Read Pangasinan Say Kumadwan Libro na SARAY MACABEO 5 Bible Online

Say Kumadwan Libro na SARAY MACABEO 5 - Pangasinan bible

Say Kumadwan Libro na SARAY MACABEO 5

¹"Diad ngalngali kabansag na sayan panaon, dinogpaan a pidwa nen Antioco a Kumapat so Egipto.

²"Diad ngalngalin apataploy agew, saray totood intiron Jerusalem et akanengneng ira na saray pasingayew na saray sondalon akakarwahi a balituk iray kawes dan para bakal tan bebeltangen day tawen. Saray totoon akakabayo et akaarmas ira na saray pika tan akaoyus iray ispada ra.

³"Nandarasig iran mambabakal tan mandodogpaan ira. Mantatankiyan iray samper, inmoran iray pika, tan mantikyab iray pana. Mankidyam ed liwaway agew iray amin a klasiy kawes a para bakal tan saray balituk a rinda na saray kabayo.

⁴"Impikasi na amin a totood siudad a saraman a pasingayew et maung komun so labay dan ibaga.

⁵"Nen nikayat so aliwan tuan balita ya inatey si Antioco, angawit na masoluk a sanlibon lalaki si Jason tan bigla ton dinogpaan so Jerusalem. Apapoliktar da ray lalakin guardia ed saray padir na siudad, tan adakep da so siudad. Inmamut si Menelao ed tirinsira ed abay na pokdul a kawalaan na Timplo,

⁶"legan a si Jason tan saray totoo to et andi-panangasin nampapatey ira na saray kapara ran Judio. Ag amta nen Jason a say panalod saray dilin kadalaan et sankaogsan a katalo. Impasen to ingen ya impanalod saray kalaban so impanpalabo to, aliwan inkatalo na saray dilin kadalaan to.

⁷"Balet ag sinoblay nen Jason so pakaoley. Ingen, apasoot lamet a binmatik ed dalin da ray Ammonita. Diad kaonuran, say maoges a komplut to et sikato lamlamang so inkaplagan tod kababaingan tan impakaleglemew to,

⁸"tan makapasinagem so impatey to. Impriso nen Aretas a manoley na saray Arabe, nibilang a sakey a kriminal tan abalaw-balaw, lapud intapat to ray dilin kadalaan to; inanap na amin a totoo, kanyan nambatik-batik ed binalay-baley. Batik ed Egipto a mangyagel ed bilay to,

⁹"insan diad Grecia, ta inilaloan ton iyagel na saray taga Esparta a kanayon da ray Judio. Diad kaonuran sayan too, ya amayamay so pinasoot ton pinataynan ed dilin bansa ra et inatey a sakey a toon amut-amut ed ag to bansa.

¹⁰Amayamay so impapatey nen Jason tan pinaolyan ton ag nipompon iray bangkay da, balet natan ag naermenan so dilin impatey to. Sikatoy ag nitolur, odino nipompon ed lobuk na saray lalaki to.

¹¹Nen nipakabat ed kinen Antioco so agawad Jerusalem, abaloan ton onsusumpad gobirno so intiron dalin na Judea, et akapasnuk a singa ayep ed katakelan. Kanyan tinaynan toy Egipto tan nilooban ton singa peles na bagyo so Jerusalem.

¹²Ingganggan to ray totoo to ya andi-panangasin ibalatar dan amin iray naabet da tan pateyen da so siopaman a narumog dan onaamut ed abung.

¹³Pinatey day anggan siopalaki may bii ya ankabaleg odino ogaw; anggan saray mansususo et pinapatgeran da ra.

¹⁴Kalabas na taloran agew naandid Jerusalem so walomplon libon totoo; apataplon libo so apatey ed indogpa tan onya met karakel so nalan ilako ya aripen.

¹⁵Ag nin siansia apenek ed saya si Antioco. Walay talek ton linmoob ed sankasantosan a Timplo ed intiron mundo; inwanwan nen Menelao, nantraidor ed rilihion to tan saray kadalaan to.

¹⁶Kinayuskos na saray marotak tan aliwan masanton lima to iray masanton kagawaan ya ikakanad panangigalang ed Dios tan saray rigalon iniiter na saray arum ya arari, pian naaruman so kagalangan tan dayew na Timplo.

¹⁷Mapalaloy inkaliketan nen Antioco lapud impakadakep to, kanyan ag to abirbir a say Katawan et inabuloyan ton narotakan onung ed ganggan so masanton Timplo to, lapud say kasalanan na saray totoo ed Jerusalem et akapasnukan ton agano.

¹⁸No ag labat nankasalanan na amayamay iray totood Jerusalem, adusa lan tampol komun si Antioco tan asebelan ed samay makapaingungot a ginawa to. Agawa met komun ed sikato may nansumpalan nen Heliodoro ya imbaki nen Ari Seleuco a mannengneng na panagsinupay kayamanan.

¹⁹Balet say Katawan ag to pinilin para Timplo iray totoo, no ag ingen inletneg toy Timplo para saray totoo to.

²⁰Kanyan akinabang so Timplo ed kairapan na saray totoo, balet ag abayag akinabang met ed aligwas da. Inkaindan na Katawan so Timplo nen sikatoy akapasnuk, balet pinasimbalo to nen kinmepay pasnuk to.

²¹Angala si Antioco na anemaplo tan sakey a libo, talon lasus tan anemaplo tan talon kilo a pilak diad Timplo tan nangganat a linmad Antiokia. Diad panagpaatagey to, abaloan ton napambiahi tod amagan dalin iray bapor odino napankurang tod tapew na dayat iray sondalo.

²²Anoro na saray gobirnador a manggunigon ed saray totoo. Diad Jerusalem, impasen toy Felipe a taga Frigia a maoges ni nen si Antioco.

²³Diad Palandey na Gerizim, impasen toy Andronico. Aliwa labat a saraya. Wala ni si Menelao a mapalalo niy panagpairap tod saray kapara ton Judio nen say panagpairap na saray gobirnador. Diad mapalalon panagbosul nen Antioco ed saray Judio,

²⁴angibakid Jerusalem na duamplo tan duan libon inupaan a sondalon taga Misia diad panangipangulo na toon manngaran na Apolonio. Ingganggan ton pateyen day balang laki ed siudad tan ilako dan aripen iray bibii tan ogogaw a lalaki.

²⁵Sinmabid Jerusalem si Apolonio, a konwarin pikakaaro so getma to. Insan diad sakey ya Agew na Panagpainawa, nen manngingilin ya amin iray Judio, impangulo ton mamparadad paway na siudad ira may sondalo ton akaarmas.

²⁶Kabebekta ingganggan to ra may totoo to a pateyen da ray amin a totoon pinmaway ya onnengneng ed sikara. Magangganat iran linmad siudad tan pinapatey day amayamay a totoo.

²⁷Balet akabatik si Judas Macabeo tan sakey a siamiran lalaki ed kapalandeyan. Nambilay irad man a singa saray ayayep ed katakelan. Pian ag da narotakan so sikaran dili onung ed ganggan, saray tanaman labat ya arumog dan ontutubod man so impanbilay da.