Read Pangasinan Say Kumadwan Libro na SARAY MACABEO 4 Bible Online

Say Kumadwan Libro na SARAY MACABEO 4 - Pangasinan bible

Say Kumadwan Libro na SARAY MACABEO 4

¹"Balet si Simon (ya abitla lan sikatoy angipakabat ed kinen Apolonio na nipaakar ed kuarta tan sikatoy makasengeg na insabiy gunigon ed bansa) et nantila lamet nipaakar ed kinen Onias, ta imbaga ton si Onias so akankasalanan ed impakakabil ed kinen Heliodoro tan saray kairapan a tinmombuk.

²"Makpel so linawa ton angakusa ed kinen Onias a mangipapangulo na sakey a komplut sumpad gobirnosi Onias ya ag labat angiiter na tulong ed Jerusalem tan angyaagel ed Timplo, no ag ingen mapeleng a napasumpal ya amin iray ganggan tayo.

³"Si Apolonio, say lakin anak nen Menesteo a gobirnador na Baleg a Siria, et pinabiskeg toy linawa nen Simon ed amin a ginawa ton kaogsan, kanyan binmisbiskeg so insumlang nen Simon. Lapud saya, nampapatey na totoo so sakey ed saray napanmatalkan a mananombuk to. Abirbir nen Onias so ontan lan sinmabin kaatapan,

⁴

⁵"kanyan linmad ari, aliwan lapud akusaen to ray kadalaan to, no ag ingen lapud pankaabigan na balang sakey a Judio tan saray karaklan.

⁶"Abirbir to a no anggapoy pikakasakey na ari anggapoy ilalon manari so kareenan tan ituloy nen Simon so panggawa toy kaogsan.

⁷"Ag abayag, nen inatey si Ari Seleuco tan nagmaliw ya ari si Antioco (a tatawagen met na Epifanes), nagmaliw a Pangulon Pari si Jason a lakin agi nen Onias, diad panamegley na maoges a polaing.

⁸"Linmad ari tan initdan to na labinduan libo, duan lasus tan pitomplo tan duan kilon pilak tan aruman to ni na duan libo, piton lasus tan duamplo tan piton kilon pilak diad maganon panaon.

⁹"Initdan ni nen Jason na liman libo, sanlasus tan labin talon kilon pilak, pian naitdan na pakaoley a mamaalagey na sakey a panaggalawan a pampasalan na saray tobun-balon lalaki tan mangipalistan mibabaley lad Antiokia iray taga Jerusalem.

¹⁰Inmabubon so ari, kanyan nen nagmaliw a Pangulon Pari si Jason, impaalig ton tampol ed saray taga Jerusalem so panagbilay na saray Grigo.

¹¹Inggapo to diad impangekal tod saray palabon niiter ed saray Judio diad impankerew nen Juan ed saray inmonan arari na Siria. (Si Juan so ama nen Eupolemo a linmad Roma, ta mipaknaan na pigagampi tan pikakaaro.) Impagmaliw nen Jason ya andi-kakanaan iray kaogaliyan tayon Judio tan impaalig to ray balon kaogaliyan a sumpad Ganggan tayo.

¹²Mapalaloy liket ton angipaalagey na panaggalawan ed abay na pokdul a kawalaay Timplo tan inwanwan to ray sankatalonaan a tobun-balon lalaki tayo a mibiang ed saray galaw, a singa kaogaliyan da ray Grigo.

¹³Lapud ag miparan kaogsan nen Jason, sakey a toon anggapoy Dios to tan aliwan peteg a Pangulon Pari, pampilpilalekan dan naalig so panagbilay da ray Grigo tan saray kaogaliyan na saray arum a bansa. Asabi-sabi

¹⁴ya anggan saray papari et nakalan iray liket a manumpal na saray masanton kimey da. Nakalan iray liket ed panlilingkur dad Timplo tan pinaolyan da ray panagbagat. Diad bektan niiter so tanda, onla ran tampol a mibiang ed saray galaw ya isesebel na Ganggan tayo.

¹⁵Anggapoy walad sikara iray bengatlan pinabpabli na saray lalaki tayo; pinabli ra labat iray kagalangan a Grigo.

¹⁶Sikato yay makasengeg na amin a gunigon da, ta nagmaliw a kalaban da tan nampapairap ed sikara iray totoon gagalangen da, a saray kaogaliyan da et inaalig da.

