Read Pangasinan Say Kumadwan Libro na SARAY MACABEO 2 Bible Online

Say Kumadwan Libro na SARAY MACABEO 2 - Pangasinan bible

Say Kumadwan Libro na SARAY MACABEO 2

¹"Amta mi onung ed saray awaran a si Jeremias a propita et binilin to ray totoo a mangyamut ira na apoy a walad tapew na altar, onung na asalita mi.

²"Amta mi met ya imbangat tod sikara so Ganggan na Dios tan pinasakbayan to ran ag ira onabuloy a napalikdo na saray inarkosan a balituk tan pilak a talintaoy diriyos a nanengneng dad dalin a kibantakan da.

³"Insan impurpurek tod sikara ya ag dan balut ikakaindan so Ganggan.

⁴"Ibabaga met na sarayan awaran a si Jeremias, diad panangiwanwan na Dios, et ingganggan ton say Tuldan Ayamay Katawan tan say Kaban na Sipanan et itombuk irad sikato ed palandey ya anandagan nen Moises ed dalin ya insipan na Dios ed saray totoo to.

⁵"Nen akasabid samay palandey si Jeremias, akarumog na maawang ya ongib tan diman to inyamut so Tuldan Ayamay Katawan, say Kaban na Sipanan, tan say altar a panagpoolan na insinso. Insan to sinaraan so lolooban na samay ongib.

⁶"Saray pigaran kakaaro nen Jeremias et tinombuk da tan sinali ran tandaan so dalan, balet ag da narumog imay ongib.

⁷"Nen akabatan nen Jeremias imay ginawa ra, nampasnukan to ra, a kuanto, Anggapoy toon nepeg a makaamtad sayan pasen ya anggad atipon lamet na Dios iray totoo to tan akasian to ra.

⁸"Diad satan a panaon, ipaamta to so akaiyamutan na sarayan bengatla, tan nanengneng ed lorem so kagalangan to a singa samay agawa nen panaon nen Moises tan samay agawa nen impikasi nen Solomon a say Timplo et nisaklang a kataruk na masanton kagalangan.

⁹"Nibaga met ed sikami no panoy impangyapay nen makabat ya Ari Solomon na bagat a panangisaklang nen asumpal a nipaalagey so Timplo.

¹⁰Nibaga met ed sikami a nen nampikasi si Solomon, dinmapo a nanlapud tawen so apoy tan pinoolan to ra may bagat, a singa samay agawa nen nampikasi si Moises.

¹¹Impaliwawa nen Moises ya apoolan so bagat a para kasalanan, lapud ag inakan imay bagat.

¹²Waloy agew so impansilibra nen Solomon na pista.

¹³Sarayan agawa et narumog met irad saray awaran na arari tan saray insusulat a dili nen Nehemias a nanggawa na libririya tan nantipon na saray insusulat nen David, saray sulat na arari nipaakar ed saray bagat, tan saray libro a nipaakar ed saray arari tan saray propita.

¹⁴Tinipon met nen Judas iray libro ya ataytayak lapud bakal, tan wala ni ra yad sikami.

¹⁵No nakaukolan yo ra yan libro, ipaamta yo labat ed sikami, et ipawit mi rad sikayo.

¹⁶Bangta magano ti lan silibraay Pista na Pamasimbaloy Panangisaklang na Timplo, simbawaen mi kayod sayan sulat mi a mansilibra kayo met.

¹⁷Inlaban na Dios ya amin iray totoo to tan impawil tod sikatayon amin so masanton dalin tayo, say panoley na ari, say panaglingkur na papari, say panangigalang ed Dios diad Timplo,

¹⁸onung na insipan tod Ganggan to. Inyagel to itayo ed saray makapataktakot a kaogsan tan nilinisan toy Timplo, tan mailalo kami a diad panangasi to magano lan pantitiponen to itayo, manlapud amin a bansa ed intiron mundo, ed masanton Timplo to.

¹⁹Si Jason a taga Cirene et inkorit to ed limaran libro so impanbilay nen Judas Macabeo tan saray agagi ton lalaki, say inkalinisan na matalonggaring a Timplo onung ed ganggan, tan say impakaisaklang na altar to.

²⁰Indalatdat toy nipaakar ed saray impibakal da ed kinen Antioco Epifanes tan say anak ton si Eupator,

²¹tan imbaga to ray mangatatawen a pasingayew a nipatnag ed saray masebeg tan maliket ya akilaban a pangyagel na Judaismo. Daiset iray sondalo mi, balet dineral day intiron bansa tan pinapairap da ray sondalon pagano.

²²Abawi da so Timplo a bantug ed intiron mundo, inekal dad pakaoley na arum a bansa so Jerusalem, tan impawil da ray ganggan a ngalngali la ra napa-andi. Agawaan da ra yan amin a bengatla, lapud mapangasi tan maabagey ed sikara so Katawan.

²³Salien ko natan a segeken ed sakey a libro iray limaran libro ya insulat nen Jason.

²⁴Say karakel na nidalatdat ya agawa tan say amayamay a nikana et nayarin pakapanirapan na siopaman a labay toy mambasa ed saray agawgawa.

²⁵Balet sinalik a painomayen iran talusan na amin da ray mambasa; manliket iray mambasan say pilalek da et naligliwa tan ag nairapan a maung iray malabay a mangipatlep na saray agawgawa.

²⁶Mairap so pansegek, ta nakaukolan toy pinasyan kimey tan pampuyat ed labi.

²⁷Say kairapan to yan kimey et singa pangiparaan na baleg a ponsia a pakaliketan na amin a totoon nandoromay labay dan kanen. Balet akaparaan ak a manirap, pian napaliket ko ray mambasa ed sayan kimey ko.

²⁸Makaoley lad nidalatdat ya agawgawa so inmonan nansulat, tan salien kon iparontal so segek na saray agawgawa.

²⁹Aliwan siak so managpaalagey na balon abung a nepeg ton imanoen ya amin iray nepeg a gawaen, no ag ingen sakey ak a managpinta a say labay ko labat a gawaen et say pamarakep na nengneng na abung.

³⁰Say managsulat na awaran et nepeg a kabaten ton maung so labay ton isulat, aralen ton amin so nipaakar ed labay ton isulat, insan to apiapigeren ya ipaliwawa.

³¹Balet siopamay mansulat labat na segek et nepeg a naabuloyan ya antikey so ibaga to tan ag la nakaukolan ya idalatdat ton amiy bengatla.

³²Kanyan sirin, igapok lay istoriak tan ag ko la dokeyay ibagak. Kakulang-kulangan so pangisulat na andokey a pangiparontal no nepeg a patikeyan so dilin istoria.