Read Pangasinan LUCAS 2 Bible Online

LUCAS 2 - Pangasinan bible

LUCAS 2

¹"Diad saraman ya agew, ingganggan nen Impirador Augusto a mampalista ray amin a totoon nasasakopay Impirio na Roma.

²"Agawa yan onaan a palista nen si Cirenio so gobirnador na Siria.

³"Linma sirin a mampalista so balang sakey a too ed dilin baley to.

⁴"Diad Nazaret, Galilea, so panaayaman nen Jose, kanyan linmad Judea ed baley na Betlehem a nianakan nen Ari David. Dimay nila nen Jose, ta kabyangay boleg nen David.

⁵"Kaiba ton mampalista si Maria ya asawaen to. Malokun si Maria,

⁶"tan nen wadman irad Betlehem, asabian lad may pananak.

⁷"Nananak na sakey a laki, a sikato so pangulowan ya anak to. Binalkut toy lamping imay ogaw, insan to imparokul ed sakey ya atotung, ta anggapoy pasen da ed abung a pundowan.

⁸"Walad saman a pasen iray pumapastol a mampupuyat, ta babantayan dad alog iray karniro ra.

⁹"Pinmayawar so sakey ya anghil ed sikara, tan say karlangay Katawan sinmindag ed kaliberliber da. Ontan lay inkataktakot da,

¹⁰balet inkuanto may anghil, Ag kayo natatakot! Ta awit kod sikayoy maung a balitan mangiter na baleg a liket ed amin a katoowan.

¹¹Ta diad sayan agew, nianak ed baley nen David so Manangilaban, say Criston Katawan!

¹²Say pakabirbiran yo onya: naalmo yoy sakey ya ogaw a binalkut ed lamping tan akarokul ed atotung.

¹³Kabebekta, pinmayawar met a kaiba to may anghil so amayamay iran mangatatawen ya anghil a mangigagalang ed Dios:

¹⁴Galang ed Dios ed tawen a sankatageyan, tan diad dalin kareenan ed saray totoon pakaliliketan to!

¹⁵Kaalis da ra may anghil ya ompawil lad tawen, inkuanda ra may pumapastol ed sakey tan sakey, Itilad Betlehem, ta nengnengen tayo yan agawa ya imbalitay Katawan ed sikatayo.

¹⁶Magangganat iran linma sirin, tan nalmo ray Maria tan si Jose, tan say ogaw ya akarokul ed atotung.

¹⁷Nen anengneng da may ogaw, tinongtong da so imbagay anghil ed sikara nipaakar ed samay ogaw,

¹⁸tan mankelaw iray amin ya akadngel ed sayan tinongtong da.

¹⁹Ninunnunot ira yan amin nen Maria tan inyatol to rad puso to.

²⁰Sinmempet ira may pumapastol ya idaydayew tan igalgalang day Dios lapud samay anengneng tan naimatunan da, ya agawa ran amin onung na imbalitay anghil ed sikara.

²¹Kasabiy kumawalon agew, sinegat da may ogaw tan Jesus so impangingaran dad sikato. Saya may ngaran ya inter na anghil kasakbayan a ninginew imay ogaw.

²²Nen asabiy agew a pampalinis di Jose tan Maria, onung ed Ganggan nen Moises, linma rad Jerusalem. Inawit dan isaklang ed Katawan imay ogaw.

²³Ta nisulat ed ganggan na Katawan: Amin a pangulowan ya anak a laki et nakaukolan ya isaklang ed Katawan.

²⁴Wala met so imbagat da, onung ed ganggay Katawan: Sankaparis a palekpek o duaran sibong na malapati.

²⁵Walay lakin manaayam ed Jerusalem a say ngaran to et Simeon. Matonung tan maasingger ed Dios yan too, tan aalagaren to a nilaban so Israel. Walad sikatoy Ispiritu Santo

²⁶ya angipaamtad sikato ya ag ompatey anggad ag to nanengneng so Cristo ya insipay Katawan.

