Read Pangasinan MATEO 18 Bible Online

MATEO 18 - Pangasinan bible

MATEO 18

¹"Diad saman a bekta, linma ray disipulo ed kinen Jesus tan tinepet da, Siopay manona ed Panariay tawen?

²"Tinawag nen Jesus so sakey ya ogaw, pinaalagey tod pegley da,

³"tan inkuanto, Tandaan yo ya! No ag yo pasimbaloey panagbilay yo tan ag yo aligen iray ogogaw, ag kayon balut makaloob ed Panariay tawen.

⁴"Say toon mampapaabeban singa sayan ogaw, sikatoy sankatageyan ed Panariay tawen.

⁵"Tan siopamay mangaawat ed sakey a singa sayan ogaw lapud siak, aawaten to ak.

⁶"Magmaung nin bitinay baleg a gilingan so beklew na sakey a too tan ipalner ed kaaralmay dayat nen say sikatoy pansengegay pankasalanan na sakey ed sarayan ogogaw a manisiad siak.

⁷"Makapataktakot so kipapasen ed tapew na dalin, lapud saray bengatlan pansengegay pankasalanan da ray totoo! Anggan kapigan ag naandi ray bengatlan pansengegay pankasalanan, balet makapataktakot so nasagmak na toon panlapwan da!

⁸"Kanyan no say limam o salim so pansengegay pankasalanan mo potut mo, insan mo ibantak! Magmaung nin onla kad bilay a saksakey so limam o salim, nen say onla kad apoy ya andianggaan a nantopag so limam tan salim.

⁹"No say matam so pansengegay pankasalanan mo sokit mo, insan mo ibantak! Magmaung nin onla kad tawen a saksakey so matam, nen say onla kad andianggaan ya apoy a nantopag so matam.

¹⁰Imano yo ta ompan balawen yoy sakey ed sarayan ogogaw. Kuankod sikayo a diad tawen, saray anghil da ra yan ogogaw et wala ran naynay ed arap na Amak ed tawen.

¹²Anto kasiy gawaen na sakey a toon walay sanlasus a karniro to et abalang so sakey? Taynan to ra may siamaplo tan siam a mankakabkab na dikad kapokdulan tan anapen to may abalang a karniro.

¹³Kuankod sikayo a no nalmo, to la, lalon panliketan to may sakey a karniro nen saramay siamaplo tan siam ya ag abalang.

¹⁴Ontan met ya ag labay na Ama yod tawen a nabalang so sakey ed sarayan ogogaw.

¹⁵No mankasalanan ed sika so agim, lakad sikato tan tawag moy imano to. Balet gawam yan anggapoy makaimatun. No dengelen to ka, apapawil moy agim.

¹⁶Balet no ag to ka dengelen mangitagar kay sakey o duaran totoo, pian napaneknekan na duara o taloran tasi ray amin a pantongtongan yo.

¹⁷No ag to ni dengelen pati iglisia, ipasen mon sakey a Hintil o sakey a sumisingil na buis.

¹⁸Kuanko sirin ed sikayon amin a say isebel yod dalin so nisebel met ed tawen; say iyabuloy yod dalin so niabuloy met ed tawen.

¹⁹Kuanko nid sikayo: no mankasakey diad tapew na dalin so duarad sikayo a mikerew na antokaman, iter na Amak ed tawen so kerewen da.

²⁰Ta inerman so pantitiponay duara o taloran totoo lapud siak, wala ak ed nanleleetan da.

²¹Sinmingger ed satan si Pedro ed kinen Jesus tan tinepet to, Katawan, mamimpigan pirdonaen koy agik ed pankasalanan tod siak? Mamimpito?

²²Inmebat si Jesus, Andi! Aliwan mamimpito labat, no ag ingen mamimpiton pitomplo.

²³Ta say Panariay tawen aliling toy sakey ya arin labay toy mikuintaan ed saray aripen to.

²⁴Kapanggigapo ton mikuintaan, walay inyakar dad sikaton sakey ya aripen a piga-pigan milyon a pisos so utang to.

²⁵Anggapoy nibayar to, kanyan ingganggan na ari a sikatoy ilako, pati say asawa to, saray anak to, tan amin a kayaryan to, pian makabayar.

²⁶Nantalimukor imay aripen ed arap na ari tan akikasi, Mananos ka karid siak, ta bayaran kon bayaray amin ya utang kod sika!

²⁷Akasian nen ari kanyan pinirdona toy utang to, insan to la imbaki.

²⁸Nen ompaway la may aripen, nabet toy kapara ton aripen ya akautang ed sikatoy pigan lasus a pisos. Siningkat to, insan to titikelen. Bayaran mo lay utang mod siak! inkuanto.

²⁹Samay kapara ton aripen nantalimukor ed arap to tan akikasi, Mananos ka karid siak; bayaran ta kan bayaran!

³⁰Balet ag inmabuloy. Impaipriso to ni ingen ya anggad ag to pakabayar.

³¹Nen anengneng na saray arum ya aripen so agawa, naermenan iran maung. Linma rad samay ari tan indalem day amin ya gawa.

³²Tinawag na ari may aripen tan inkuanto, Maoges kan aripen! Ag ta ka impambayar na utang mo lapud akikasi ka.

³³Kinasian mo met komun imay kaparam ya aripen a singa impangasik ed sika!

³⁴Diad ontan lan pasnuk to may ari, impaipriso to ya anggad ag to pakabayar.

³⁵Ontan met so gawaey Amak ed tawen ed sikayo, no ag yo pirdonaen ed intiron puso yo so agi yo.