Read Pangasinan MATEO 15 Bible Online

MATEO 15 - Pangasinan bible

MATEO 15

¹"Aminsan ya agew, wala ray pigaran Pariseo tan iskriba a nanlapud Jerusalem a sinmingger ed kinen Jesus. Tinepet dad sikato,

²"Akin et ag oonuren na saray disipulom so bangat ya impabangon da ray lalaki tayo? Ag ira manooras na lima ra kasakbayan da a mangan, onung ed ganggan!

³"Inmebat si Jesus, Akin sikayo ey? Diad pangoonur yoy bangat da ray lalaki yo, ag yo la laingen oonurey ganggay Dios.

⁴"Ta inkuay Dios, Igalang moy amam tan inam, tan Nakaukolan ya ompatey so siopaman a toon mamapaoges ed ama o ina to.

⁵"Balet ibabangat yo a no say sakey a too et ibaga ton imbagat tod Dios so antokaman a nitulong tod ama o ina to,

⁶"ag la nakaukolan ya igalang toy ama to. Diad panusumpal yod ganggan yon dili, gagawaen yon andi-kakanaan so ganggay Dios.

⁷"Mansimpisimpitan kayon totoo! Tuay imbaga nen Isaias nipaakar ed sikayo: Inkuay Dios

⁸"Gagalangen ak na sarayan totoo diad panamegley na bibil da; balet diad tuay tua, arawrawid siak so puso ra.

⁹"Kanyan say pangidadayew dad siak anggapoy kana, ta anggan saray ganggay too gagawaen dan ganggay Dios ira!

¹⁰Insan pinaasingger lamet nen Jesus iray totoo tan inkuanto, Dengel kayon amin tan talusan yoy ibagak!

¹¹Aliwan say onloob no ag say ompaway ed sangiy too so mandotak ed sikato.

¹²Linma ray disipulo ed sikato tan kuanda, Amtam ya apasakitan mo ray Pariseo lapud samay imbagam?

¹³Inmebat si Jesus, Nabagut so balang tanaman ya ag intanem na Amak a walad tawen.

¹⁴Paolyan yo ra labat. Bulag iran manangiwanwan; et no itabin na bulag so kapara ton bulag, napelag iran duad banawang.

¹⁵Inkuanen Pedro, Ipaliwawam pad sikamiy kabaliksan na samay alimbawa.

¹⁶Inkuanen Jesus ed sikara, Anggapo ta niy pakatalus yo met?

¹⁷Ag yo ta amta a say onloob ed sangiy too et onlad eges to, insan ompaway met lamlamang?

¹⁸Balet saray ompaway ed sangiy too et manlapud puso to, tan sikara yay mandotak ed sikato.

¹⁹Ta manlapud pusoy too iray maoges a kanunotan, panagpatey, pikakaloguran, pilalawanan, panagtakew, panagtila, tan panagpaoges ed kaparan too.

²⁰Sikara yay mandotak ed sakey a too. Say ag panoras na lima kasakbayan a mangan, onung ed ibabaga ran nakaukolan a gawaenag to ya dotakay sakey a too.

²¹Tinmaynan diman si Jesus tan linmad pasen ya asingger ed saray siudad na Tiro tan Sidon.

²²Linmad sikatoy sakey a biin taga Canaan a manaayam diman tan inkuanto, Katawan, Anak nen David, kasian mo ak pa! Inaponay dimonyo so anak kon bii tan mapalaloy kakairapan to.

²³Balet ag inebatan nen Jesus na anggan sakey a salita. Inmasingger iray disipulod sikato tan kuanda, Ibakim la, ta totombuken to itayo tan maingaingal.

²⁴Inkuanen Jesus, Nibaki ak labat ed saray karniron abalang na saray totood Israel.

²⁵Balet nantalimukor imay biid arap nen Jesus tan kuanto, Tulongan mo ak kari, Katawan.

²⁶Inmebat si Jesus, Ag manepeg ya alaey kakanen na saray ogogaw, insan ibontuk ed saray aso.

²⁷Tua tay imbagam, Katawan, kuanto may bii, balet anggan saray aso mangakan iray keran napepelag ed lamisaay amo ra.

²⁸Inmebat si Jesus, Mabisbiskeg so pananisiam! Nagaway kekerewen mo. Manlapud saman ya oras, inmabig imay anak ton bii.

²⁹Kasiput nen Jesus diman, pinmawil ed gilig na Dayat na Galilea. Tinmakdang ed nipokdul a pasen, insan inmirung.

³⁰Sinmabiy dakerakel a totoon awit da ray piley, bulag, lopuy, emel tan amayamay ni ran arum a mansasakit. Inyan da rad arap nen Jesus, tan pinapaabig to ra.

³¹Mankelaw iray totoo nen naimatunan dan mansasalita la ra may emel, inmaabig la ra may lopuy, manaakar la ra may piley, tan makakanengneng la ra may bulag. Inggalang da so Dios na Israel.

³²Tinawag nen Jesus iray disipulo to tan inkuanto, Nakakasian ko ra yan totoo, ta taloy agew lan kaibak ira, et anggapoy naakan da. Ag ko met labay iran pasempeten a narasan, ta ompan naelew irad dalan.

³³Tinepet na saray disipulo, Iner ed sayan kalawakan so napangalaan tayo na ondugan ipakan ed ontan lan karakel na totoo?

³⁴Pigaray tinapay yo? tinepet nen Jesus ed saray disipulo. Pitora, tan walay pigaran ankelag a sira, ebat da.

³⁵Pinayorung nen Jesus ed dalin iray totoo.

³⁶Inala to ra may pitoran tinapay tan saramay sira, akisalamat ed Dios, pinipisag to ra, insan to ra inter ed saray disipulo tan imbunog dad saray totoo.

³⁷Angan iran amin tan napsel ira. Nen tinipon na saray disipulo so keran tinapay, napnoy pitoran tiklis.

³⁸Apat a libon lalakiy angan, andi bali ni ray bibii tan saray ogogaw.

³⁹Pinasempet nen Jesus iray totoo, insan linmogan ed baloto tan linmad lugar na Magadan.