²⁷Diad puyan na Ispiritu, linmad Timplo si Simeon. Nen inloob na saray atateng so ogaw a Jesus ta sumpalen day ibabagay Ganggan,

²⁸inampopo nen Simeon imay ogaw tan inggalang toy Dios. Inkuanto:

²⁹Natan, Katawan, nayarian mo ak lan alaen, siak ya aripen mo, onung na sipan mo.

³⁰Ta anengneng na dilin matak so panangilaban mo,

³¹ya imparaan mod arap na amin a katoowan:

³²Say silew a mamaliwawad saray Hintil, tan mangiter na dayew ed bansam ya Israel.

³³Mankelaw ira may ama tan ina na ogaw ed imbaga nen Simeon nipaakar ed sikato.

³⁴Binindisionan nen Simeon, tan inkuantod Maria ya ina nen Jesus, Pinili na Dios yan ogaw a kaderalan o kilabanan na dakel a totood Israel. Sikatoy sakey a tandan manlapud Dios, balet sumpaen na amayamay a totoo,

³⁵et diad ontan, ombawag iray maamut a nununoten da. Nipaakar met ed sika, singa natoruk na ispada so pusom.

³⁶Wala met so sakey a biin propita ya akolakolaw la. Manngaray Anna tan anak nen Fanuel a kabyangay tribu nen Aser. Pitoy taon labat ya akiamung ed asawa to,

³⁷insan abalo, tan natan walomplo tan apat taon to lan abalo. Ag la onaalis ed Timplo, tan agew-labin igagalang toy Dios diad panamegley na panaayuno tan pampipikasi to.

³⁸Diad saman ya oras, linmad Timplo tan akisalamat ed Dios, insan nansalitay nipaakar ed kinen Jesus diad amin da ray manaalagar ed panondon na Dios ed Jerusalem.

³⁹Nen asumpal da lan ginaway amin a walad ganggay Katawan, pinmawil la rad Galilea, diad baley dan Nazaret.

⁴⁰Binmaleg imay ogaw tan nagmaliw a mabiskeg, napnoy kakabatan, tan inararoy Dios.

⁴¹Tinaon-taon, kapag Pistay Paskua, oonlad Jerusalem iray atateng nen Jesus.

⁴²Nen mantaon na labindua si Jesus, linma rad pista onung na kaogaliyan na saray totoo.

⁴³Kasumpal na pista, linma la ran onsempet. Balet si Jesus tinmilak ed Jerusalem ya ag amtay atateng to.

⁴⁴Abaloan dan kaiba to ray arum a totoon onsesempet met la, kanyan sanagew la ran manaakar, insan da inanap ed saray kakanayon tan kabkabat da.

⁴⁵Nen ag da naalmo, pinmawil irad Jerusalem a mananap ed sikato.

⁴⁶Kayariy taloy agew, nalmo rad dalem na Timplo. Akayorung ed pegley da ray mamaistro, onderengel ed sikara tan tetepetan to ra.

⁴⁷Mankelaw iray amin ya akadngel ed sikato, lapud kakabatan tan saray ebat to.

⁴⁸Mankelaw met iray atateng to nen anengneng da. Inkuanen ina to, Anak, akin et onyay ginawam ed sikami? Mapalaloy pagpaga mi nen amam diad panaanap mid sika.

⁴⁹Inmebat ed sikara, Akin et inanap yo ak sirin a? Ag yo ta amtan nakaukolan a wala ak ed abung na Amak?

⁵⁰Balet ag da atalusan yan imbaga tod sikara.

⁵¹Kaiba ran pinmawil si Jesus ed Nazaret, tan matoluk ed saray atateng to. Inyatol nen ina to ra yan amin ed puso to.

⁵²Binmaleg si Jesus, binmaleg met so kakabatan to, tan say panangaroy Dios tan saray totoo ed sikato.