Read Pangasinan MATEO 12 Bible Online

MATEO 12 - Pangasinan bible

MATEO 12

¹"Aminsan ya Agew na Panagpainawa, ondadalan ed katrigowan si Jesus tan saray disipulo to. Lapud narasan ira, nanaala ra may disipulo to na bungay trigo tan kinokotim da.

²"Nen anengneng na saray Pariseo a gagawaen da ya, inkuandad kinen Jesus, Nengneng moy gagawaen da ra tay disipulom. Sebel itan no Agew na Panagpainawa!

³"Inmebat si Jesus, Ag yo ta nin balut abasa so ginawa nen David nen sikato tan saray kakaiba to et narasan ira?

⁴"Linma rad abung na Dios tan kinan da may tinapay ya imbagat ed Dios. Sumpad Ganggan a kanen da man a tinapay, ta saray papari labat so nayarin mangan ed saman.

⁵"O ag yo ta ni abasan balut ed Ganggan nen Moises a no Agew na Panagpainawa saray paparid Timplo et onsusumpa rad igaganggay Agew na Panagpainawa? Et ag da met ya pankakasalanan!

⁶"Kuankod sikayo a wala diay lalon makapanyari nen say Timplo.

⁷"Ag yo komun imbaga a mankakasalanan iray anggapoy kasalanan no amta yo labat so kabaliksan na ibabagay Masanton Sulat, Panangasi so labay ko, aliwan say bagat.

⁸"Ta say Anak na Too so Katawan na say Agew na Panagpainawa.

⁹"Inmalis si Jesus tan linmad sakey a sinagoga.

¹⁰Walad may lakin aparalisis so sakey a lima to. Wala ra met dimay pigaran totoo a labay dan idalem si Jesus kanyan tinepet da, Sumpa kasid Ganggan so panambal no Agew na Panagpainawa?

¹¹Inmebat si Jesus, Panon no wala bilang so karniro na sakey ed sikayo a naplag ed bobun no Agew na Panagpainawa? Ag yo kasi agwaten?

¹²Lalon mabli niy too nen say karniro, andi ta? Kanyan iyabuloy sirin na Ganggan a manggawa tayoy kamaungan no Agew na Panagpainawa.

¹³Insan kuanen Jesus ed samay laki, Iyonat moy limam. Inyonat toy lima to, et inmabig tan nagmaliw a singa samay sakey a lima to.

¹⁴Tinmaynan ira may Pariseo tan implano ra no panoy pamatey dad kinen Jesus.

¹⁵Nen akabatan nen Jesus yan plano ra, tinmaynan diman. Amayamay iray totoon akilad sikato. Pinaabig to ray amin a mansasakit,

¹⁶balet binilin to ran ag da ibabalitad anggan siopa so nipaakar ed sikato.

¹⁷Agawa ya pian napatway imbaga nen propita Isaias:

¹⁸Sava so aripen ko a pinilik, sikatoy inarok tan pakaliliketan ko. Iter koy Ispirituk ed sikato, tan sikatoy mangipakabat na katonungan ed amin a katoowan.

¹⁹Ag to oningal o misangsangan, ag mambando ed saray dalan.

²⁰Ag to poteren so pikewet a tanobung, odino erepey makuykuyep lan lamparaan. Manseet ya anggad napanalo toy inkatonung:

²¹tan sikatoy panilaloan na amin a katoowan.

²²Inyakar dad kinen Jesus so sakey a lakin bulag tan ag makasalita lapud inaponay dimonyo. Pinaabig nen Jesus, kanyan makanengneng tan makatongtong la.

²³Mankelaw iray amin a totoo tan inkuanda, Sikato la ya kasiy Anak nen David?

²⁴Balet nen nadngel ya na saray Pariseo inkuanda, Napapaekal to ray dimonyo lapud si Beelzebul a prinsipi na saray dimonyo et initdan toy pakayari.

²⁵Amta nen Jesus so walad isip da, kanyan inkuantod sikara, Ag mambayag so nanarian a pankokolkolay totoo ya apagen. Ontan met ya ag mansiansia so balang baley o pamilya a naapag-apag tan manlalaban iray kabyangan to.

²⁶No si Satanas so mamapaekal ed kinen Satanas, lalabanan toy sikaton dili! Panon a mambayag so nanarian to?