¹⁷Sakey a makapasinagem a bengatla so ag pangingalngalep ed Ganggan na Dios, onung na nanengneng yo ed saray onggendan ya agawgawa.

¹⁸Aminsan nen say ari et ombabantay ed saray galaw a nagagawan kapag limay taon ed siudad na Tiro,

¹⁹si Jason ya anggapoy kabaliksan a too et angibakid man na pigaran totoon nan lapud Jerusalem, a nibilang met la ran mibabaley ed Antiokia, ta mangyakar iray labinduan libo, duan lasus tan pitomplo tan duan kilon pilak a pambayar ed sakey a bagat ed dios a Hercules. Balet anggan sarayan totoo et ninunot da ya aliwan manepeg ya ikanad sakey a bagat iman a karakel na kuarta, kanyan

²⁰samay kuarta ya ingganan para bagat ed Hercules et nikanad impanggawa na saray bapor a para bakal.

²¹Nen nibakid Egipto si Apolonio a lakin anak nen Menesteo, ta onimatun ed sirimonya na pamayorung ed kinen Filometor ya ari, akabatan nen Antioco a si Filometor et sumlang ed saray totontonen ya impaakseb to. Mapagay Antioco ed kaligenan na dilin nanarian to, kanyan linmad Jope, insan tinmuloy ed Jerusalem.

²²Diad Jerusalem ampetapetang tan mapagalang so impangawat ed sikato nen Jason tan saray totood siudad a pinmaway iran mangilugay ed sikato. Naneeyag-eyag ira tan sankaawit da ray nipotan a silew. Manlapud Jerusalem impangulo nen Antioco a linmad Fenicia iray sondalo to.

²³Kalabas na taloy taon, imbaki nen Jason si Menelao, (say lakin agi nen Simon ya abitla lan inmona), ta mangyakar na kuarta ed ari tan alaen toy kanunotan na ari nipaakar ed pigaran makabaliksan a pamaakaran.

²⁴Balet nen nanalagey ed arap na ari si Nenelao, apanisia toy ari diad impangipanengneng toy pakaoley to. Insipan toy mangiter na amayamay a kuarta a say soluk tod inter nen Jason pian magmaliw a Pangulon Pari et labinduan libo tan pitomplo tan duan kilon pilak.

²⁵Nen pinmawil ed Jerusalem si Menelao, sankaawit to ray kasulatan a nanlapud ari a mamapaneknek na kipapasen ton Pangulon Pari. Balet anggapoy arum a kamaungan ton makasengeg na pakapagmaliw ton Pangulon Pari, mapetang na olon singa maruksan manoley tan masebeg a singa ayep ed takel.

²⁶Kanyan si Jason, a sinilib tod agi ton dili so kipapasen ton Pangulon Pari, et apasoot natan a batik ed dalin na Ammon.

²⁷Intuloy nen Menelao so kipapasen ton Pangulon Pari, balet ag ton balut binayaran imay kuartan insipan ton iter ed ari.

²⁸Balet si Sostrates a kapitan ed samay tirinsirad Jerusalem et mabetbet ton singilen, bangta sikatoy makaoley a mangalad saman a kuarta. Kanyan asabin siansia ya atawag iran dua nen Menelao ya omparontal ed ari, nipaakar ed saman a kuarta.

²⁹Si Menelao pinasandi ton Pangulon Pari si agi ton Lisimaco, tan si Sostrates pinasandi ton pangulo na tirinsira si Crates, say pangulo da ray sondalon inupaan a taga Chipre.

³⁰Legan to ra yan agawa, wala ray totoon linmaban ed pakaoley diad saray siudad na Tarso tan Mallo, lapud inter na ari ira yan siudad ed iyaamung ton bii a si Antiokida.

³¹Kanyan tinaynan na ari si Andronico, sakey ed saray atagey ya opisyal to, a mambenben na oley, tan nangganat a linmad Cilicia, pian nipawil toy gendat a kareenan ed sarayan siudad.

³²Inanamut nen Menelao so pankanawnawa to, tan initdan toy Andronico na pigaran balituk a kagawaan ya ineekal tod Timplod Jerusalem. Angilako lad sarayan balituk a kagawaan diad siudad na Tiro tan diad saray arum a siudad ya asingger diman.

³³Nen nadngelan nen Onias so nipaakar ed saya, batik ya inmamut ed sakey a timplo diad Dafne ya asingger ed siudad na Antiokia tan inakusa tod karaklan si Menelao.

