Read Pangasinan Say Kumadwan Libro na SARAY MACABEO 3 Bible Online

Say Kumadwan Libro na SARAY MACABEO 3 - Pangasinan bible

Say Kumadwan Libro na SARAY MACABEO 3

¹"Nen si Onias so Pangulon Pari ed Jerusalem, nanari so kareenan tan aligwas ed masanton siudad, tan saray ganggan to et mapeget a natotoluk, lapud matoor si Onias tan kabosul toy maoges.

²"Saray arari na Siria tan Egipto et pinagalangan da so Timplo tan initdan da na mabmabli ran rigalo.

³"Si Ari Seleuco, a manoley ed intiron Asia, et binabayaran ton manlapud saray buis a tinipon to iray gastos ed saray bagat ed Timplo.

⁴"Balet walay sakey a lakin manngaran na Simon, a kabyangay tribu na Bilga tan manonan opisyal a mangikukurang na Timplo, ya atalo ed impisangsangan tod kinen Onias nipaakar ed saray totontonen ed tindaan na siudad.

⁵"Diad sayan panaon, gobirnador na Baleg a Siria si Apolonio a lakin anak nen Traseo. Linmad sikato si Simon

⁶"tan imbalita to ya ag nabilang so kuartan walad panagsinupan na kayamanan ed Timplo, tan bangta samay kuarta et ag la nakaukolan ed saray bagat, maung nin ipalima ed pakaoley na ari.

⁷"Nen akapiarapan ed ari si Apolonio, imbaga tod sikato imay nipaakar ed kuarta. Ingganggan na ari si Heliodoro, say manonan ministro to, ya alaen to may kuarta diad ngaran na ari.

⁸"Tinmoluk a tampol si Heliodoro ed samay angibakian ed sikato, balet imbaga to a manliliber labat a mannengneng na saray siudad na Baleg a Siria.

⁹"Nen kasabi tod Jerusalem, ampetapetang so impangawat ed sikato na Pangulon Pari. Insan to impatwad satan so getma tod imbisita to tan tinepet to no tua may nibagad sikato.

¹⁰Imbaga na Pangulon Pari a si Simon a maoges a too et aliwan tua so imbalita to. Walan tua so kuarta ed panagsinupan na kayamanan ed Timplo, balet nibiig so arum a kuarta para saray bibiin balo tan para saray olila, tan say arum et kayaryan nen Hircano a lakin anak nen Tobias, sakey a toon atagey so kipapasen to. Impalinew to met a say katiponan na amin a kuarta et labintalon libo, anem a lasus, tan talomplo tan anem a kilon pilak tan anem a libo, walon lasus, tan labinliman kilon balituk.

¹²Imbaga to met ni ya ag nayarin balut a walay toon naabuloyan a mangalay kuarta na saray totoon manmamatalek ed kasantosan tan kaligenan na sayan Timplo a bantug ed intiron mundo.

¹³Balet impasoot nen Heliodoro a samay kuarta et nepeg ya alaen tan iter ed panagsinupay kayamanan na ari, onung na ingganggay ari.

¹⁴Kanyan angigetar na agew, insan linmad dalem na Timplo, ta bantayan toy panagbilang na kuarta. Lapud saya, agunigon ya amin iray totood intiron siudad.

¹⁵Saray papari ya akasolung na kawes na pari et tinmiblak irad arap na altar tan kinerew dad Dios ya ag to abuloyan a naala may kuarta, bangta sikatoy angipaakseb na saray ganggan a mangyagel na kuartan impalima da ray totoo ed Timplo.

¹⁶Makapaermen a nengnengen so Pangulon Pari. Pinmosisaw so lupa to, a mangipapatnag na ontan lan ermen na kamarerwa to,

¹⁷tan manggiwgiw so laman to lapud takot, a mangipapatnag na sakit na pagew to.

¹⁸Kibatiktik a pinmaway ed kaabungan da iray totoo, ta nantitipon iran mampikasi ya ag komun nadotakan so Timplo onung ed ganggan.

¹⁹Nanleletletan ed saray dalan iray bibiin akakawes labat na sako. Saray mamalangwer nin bibii ya ag ni ran balut inabuloyan na saray ateng da a mampanengneng ed karaklan et batik irad saray puirta odino diad saray padir na siudad, odino kitanda-tandag ira labat ed saray bintana ra.

²⁰Balet inermay laen da, akaatagey so lima ran mampipikasi ed Dios.

