Read Pangasinan LUCAS 1 Bible Online

LUCAS 1 - Pangasinan bible

LUCAS 1

¹"Kagalgalang kon Teofilo: Amayamay la ray nanoksuy tan nansulat na nipaakar ed saray bengatlan agawgawad pegley mi.

²"Insulat da ray imbabalitad sikami na saray akakkaimatun nanlapud gapo ed sarayan agawgawa tan nampupulong na salitay Dios.

³"Kasumpal kon inaral a maung yan agawgawa nanlapud inggapo ra, ninunot kon maabig ya isulat ko ran maoksuy para sika.

⁴"Gawaen ko ya sirin, pian naamtaan moy katwaan da ray imbabangat dad sika.

⁵"Nen si Herodes so ari na Judea, walay sakey a parin manngaray Zacarias, a kabyangay olup na paparin ipapangulo nen Abias. Say asawa nen Zacarias et si Elizabet, a kabyangay kailalakan nen Aaron.

⁶"Matonung so pambibilay dan dua ed arap na Dios, tan diad panusumpal dan amiy ganggan tan bilin to, anggapoy pakabalawan ed sikara.

⁷"Anggapoy anak da, ta lepes si Elizabet; insan sakey ni, mataktakken la ran dua.

⁸"Aminsan ya agew, si Zacarias manlilingkur a sakey a pari ed arap na Dios, ta asabi lay liber na kawalaan ton olup na papari.

⁹"Onung ed kaogaliyan a totombuken na saray papari, nambibinagut ira. Si Zacarias so apalaran a mampool na insinso altar, kanyan linmoob ed Timploy Katawan.

¹⁰Saray totoo balet, wala rad paway na Timplo tan mampipikasi ra nen oras na panagpool na insinso.

¹¹Pinmayawar ed sikatoy sakey ya anghil na Katawan a manalalagey ed nikawanan na altar a panagpoolay insinso.

¹²Nikelawan si Zacarias tan ataktakot nen anengneng to may anghil.

¹³Inkuanto may anghil, Ag ka natatakot, Zacarias, ta dinengel na Dios so pikakasim! Si Elizabet ya asawam et mananak na sakey a laki. Juan so pangingaran mod sikato.

¹⁴Agaylay panliket tan panggayagam, tan agaylay panliket na amayamay a totoo ed kianak to!

¹⁵Ta magmaliw a matalonggaring yan too ed arap na Dios. Ag oninom na alak o antokaman a makabuek. Napano la na Ispiritu Santo ya anggan wala nid eges nen ina to.

¹⁶Dakel iray totoon taga Israel a papawilen tod Katawan a Dios da.

¹⁷Onlan onona nen say Katawan, tan nawalan na singa pakayari tan ispiritu nen propita Elias. Papawilen toy panaarowan da ray ama tan anak. Papawilen to met ed dalan da ray matonung iray totoon bangar. Diad ontan, iparaan to ray totoo a mangawat ed Katawan.

¹⁸Inkuanen Zacarias ed samay anghil, Panon ko a naamtaan a nagawa yan tua, anta masikesiken ak la tan akolakolaw met lay asawak?

¹⁹Inmebat may anghil, Siak si Gabriel a manalalagey ed arap na Dios. Imbaki to ak a mangibagad sika yan maung a salita.

²⁰Manlapud natan naemel ka tan ag ka makasalita, anggad pakagawa na sayan imbagak, lapud ag mo panisiaan ya ontua ray imbagak ed sika no nasabiy niganan agew.

²¹Leleg to ya, aalagaren na totoo si Zacarias. Mankelaw ira no akin et agaylay bayag tod dalem na Timplo.

²²Nen ompaway ag to la makasalita, kanyan naamtaan dan walay pinmayawar ed sikato diad dalem na Timplo. Ag makasalitan balut, kanyan sinisinyasan to labat iray totoo.

²³Nen asumpal lay liber nen Zacarias a manlingkur ed Timplo, sinmempet la.

²⁴Ag abayag, nanlokun a tua si asawa ton Elizabet tan limay bulan ya ag inmalis ed abung.

²⁵Inkuanto, Tinulongan ak natan na Katawan. Inekal toy kababaingan kod saray totoo!

²⁶Diad kumanem a bulan na lokun nen Elizabet, imbakiy Dios si anghil Gabriel ed Nazaret, sakey a baley ed Galilea,

²⁷ta walay paibaga tod sakey a marikit a manngaray Maria. Akisipanan la yan marikit a miasawad kinen Jose a kabyangay boleg nen Ari David.

²⁸Kasabi to may anghil ed kinen Maria inkuanto, Manggayaga ka, ta pinalaboan kay Dios! Say Katawan walad sika!

²⁹Agoloy kanunotan nen Maria ed sayan imbalikas to may anghil tan inisisip to no antoy labay ton ibaga.

³⁰Inkuan na anghil, Ag ka natatakot, Maria, ta pinalaboan kay Dios.

³¹Manlokun tan mananak kay sakey a laki, tan Jesus so pangingaran mod sikato.

³²Magmaliw a matalonggaring yan laki tan natawag ya Anak na Sankatageyan a Dios. Say Dios a Katawan pagmaliwen ton sakey ya ari, a singa si David a laki ton.

³³Manarin andi-anggaan ed saray kabyangay boleg nen Jacob, tan anggapoy anggaan so panarian to!

³⁴Inkuanen Maria ed samay anghil, Panon yan nagawa, anta sakey ak a birhin?

³⁵Onlad sikay Ispiritu Santo, ebat na anghil, tan tarungan kay pakapanyariy Sankatageyan a Dios. Kanyan natawag ya Anak na Dios so masanton ogaw ya iyanak mo.

