Read Pangasinan MATEO 1 Bible Online

MATEO 1 - Pangasinan bible

MATEO 1

¹"Sikato yay listaan na saray lalaki nen Jesu-Cristo a kabyangay boleg nen David a kabyangay boleg nen Abraham.

²"Si Abraham so ama nen Isaac; si Isaac so ama nen Jacob; si Jacob so ama nen Juda tan saray agagi to.

³"Si Juda so ama di Fares tan Zara (si Tamar so ina ra); si Fares so ama nen Esrom; si Esrom so ama nen Aram.

⁴"Si Aram so ama nen Aminadab; si Aminadab so ama nen Naason; si Naason so ama nen Salmon.

⁵"Si Salmon so ama nen Booz (si Rahab so ina to); si Booz so ama nen Obed (si Ruth so ina to); si Obed so ama nen Jesse.

⁶"Si Jesse so ama nen Ari David. Si David so ama nen Solomon (say gendat ya asawa nen Urias so ina to).

⁷"Si Solomon so ama nen Roboam; si Roboam so ama nen Abias; si Abias so ama nen Asa.

⁸"Si Asa so ama nen Josafat; si Josafat so ama nen Joram; si Joram so ama nen Ozias.

⁹"Si Ozias so ama nen Jotam; si Jotam so ama nen Acaz; si Acaz so ama nen Ezekias.

¹⁰Si Ezekias so ama nen Manases; si Manases so ama nen Amon; si Amon so ama nen Josias.

¹¹Si Josias so ama nen Jeconias tan saray agagi to. Dia ed sayan panaon nibantak ed Babilonia iray Israelita.

¹²Nen asumpal so inkibantak dad Babilonia, nianak si Salatiel tan si Jeconias so ama to. Si Salatiel so ama nen Zorobabel;

¹³si Zorobabel so ama nen Abiud; si Abiud so ama nen Eliakim; si Eliakim so ama nen Azor.

¹⁴Si Azor so ama nen Sadoc; si Sadoc so ama nen Akim; si Akim so ama nen Eliud.

¹⁵Si Eliud so ama nen Eleazar; si Eleazar so ama nen Matan; si Matan so ama nen Jacob.

¹⁶Si Jacob so ama nen Jose ya asawa nen Maria, ya ina nen Jesus a tatawagey Cristo.

¹⁷No ontan sirin, labinapat so kailalakan manlapud Abraham ya anggad David; labinapat met so kailalakan manlapud David ya anggad inkibantak ed Babilonia na saray Israelita; ontan met a labinapat so kailalakan manlapud saman ya inkibantak da ya anggad inkianak na Misias.

¹⁸Onyay impakaiyanak nen Jesu-Cristo: Si Maria ya ina nen Jesus akisipanan a mikasal ed kinen Jose. Balet kasakbayan na impanamung dan dua, nalmuan a malokun si Maria lapud pakayari na Ispiritu Santo.

¹⁹Matonung a too si Jose a kasipan nen Maria, kanyan ag to labay a nasabyay kababaingan si Maria. Ninunot to sirin ya isian ya anggapoy makaamta.

²⁰Balet nen nununoten to ya, pinmayawar so sakey ya anghil na Katawan ed kugip to a nankuan: Jose, a kabyangay boleg nen David, ag ka natatakot ya ituloy mon ikasal si Maria, ta nanlapud pakayari na Ispiritu Santo so lokun to.

²¹Mananak na laki. Jesus so ingaran mod sikato, ta sikatoy mangilaban ed saray totoo tod saray kasalanan da.

²²Agawa yan amin, pian nasumpal so inkuan na Katawan diad panamegley na propita,

²³Manlokun so sakey a birhin, tan mananak na laki a tawagen day Emmanuel (a say labay ton ibaga: Say Dios walad sikatayo).

²⁴Kanyan nen abangon si Jose, ginawa to may imbaga na anghil na Katawan. Inkasal toy Maria,

²⁵balet ag to inakdulan ya anggad impangyanak nen Maria na ogaw a laki. Jesus so inngaran nen Jose ed sayan ogaw.