³⁴Insan maamut a tinanggoyur nen Menelao si Andronico a pateyen toy Onias. Kanyan linmad kinen Onias si Andronico tan pinalikdo ton inlugay na ampetapetang tan insipan ton ag balut mapaga. Anggaman a mangiinap si Onias, atanggoyur a siansia nen Andronico ya apaekal ed anggapoy kaatapan a timplo tan tampol a pinatey to diad arap-arapan.

³⁵Mapalaloy pasnuk na saray Judio tan saray Hintil, lapud apatey si Onias.

³⁶Nen pinmawil a manlapud Cilicia so ari, linmad sikato iray Judion taga Antiokia tan imbaga rad sikatoy isusumlang dad samay andi-kakanaan ya impamatey. Amayamay met a Hintil so sumpad saman ya impamatey.

³⁷Naermenan na mapalalo si Ari Antioco, kanyan ag to apokpokan so interter na lua to nen anunotan toy kakabatan tan say panagadya nen Onias legan na intiron bilay to.

³⁸Diad mapalalon impakapasnuk nen Antioco, nilakanat to may kawes na arin insolung nen Andronico, nilakseban to, tan impailiber tod ya anggad samay pasen ya amateyan tod kinen Onias. Insan impapatey nen Antioco iman a toon managpatey na too. Onya so impanusa na Katawan ed kinen Andronico, onung ed kanepegan to.

³⁹Legan to ya, diad pananulong na agi ton si Menelao, amimpigan tinakewan nen Lisimaco so Timplo ed Jerusalem tan angala na amayamay a balituk a kagawaan. Nen kinmayat yan balita, nantitipon iray amayamay a totoo a mangipatnag na insumlang dad sayan ginawa nen Lisimaco.

⁴⁰Diad kaonuran, saray totoo et ngalngali la ra manggolo tan ag la ra napareen, kanyan angibaki si Lisimaco na talon libon sondalo ya ondogpad sikara. Say angipangulod sikara et si Aurano a singa katakken to so kaogsan to.

⁴¹Nen naamtaan na saray Judio ed solar na patio na Timplo so nagagawa, nandokdok ira na saray bato, saray kiew, odino angaakup ira na dapul ed altar. Intutupak da ra yad kinen Lisimaco tan saray totoo ton manaaligewgewan.

⁴²Apatey so pigaran totoo nen Lisimaco, asugatan da ray amayamay, tan batik iray nakdaan ed sikara diad pangyagel day bilay da. Apatey ed abay na panagsinupan na kayamanan ed Timplo si Lisimaco a tinatakewan toy Timplo.

⁴³Lapud sayan agawa, asalaysay ed korti si Menelao.

⁴⁴Nen linmad siudad na Tiro so ari, angibaki iray pangulo na saray Judio ed Jerusalem na taloran lalaki a mangakusad kinen Menelao.

⁴⁵Nen anengneng nen Menelao a natatalod kaso, pinasoksokan to na dakerakel a kuarta si Tolomeo a lakin anak nen Dorimenes, ta tanggoyuren toy ari a pilaan toy Menelao.

⁴⁶Insan kinerew nen Tolomeo ed ari ya ompaway iran dua ed korti a konwarin mangala ray maung a dagem, tan diman to tinanggoyur so ari a mangoman na kanunotan

⁴⁷tan sintinsiaan ton anggapoy kasalanan si Menelao. Kanyan nibolus si Menelao, anggaman a sikatoy nansengegan na golo; balet saramay taloran lalaki, ya anggan saray maruksan Escita et sinintinsiaan da ra komun ya anggapoy kasalanan, et asintinsiaan iran pateyen.

⁴⁸Saramay taloran lalaki et nansalita ra a pangyagel dad Jerusalem, saray totoo to, tan saray masanton kagawaan ya atakew ed Timplo, balet agano tan aliwan matonung so impamatey ed sikara.

⁴⁹Balet impanengneng na saray pigaran totoo ed Tiro so ag da impiabubon ed samay agawa tan say panamagalang dad saramay lalaki nen initdan da ray mapagalang a pompon.

⁵⁰Nansiansiad kipapasen to si Menelao, lapud inkaagom na saray walad pakaoley. Inagew-agew a pinmalaloy kaogsan nen Menelao tan nagmaliw a sankaogsan a kalaban na saray dilin kadalaan to.