³⁶Nanunotan moy kanayon mon Elizabet? Lepes tan akolaw la, balet kumanem bulan to lan malokun natan.

³⁷Anggapoy ag nagawaan na Dios.

³⁸Inmebat si Maria, Aripen ak na Katawan. Nagawad siak komun itay ibabagam. Insan linma la may anghil.

³⁹Ag abayag, maganat a linmay Maria ed sakey a nipokdul a baley na Judea.

⁴⁰Kasabi tod abung nen Zacarias, inggalang toy Elizabet.

⁴¹Nen nadngel nen Elizabet imay impangigalang nen Maria, ginmalaw so ogaw ed eges to. Napnoy Ispiritu Santo si Elizabet

⁴²tan inkuantod maksil a bosis, Sikay sankaliketan ed amin da ray bibii! Maliket met so ogaw ya iyanak mo!

⁴³Siopa ak a bisitaey ina na Katawan ko?

⁴⁴Ta kadngel koy impangigalang mod siak, ginmalaw yay ogaw ed eges ko diad liket to.

⁴⁵Agaylay liket mo, ta manisia kan nasumpal so impaibagad sikay Katawan!

⁴⁶Inkuanen Maria: Itanduroy pusok so Katawan,

⁴⁷tan manliket so ispirituk lapud Dios a Manangilaban ko,

⁴⁸ta anunotan to ak a magter ya aripen to! Manlapud natan, tawagen ak a maliket na amin da ray katoowan,

⁴⁹lapud saray makapakelaw a bengatlan ginaway Makapanyarin Dios ed siak. Masanto so ngaran to:

⁵⁰ipanengneng toy panangasi to ed amin da ray mangigagalang ed sikato, manlapud sakey a kailalakan ya anggad ontombuk iran kailalakan.

⁵¹Impakana toy biskeg da ray taklay to, binuybuyak to ray mapaatagey tan saray getma ra.

⁵²Tinumba to ray makapanyarin ari ed trono ra, tan intanduro to ray mapaabeba.

⁵³Pinesel to na maung a bengabengatla iray narasan, tan pinataynan ton kalima-lima iray mamayaman.

⁵⁴Sinumpal toy insipan tod saray lalaki tayo, diad impanulong tod aripen ton Israel;

⁵⁵anunotan ton kinasian ya anggad angga si Abraham tan saray anak to!

⁵⁶Akiayam a taloy bulan si Maria ed kinen Elizabet, insan la sinmempet ed abung.

⁵⁷Sinmabi lay oras na pananak nen Elizabet, tan inyanak toy sakey a laki.

⁵⁸Abalitaan da ray kakaabay tan kakanayon to so baleg a panangasi na Katawan ed sikato, kanyan akiliket irad sikato.

⁵⁹Nen waloy agew to la may ogaw, dinmago ray totoon manegat ed sikato. Zacarias komuy pangingaran dad sikato pian iboloy dad kinen ama to,

⁶⁰balet inkuanen ina to, Andi! Juan so pangingaran ed sikato.

⁶¹Balet anggapoy anggan sakey a kanayon mo a manngaray onya! inkuanda.

⁶²Sininyasan dad satay Zacarias, ta tinepet da no antoy labay ton ngaran na anak to.

⁶³Kinmerew si Zacarias na pansulatan to, tan insulat to: Juan so ngaran to! Mankelaw iran amin!

⁶⁴Diad saman a bekta ginmapon nansalita lamet si Zacarias, tan inggalang toy Dios.

⁶⁵Ataktakot iray kakaabay da tan kinmayat yan balita ed intiron nipokdul a pasen na Judea.

⁶⁶Ninunnunot ya na amin da ray akabalita tan tinetepet da, Anto kasiy pagmaliwan to yan ogaw? Ta walad sikatoy pakayari na Katawan.

⁶⁷Napnoy Ispiritu Santo si Zacarias ya ama na ogaw tan onyay propisiya to:

⁶⁸Nagalang komuy Katawan a Dios na Israel! Ta nila ton tinulongan tan inyagel so bansa to.

⁶⁹Angibakid sikatayo na makapanyarin Manangilaban, a kabyangan boleg nen David ya aripen to.

⁷⁰Sikato yay insipan to lan abayag diad panamegley da ray masanton propita to.

⁷¹Insipan ton iyagel to itayod saray kalaban tayo, tan ipaliis to itayod saray mamobosul ed sikatayo.

⁷²Imbaga to met a kasian to ray lalaki tayo, tan nunoten toy masanton impisipanan to.

⁷³Sinambaan to ed ama tayon Abraham ya iyagel to itayod saray kalaban tayo, pian anggapoy takot tayon manlingkur ed sikato.

⁷⁴

⁷⁵Magmaliw itayon masanto tan matonung ed pakanengneng to, legan tayon mambilay.

⁷⁶Sika balet, anak, natawag ka a propitay Sankatageyan a Dios. Ta onla kan onona nen say Katawan ya iparaan moy dalanen to;

⁷⁷tan ibagam ed saray totoo to a nilaban ira, diad pakapirdonay kasalanan da.

⁷⁸Maaro tan mapangasiy Dios tayo. Iwandag toy maliwliwawan agew na kilalaban ed sikatayo,

⁷⁹pian nasilewan ton manlapud tawen iray walad bilonget tan anino na patey, tan iwanwan to itayod dalan na kareenan.

⁸⁰Binmaleg imay ogaw tan binmiskeg so ispiritu to. Nanayam ed kalawakan ya anggad insabiy agew a pangiparontal toy sikaton dili ed saray totood Israel.