Read Pangasinan Say Kumadwan Libro na SARAY MACABEO 7 Bible Online

Say Kumadwan Libro na SARAY MACABEO 7 - Pangasinan bible

Say Kumadwan Libro na SARAY MACABEO 7

¹"Diad sananey ya agawa, narel so sakey a Judion ina tan saray pitoran lalakin anak to. Pababasigan ira na ari, pian napasoot iran mangan na karniy baboy.

²"Insan inkuan na sakey ed saray tobun-balo, Antoy iilaloan mon nagamuran diad panggagawam na onya? Labay mi niy ompatey nen say ikaindan mi ray abangonan mid saray lalaki mi.

³"Lapud saya mapalaloy pasnuk na ari, kanyan ingganggan ton mangala ra na saray talyasi tan saray baleg a kaldiro tan papetapetangen da ra.

⁴"Agawan tampol imay ganggan to. Insan to imbagad saray totoo to a potuten day dila na samay nansalita tan okisen day baog na olo to tan potuten da ray lima tan saray sali to, legan a bambantayan na ina to tan saray anemiran lalakin agagi to.

⁵"Nen nagmaliw lan mansongsongap a kabalgan imay tobun-balo, ingganggan na ari ya alsaen da tan ibontuk dad sakey ed saramay talyasi. Nen makapal ya asewek so inmatagey ed samay talyasi, saramay sanaagi tan samay ina ra et nampapabiskegan iray linawa ya ag ira ontalaw ya ompatey, a kuanda,

⁶"Oniimaton so Katawan a Dios tan natatalusan toy paniirap tayo. Impalinew ya nen Moises nen nansulat na sakey a kantan mangibabagay kadusa na saray angikaindan ed Katawan. Inkuanto, Kasian na Katawan iray manlilingkur ed sikato.

⁷"Kayariy onyan impatey na samay ononan agi, saray sondalo et ginapwan dan nanliliketan imay kumadwan agi diad panamegley na impangaknit dad buek tan baog na olo to. Insan da tinepetan, Natan labay mon kanen yan karniy baboy, odino labay mon potuten min sansakey iray limam tan salim?

⁸"Inmebat ed dilin salita to, Ag kon balut kanen! Kanyan pinairap na saramay sondalo, a singa impamairap dad samay inmonan agi.

⁹"Balet diad kaonuran iran ingas to ineyag tod ari, Sikan managpatas na too! Nayarin pateyen mo kami, balet say Ari na sansinakuban et paolien to kamid bilay tan itdan to kami na bilay ya andi-anggaan, lapud tinoluk mi ray ganggan to.

¹⁰Ginapwan na saramay sondalo a nanliliketan so kumatlon agi. Nen ingganggan dad sikaton ondilat, ginawa ton tampol. Insan mabiskeg so linawa ton angyonat na saray lima to

¹¹tan kuanton mapuspuso, Inter ira ya na Dios ed siak. Balet mabli ni ray ganggan to nen sarayan limak, tan amtak ya ipawil ira lamet na Dios ed siak.

¹²Mankelaw so ari tan saramay kakaiba to ed sebeg na linawa na samay kumatlon agi tan diad bulos na linawa ton manirap.

¹³Kayari na impatey to, insoblay a pinairap na saramay sondalo so kumapat ya agi, a singa saramay duaran inmona.

¹⁴Balet saya so kaonuran a balikas to: Maliket ak ya ompatey ed lima yo, lapud ag panduaruwaan a paolien kami na Dios ed bilay. Balet ag ka onolid bilay, Antioco!

¹⁵Nen inala na saray sondalo so kumaliman agi tan ginapwan dan pairapen,

¹⁶ninengneng tod mata imay ari tan kuanto, Walay pakayarim a manggawad sikami na antokaman a labay mo, anggaman ya ompatey ka met. Balet ag mo iisipen ya inkaindan na Dios iray totoo mi.

¹⁷Manalagar ka labat. Ikana na Dios so baleg a pakayari to a mamairap ed sika tan saray kabyangay boleg mo.

¹⁸Insan inala na saramay sondalo so kumanem ya agi, tan kasakbayan na impatey to inkuanto, Ag ka komun nalilingo. Maniirap kami onung na kanepegan mi, lapud nankasalanan kamid Dios mi. Sikato yay makasengeg no akin et nagagawad sikami ra yan makapasinagem a bengatla.

¹⁹Balet ag mon balut iisipen a napaliisan moy dusa ed sayan ilalaban mod Dios.

²⁰Samay ina so lalon makapakelaw nen say sikaran amin, tan nepeg a nidoma-domay pakanunot tayod sikato. Anggaman a naimatunan toy impatey na saramay pitoran anak ton lalaki ed loob na sanagew, mabisbiskeg so linawa ton nantepel lapud nanmatalek ed Katawan.

