Read Pangasinan Say Kumadwan Libro na SARAY MACABEO 15 Bible Online

Say Kumadwan Libro na SARAY MACABEO 15 - Pangasinan bible

Say Kumadwan Libro na SARAY MACABEO 15

¹"Akabatan nen Nicanor a walad lugar na Samaria si Judas tan saray totoo to, kanyan ginetma ton dogpaan ira ed sakey ya Agew na Panagpainawa, pian aliwan maatap so bilay to.

²"Saray Judion apasoot a mangolup ed saray sondalo to et kinerew dad sikato ya ag to sumpalen komun itan a maruksa tan inaayep a plano to, no ag ingen ngilinan to so agew a pinagalangan na Dios a nanenengneng toy amin a bengatla tan ginawa ton sankasantosan ed amin da ray agew.

³"Insan si Nicanor, a sankaabebaay kipapasen a pinalsad tapew na dalin, et tinepet to no walay manoley ed tawen ya ingganggan to ran mamagalang ed Agew na Panagpainawa.

⁴"Inmebat iray Judio, On; say mabilay a Katawan a manooley ed tawen et ingganggan to kamin pagalangan miy Agew na Panagpainawa.

⁵"Balet inmebat si Nicanor, Siak so manoley ed tapew na dalin, tan igaganggan ta kayon ala yo ray armas yo tan toluk yo ray ganggan na ari. Balet, ag nampalabo si Nicanor ed maruksan plano to.

⁶"Diad inkalangas nen Nicanor, inlastug ton mangipaalagey na monuminto a pamagalang tod panalo tod kinen Judas.

⁷"Balet matalek si Judas a sikatoy tulongan na Katawan,

⁸"kanyan tinanggoyur to ray totoo to ya ag ira ontatakot ed saray kalaban da. Pinabiskeg toy linawa ra tan imbaga ton ag da lilingwanan no panoy impanulong ed sikara na Dios a Makapanyarin-amin nen imbeneg iran panaon tan nepeg ya ilaloan da a panaloen to ra lamet natan.

⁹"Pinasimbalo toy ilalo ra diad panamegley na impangibasa tod sikara na nisulat ed Ganggan tan saray ibabaga da ray Propita tan diad impangipanunot tod sikara na saray bakal ya anataloan da.

¹⁰Nen akaparaan lan mibakal ira may totoo to, ingganggan to ra tan impalinew to met ed sikara ya ag napanmatalkan iray Hintil, lapud ag dan balut susumpalen iray impipaknaan da.

¹¹Initdan ton amin iray totoo to na saray armas, aliwan lapud pananggoyur ed sikara a manmatalek irad saray samper tan saray pika, no ag ingen lapud pamabiskeg toy linawa ra diad panamegley na saray mapuson balikas. Niligliwa to met ira diad panamegley na impangibaga toy nipaakar ed kogip to, sakey a pasingayew a napanmatalkan da.

¹²Imbaga tod sikara a nipasingayew ed sikato si Onias a Pangulon Pari nen saman, sakey a toon matalonggaring, makapakelaw, mapaabeba, tan mauyamo. Maung a manalita tan nibangat manlapud impanogaw to no panoy pambilay a masimpit. Si Onias, ya akaonat iray lima to et ipipikasi toy intiron bansa na saray Judio.

¹³Insan anengneng nen Judas so sakey a toon matalonggaring ya ampoti lay buek to tan baleg so kagalangan tan pakayari to.

¹⁴Inkuanen Onias: Sikato yay propita na Dios a si Jeremias, ya inaro to ray kapara ton Judio tan dakel iray pikakasi ton para sikatayo tan saray Jerusalem a masanton siudad.

¹⁵Insan inonat nen Jeremias so kawanan a lima to tan inter tod kinen Judas so sakey a balituk ya ispada. Inkuanto legan ton idederew,

¹⁶Rigalo na Dios yan masanton ispada. Alam a pamatey mod saray kalaban mo.

¹⁷Saray mabekas a salita nen Judas et akatanggoyur ya onsebeg iran amin, tan apagmaliw to ray lalakin tobun-balo a mibakal iran tuan lalaki. Walad kaatapan so siudad da, say rilihion da, tan say Timplo ra. Kanyan saray Judio et tinibokel dad kanunotan da ya ag la ra manaabala, no ag ingen masebeg da lan dogpaan iray kalaban tan matalek dan amtaen so kapalaran da diad lima-limaan a laban.

¹⁸Lalo ni so pangimamasakit dad masanton Timplo ra nen say pangimamasakit dad saray dilin pamilya ra tan saray kakanayon da.