²⁷No kuanyon mamapaekal ak na saray dimonyo lapud pakayarin iiter nen Beelzebul ed siak, siopa sirin so mangiiter ed saray disipulo yo na pakayarin mamaekal ed saray dimonyo? Saray dilin disipulo yoy mamapaneknek a nalilingo kayo!

²⁸Say Ispiritu na Dios so mangiiter ed siak na pakayarin mamaekal ed saray dimonyo, tan sikato yay mamapaneknek a sinmabi lad sikayoy Panariay Dios.

²⁹Anggapoy makaloob a mantakew ed abung na toon mabiskeg, likud no baluren to ni kasakbayan ton takewan. No abalur to la, sikato labat so pakaloob tod abung a mantakew.

³⁰Siopamay ag ontombuk ed siak, onlaban lamlamang ed siak. Siopamay ag mangibad siak a mansinup, mambuyak lamlamang.

³¹Kanyan kuankod sikayo: napirdonay amin a kasalanan na too tan amin a maoges a lalabiren to balet ag balut napirdona so toon manlabir na bengatlan sumpad Ispiritu Santo.

³²Napirdona so toon manlabir na bengatlan sumpad Anak na Too; balet ag napirdona so toon manlabir na bengatlan sumpad Ispiritu Santo, natan o diad arapen a panaon.

³³Maung so bungay kiew no maung so sengeg to; makapoy so bungay kiew no makapoy so sengeg to. Diad bunga so pakabirbiran no maung o makapoy so sakey a kiew.

³⁴Apoliyan kayon talagay oleg! Panon kayon makapansalitay maung no maoges kayo? Ta manlapud puso so ibalikas na sangi!

³⁵Maung so manlapud maung a too, lapud napnoy puso to na kamaungan. Maoges so manlapud maoges a too, lapud napnoy puso to na kaogsan.

³⁶Kuankod sikayo: no onsabiy Agew na Okum, ebatan na balang sakey so imbolus ton salita ya anggapoy kakanaan.

³⁷Ta diad saray salitam so pakapirdonay kasalanan mo, tan diad saray salitam so pakasintinsiaan moy dusa.

³⁸Wala ray pigaran iskriba tan Pariseo a nankuan, Maistro, labay min naimatunan a manggawa kay milagro.

³⁹Inmebat si Jesus, Agaylay kaogsan na totood sayan panaon! Anggapoy pananisia rad Dios! Onkekerew kayoy milagro, anto? Anggapoy milagron naimatunan yo no ag say milagro nen propita Jonas.

⁴⁰No panoy impanayam nen Jonas a taloy agew tan labi ed dalem na eges na balbaleg a sira, ontan met so panayam na Anak na Too a taloy agew tan labi diad dalem na dalin.

⁴¹Diad Agew na Okum onalagey iray taga Ninive tan akusaen da kayo, ta nansibkelan da ray kasalanan da nen nadngel dan nampulong si Jonas. Balet kuankod sikayo a wadyay lalon makapanyari nen si Jonas!

⁴²Diad Agew na Okum onlagey so Riyna Seba tan akusaen to kayo, ta nanlapud arawdawin pasen ya ondengel labat ed kakabatan nen Solomon. Balet kuankod sikayo a wadyay lalon makapanyari nen si Solomon!

⁴³No ompaway ed sakey a too so maoges ya ispiritu, mananap na amagan pasen a pampainawaan to. No anggapoy naalmo to,

⁴⁴ikuantod sikaton dili, Ompawil ak ed abung kon tinaynan ko! Ompawil sirin tan naalmoan to ya anggapoy manaayam, malinis, tan masinup.

⁴⁵Onlad satan a mangawit na pitoran ispiritu a lalon maoges nen say sikato, tan kaiba to ran manayam diman. Lalon maoges so kipapasen to yan too nen say gendat. Onya met so pagmaliwan da ray maoges a totoo ed sayan panaon.

⁴⁶Mansasalita niy Jesus nen sinmabiy ina to tan saray agagi ton lalaki. Nanalagar irad arapay abung, ta labay dan pitongtongay Jesus.

⁴⁷Inkuan na sakey ed saray totoon wadman, Wadyay inam tan saray agagim a lalaki. Wala rad paway a manaalagar, ta labay da ka konon pitongtongan.

⁴⁸Inmebat si Jesus, Siopay inak? Siopa ray agagik?

⁴⁹Insan to intoro ray disipulo to tan inkuanto, Niay inak tan saray agagik!

⁵⁰Ta siopamay manggaway linawa na Amak a walad tawen, sikatoy agik, sikatoy inak.