²¹Nantekep ed sikato so liknaan na bii tan say impanpuso na laki tan pinabiskeg toy linawa na balang sakey ed saramay anak to diad salita ran dili.

²²Inkuanto, Ag ko amta so inggapo na bilay yo ed dalem na eges ko. Aliwan siak so angiter ed sikayo na bilay tan ingas yo tan anoop na saray parti na laman yo.

²³Say Dios so nanggawa, say Dios ya amalsa na sansinakuban, amin a katoowan, tan amin a pinalsa. Mapangasi tan ipawil tod sikayo so bilay yo tan say ingas yo, lapud inaro yo ray ganggan to nen say dilin bilay yo.

²⁴Ag panduaruwaan nen Antioco a luludlureyen na samay ina, kanyan ginawa toy anggaay nayarian to a tanggoyuren imay sankayogtanan ya anak ya ikaindan to ray abangonan a kaogaliyan na saray lalaki to. Ag to labat insipan ed samay ogaw a pagmaliwen ton mayaman tan bantug, no ag ingen itdan to ni na betang ed pakaoley tan itdan to na ngaran a Kaaro na Ari.

²⁵Balet ag inasikaso na samay ogaw, kanyan sinali nen Antioco a tanggoyuren imay ina na ogaw a tongtongan to a kawananen toy bilay to.

²⁶Diad ontan lan panatanggoyur to, inmabuloy imay ina.

²⁷Inmabay imay ina ed anak to, tan niluko to may maruksa tan masebeg ya ari diad impangikuantod dilin salita to, Anak ko, kasian mo ak. Ag mo lilingwanan ya inawit ta kan siam bulan ed eges ko tan pinasuso ta kan taloy taon. Kinomisan ta ka tan iniiter ko ray nakaukolan mo ya anggad natan.

²⁸Kanyan kuankod sika, anak ko, a nengneng kad tawen tan dalin. Imanom ya amin iray nanengneng mod man, tan nunot mo a pinalsa na Dios iran amin ed anggapo, a singa impamalsa tod katoowan.

²⁹Ag ka ontatakot ed sayan managpatas na too. Maabuloy kan mangisukod bilay mo tan paneknekan mon manepeg kad saray lalakin agagim, pian lapud panangasi na Dios, awaten ta kan kaibam ira diad kiolid bilay.

³⁰Kasakbayan na inkasumpal na samay ina a nansalita, inkuan na samay ogaw, Ari Antioco, antoy aalagaren mo? Ag ko onuren iray ganggan mo. Totoluken ko labat iray bilin ed Ganggan ya inter nen Moises ed saray lalaki mi.

³¹Ninunot moy amin a klasiy karuksaan a gawaen ed saray kadalaan mi, balet ag mo napaliisan so dusa ya inggana na Dios ed sika.

³²Tua a mamapasnuk ed sikami so mabilay a Katawan mi tan paniirapen to kami lapud saray kasalanan mi, pian napetek tan napasimbalo kami. Balet magano labat yan nagawa, ta aripen to kami ni, tan pirdonaen to kami.

³⁴Balet sika so sankaruksaan tan sankaingungotan a pinalsan nambilay ed tapew na dalin. Kanyan ag mo papalikdoey sikan dili a konwarin matalonggaring ka diad panudusam ed saray totoo na Dios.

³⁵Anggapoy pakapaliis mod dusan iter ed sika na makapanyarin-amin a Dios a sankanengneng ton amin iray bengatla.

³⁶Nanirap ya agano iray agagik, lapud inkatoor mid Sipanan na Dios, balet linmoob la ra natan ed bilay ya andi-anggaan. Balet sika, napelag ka ed panagsintinsia na Dios tan nadusa ka onung ed kanepegan na panagpaatagey mo.

³⁷Iter ko la natan so laman tan bilay ko lapud saray ganggan da ray lalaki mi, a singa ginagawa na saramay agagik. Balet kekerewen ko met ed Dios a kasian ton tampol iray totoo to tan pairapen to ka ya anggad napasoot kan mabirbir a bukor toy Dios.

³⁸Saramay agagik tan siak so kaonuran la komun a manliknay pasnuk na Dios a Makapanyarin-amin, pasnuk a makatonungan ya impelag tod intiron bansa mi.

³⁹Lapud sarayan salitan panagbalaw, mapalalon akapasnuk si Antioco, kanyan mapalalo niy impanpairap tod samay ogaw nen saramay agagi to.

⁴⁰Kanyan inatey imay ogaw a sigput so impanmatalek tod Katawan tan ag ton balut nantraidor ya anggan saksakey a bekta.

⁴¹Samay ina so kaonuran a pinatey da.

⁴²Balet magenap lay impakasalitak na nipaakar ed impamairap ed saray Judio tan say impamasoot ed sikara a mangan na pait na saray ayayep ya imbagat.