¹⁹Saray totoon nepeg day natilak ed Jerusalem et mapagpaga ra no antoy pansumpalan na bakalan ed patar.

²⁰Tatalaranan na amin a totoo no siopay manalo ed bakal. Onsusulong la ray sondalon kalaban, a walad balang dapag da iray akakabayon sondalo, tan nilirad saray pinilin pasen iray ilipanti.

²¹Si Judas Macabeo ninmengneng ed karakel na saray kalaban a sondalo, saray nandororoman armas da, tan saray masesebeg ya ilipanti ra. Insan to inyonat ed tawen iray lima to tan nampikasid Katawan a managgaway milagro, lapud amta to a panataloen na Katawan iray manepeg a panaloen, aliwan saray mabiskeg iray sondalo ra.

²²Inkuanen Judas: Nen arid Juda si Ezekias, imbakim so anghil mo ya amatey na sanlasus, walomplo tan liman libon totoo nen Ari Senakerib.

²³Natan, Katawan na tawen, ibakim pa lamet so maung ya anghil mo a mamapayegpeg tan mamagiwgiw ed saray kalaban.

²⁴Diad panamegley na baleg a pakayarim, patey mo pa ra yan totoo a nampapaoges ed sika tan pinmaway ya ondogpa ed saray pinilim a totoo. Insan la dia intonda nen Judas so pikakasi to.

²⁵Si Nicanor tan saray sondalo to et nankurang ira legan a napapaknul iray trumpita tan nakakansion iray kantan para bakal,

²⁶balet si Judas tan saray totoo to et sinmulong iran mibakal legan ya onkekerew iray tulong na Dios.

²⁷Kanyan diad panamegley na saray lima ran akibakal tan saray puso ran nampikasi ed Dios, apatey na saray Judio so masoluk a talomplo tan liman libo a sondalon kalaban. Agaylay impisalamat da lapud tulong ya inter na Dios!

²⁸Nen asumpal so bakal tan onsesempet la ran malikeliket lapud impanalo ra, naimano ray Nicanor ya akasolung na kawes ton para bakal a mandokdokul ya inatey ed bakalan.

²⁹Insan diad panamegley na makmaksil iran eyag, indayew day Katawan ed dilin salita ra.

³⁰Si Judas Macabeo, a lawas akibakal diad intiron laman tan kamarerwa to para saray kapara ton Judio tan ag ton balut abalang so panangaro tod bansa nanlapud impanogaw to, et ingganggan to ray totoo to a potuten day olo nen Nicanor tan say kawanan a taklay to, insan da awiten ed Jerusalem.

³¹Nen kasabi rad siudad, tinawag ton amin iray totoo tan impantitipon to ra, impasen tod arap na altar iray papari, tan impaawit to ray totoon walad tirinsira.

³²Impanengneng tod sikara imay olo nen maoges a Nicanor tan samay taklay to a malangalangas ya inyonat to nen saman sumpad masanton Timplo na Makapanyarin-amin a Dios.

³³Insan to pinotut so dila na samay anggapoy Dios a too, tan insipan ton ipakan ya ankekelag ed saray manok tan ibitin tod kasumbaliway Timplo imay olo to, a pakanengnengan na ginawad sikato na inkaambagel to.

³⁴Tinmangay ed tawen so balang sakey a tood man tan inggalang toy Katawan, ya angipanengneng na pakayari to tan ag angyabuloy a nadotakan onung ed ganggan so Timplo to.

³⁵Insabit nen Judas ed padir na tirinsira imay olo nen Nicanor, a sikatoy malinew a pamaneknek na intulong na Katawan.

³⁶Nampapaknaan dan amin ya ag balut lingwanan yan agew, no ag ingen silibraan kapag taon diad bispiras na Agew nen Mardokeo, salanti diad kumalabintalon agew na kumalabinduan bulan a tatawagen na Adar ed salitay Aramaico.

³⁷Onya so nansumpalan nen Nicanor. Nansiansian kayaryan na saray Judio so Jerusalem manlapud saman a panaon, kanyan diak itonda so istoriak.

³⁸No sayan istoria et balibaliy inkasulat to tan mainomay a talusan, makaliliket ak; no aliwliway inkasulat to tan ag makasagyat na imano, ginawak nin siansia so anggaay nayarian ko.

³⁹Amta tayon makapoy ed laman so oninom labat na alak odino danum, balet say alak a nilaukan na danum et masamit ya inomen. Ontan met, say istorian balibaliy inkasulat to et mangiiter na liket ed saray mambasa. Natan sirin, itondak la dia.