²¹Makapasibeg so pakanengneng ed Pangulon Pari diad ontan lan paniirap tan paneermen to, tan say pakanengneng ed balang too ed siudad ya agewgew tan akatikleb ya anggad dalin so lupa to.

²²Legan a kekerewen na amin a totoo ed Katawan a Makapanyarin-amin ya iyagel to so kuartan nimatalek ed sikato,

²³intuloy nen Heliodoro a sumpalen imay plano to.

²⁴Balet diad bektan akasabid panagsinupan na kayamanan si Heliodoro tan saray umaantabay ed sikato, say Katawan na amin ya ispiritu tan pakayari et impanengneng toy sakey a payawar. Saray mataletalek ya akiolup ed kinen Heliodoro et atalagnaw ira tan kinmapoy irad takot, lapud sayan impangipanengneng na Katawan na pakayari to.

²⁵Diad samay payawar, anengneng da so sakey a kabayo a walay toon akakabayo. Abistian na ontan lan dakep imay kabayo, tan makapataktakot imay akakabayo ya akakawes na balituk a para bakal. Biglan batik ed kawalaan nen Heliodoro imay kabayo, insan to dinepakan si Heliodoro.

²⁶Anengneng met nen Heliodoro so duaran tobun-balon lalaki a nidoma-domay biskeg tan inkaguapo ra tan balibaliy kawes da. Nanalagey irad balang diking nen Heliodoro tan andi-panangasin kinabil da.

²⁷Tampol a nakalay liknaan tan atumbad dalin. Saramay totoo to et inalsa rad amaka

²⁸tan impaway da. Aganggano nin linmoob yan too ed samay panagsinupan na kuarta a kaiba toy amayamay a lalaki, pati saray umaantabay to, balet natan inalsa ran anggapoy liknaan to. Lapud sayan agawa imparontal na amin a totoo so impamirbir dad mabiskeg a pakayari na Dios.

²⁹Akarokul diman si Heliodoro ya ag makasalita tan anggapo lay ilalo ton onabig ed inkagawa to lapud sayan impangipanengneng na Dios ed pakayari to.

³⁰Balet indayew na saray Judio so Dios a Makapanyarin-amin, lapud nanggaway milagro ed impangyagel tod Timplo to tan angiter na baleg a liket ed aganggano nin kawalaay takot tan gewgew.

³¹Kinerew a tampol na saray pigaran kakaaro nen Heliodoro ed kinen Onias a Pangulon Pari ya ipikasi tod Sankatageyan a kawananen toy bilay na sayan toon ngalngali la ompatey.

³²Kanyan angisaklang na bagat imay Pangulon Pari, pian ilaban na Dios si Heliodoro, ta ag to labay a nunoten na ari a saray Judio so makasengeg na inkagawad sayan toon imbaki to.

³³Legan nen Onias a mangibabagat, saramay duaran tobun-balon lalaki ya akasolung na samay gendat a kawes da, et pinmayawar ira lamet ed kinen Heliodoro tan kuanda, Misalamat kad Pangulon Pari; kinawanan na Dios so bilay mo lapud sikato.

³⁴Ag mo lilingwanan a say Katawan a walad tawen so anusad sika. Laka la tan ibagam ed amin a too so baleg a pakayari to. Nen nibaga da ya, naandipat ira.

³⁵Kanyan angibagat ed Katawan si Heliodoro tan amayamay so insipan to, lapud kinawanan na Katawan so bilay to. Nampatanir ed kinen Onias tan pinmawil ed ari a kaiba to ray sondalo to.

³⁶Diman to imbagad amin a too so ginawa na Katawan a sankamakapanyarian ed amin da ray diriyos.

³⁷Nen tinepet na ari ed kinen Heliodoro no siopay sankaabigan a toon isoblay ya ibakid Jerusalem, inmebat si Heliodoro.

³⁸No walay kalaban mo odino walay amtam a toon mangipapangulo na komplut sumpad oley mo, sikatoy ibakim. Ompawil dia a mapalaloy impakakabil ed sikato, no makapawil ni, ta walad may makapakelaw a pakayarin manlalapud Dios.

³⁹Babantayan na Dios na tawen so Timplo; kabilen tan deralen to so siopaman ya onlan manderal na Timplo.

⁴⁰Sikato ya so istoria na impangyagel na Dios ed kayamanan ed Timplo nen looban nen Heliodoro.