton Judio diad amayamay a polaing tan diad mapalalon panamagalang dad sikato, atawag ya Ama na saray Judio.

³⁸Nen agano niy inggapo na laban a sumpad gobirno, imposta toy bilay to lapud Judaismo tan asalaysay ed korti lapud inkatoor to.

³⁹Labay ya ipanengneng nen Nicanor so ontan lan ag to panlabay ed saray Judio, kanyan angibaki na masoluk a liman lasus a sondalon mangerel ed kinen Razis,

⁴⁰ta abaloan ton say pakaerel ed kinen Razis et mamakapoy ed saray Judio.

⁴¹Ngalngali la nadakep na saray sondalo so tori a nila nen Razis. Papasooten dan lokasan so puirtan mamaarap ed patio, tan niganggan a poolan so kaput. Abirbir nen Razis ya ag to la makabatik, kanyan sinali toy mambikkel diad panamegley na ispada to,

⁴²ta nilabay toy ompatey a walay kagalangan nen say naleglemew ed lima da ray totoon maoges.

⁴³Lapud inkataranta to, ag to niasigta so segkal na ispada to, et ag inatey. Kanyan nen amayamay a sondalo so onloloob ed kuarto, batik ed padir tan tinmabuy a singa masebeg a bayani diad kawalaan da ray totoo ed leksab.

⁴⁴Masiglat a sinmoner ira may totoo, kanyan dinmapo ed pasen a tinaynan da.

⁴⁵Mabilay nin siansia, tan diad mapalalon inkapuso to, binmangon tan binmatik a linmabas ed pegley da ray totoo to insan kinmalab ed atagey a baton-dampay.

⁴⁶Naoput lan tinmoroy dala to ed sayan bekta, balet inaksut ni na duaran lima to iray pait to insan to imbantak ed saray totoo. Legan to yan gagawaen, impikasi tod Katawan na bilay tan ingas ya ipawil to ra yad sikato. Onya so impatey nen Razis.