Read Pangasinan LUCAS 20 Bible Online

LUCAS 20 - Pangasinan bible

LUCAS 20

¹"Aminsan ya agew, nen babangatan nen Jesus iray totoon walad Timplo tan ipupulong toy Maung a Balita, inmasingger iray manonan papari, saray iskriba, tan saray mamatakken na baley.

²"Inkuandad sikato, Ibagam pad sikami: antoy pankatonungan mon manggawad saraya? Siopay angiter ed sikay pankatonungan a manggawad saraya?

³"Inmebat si Jesus, Wala pa labat so tepeten kod sikayo. Ibaga yo pad siak:

⁴"nanlapway pankatonungan nen Juan a mambinyag, nanlapud Dios o nanlapud too?

⁵"Nantetepetan ira, Antoy iyebat tayo? No ibaga tayon nanlapud Dios, ikuantod sikatayo, Akin et ag yo sinisiay Juan ey?

⁶"Balet no ibaga tayon nanlapud too, saray amin a totoo tupaken da tayoy bato, ta manisia ran propita si Juan.

⁷"Kanyan inkuanda, Ag mi amta!

⁸"Inkuan met nen Jesus ed sikara, Ag ko met sirin ibagad sikayo no antoy pankatonungan kon manggawad saraya.

⁹"Insan sinalita nen Jesus yan alimbawa ed saray totoo, Walay sakey a toon nantanem na saray ubas. Impaasikaso tod saray kasamak, tan linmad sananey a bansa a diman manayam a mabayag.

¹⁰Nen asabiy panaon a panagborbor na ubas, imbaki ton miapag ed saray kasamak so sakey ya aripen to. Balet pinepekpek da, insan da pinapawil a kalimalima.

¹¹Angibaki lamet na sananey ya aripen, balet saray kasamak pinepekpek tan pinapabaingan da met, insan da pinapawil a kalima-lima.

¹²Angibaki niy kumatlon aripen, balet sinusugat da, insan da pinapaway ed kaubasan.

¹³Anto kasiy gawaen ko? kuanto may akanubas. Ibakik pay dilin inararok ya anak, ta andi-saew a galangen da!

¹⁴Balet nen anengneng na saramay kasamak, inkuandad sakey tan sakey, Nitan lay mananawir na kaubasan. Pateyen tayo, pian kayaryan ti lay kaubasan!

¹⁵Kanyan impaway dad kaubasan, insan da pinatey. Anto natay gawaen na akankiey kaubasan ed sikara? tinepet nen Jesus.

¹⁶Onlan papatey to ra man a totoo, insan to ipaasikasoy kaubasan ed saray arum. Nen nadngel ya na saray totoo inkuanda, Ag komun nagawa tan!

¹⁷Ninengneng ira nen Jesus tan tinepet to, Anto sirin so labay ya ibagay Masanton Sulat? Say baton imbantak na saray karpintiro, nagmaliw lamlamang a sankakanaan a bato.

¹⁸Siopamay napelag ed sayan bato, nabuybuyak. Tan siopamay napataan to yan bato, magmaliw a singa dabuk ed katemek to.

¹⁹Saray iskriba tan saray manonan papari ginetma ran erelen si Jesus ed saman a bekta, lapud amta ran sikaray papasikian tod sayan alimbawa. Balet ag da ya nagawaan, ta antakot da ray totoo.

²⁰Kanyan inalagar day pankanawnawan mangerel ed sikato. Wala ray inopaan dan totoo a mankonkonwariyan a maung iran totoo. Imbaki da ran mangerel ed kinen Jesus, diad panamegley na pantepet da, pian nipalima rad pakayari tan pakaoley na Gobirnador.

²¹Inkuanda ra yan ispia ed kinen Jesus, Maistro, kabat min tua ray amin ya ibabagam tan ibabangat mo. Kabat mi met ya aliwa kan manangibiig, no ag ta ibabangat mo ray totoo no antoy linawa na Dios nipaakar ed sikara.

²²Ibagam pa sirin ed sikami: sumpad Ganggan kasi so pambayar na buis ed Impirador na Roma, odino andi?

²³Balet atebek nen Jesus so maoges a getma ra, kanyan kuantod sikara,

²⁴Ipanengneng yo pad siak so sakey a kuartan pilak. Siopay akanlupa tan akanngaran na nitatak ed kuarta? Say Impirador, ebat da.

²⁵Inkuanen Jesus, No ontan sirin, iter yod Impirador so nabebetangay Impirador, tan iter yo met ed Dios so nabebetangay Dios.

²⁶Diad arap na totoo, ag dan balut naerel si Jesus ed panagsalita to. Mankelaw irad ebat to, kanyan ag la ra inmesel.

²⁷Wala ray pigaran Saduseo a linmad kinen Jesus. (Sikara yay mangibabagan ag onolid bilay iray inaatey.) Tinepet da,

²⁸Maistro, insulat nen Moises yan ganggan para sikami: No inatey so sakey a lakin anggapoy ilalak, nakaukolan ya asawaen na agi to may abalo, pian mananak ira para samay inatey.

²⁹Wala nen saman iray pitoran sanaagi. Angasaway pangulowan, balet inatey ya anggapoy ilalak.

³⁰Say kumadwad pangulowan inasawa to may balo na kuya to, balet inatey met ya anggapoy ilalak.

³¹Ontan to met so agawad kumatlon agi, ya anggad kumapito. Inaatey iran amin ya anggapoy ilalak.

³²Diad kaonuran, inatey met imay bii.

³³Natan, diad iyolid bilay na saray inaatey, siopay makanasawa ed samay bii, anta amin da ra may pitoran sanaagi et nambabalesan dan inasawa?

³⁴Inmebat si Jesus ed sikara, Diad sayan bilay, mangasawa ray lalaki tan miasawa ray bibii.

³⁵Balet saray lalaki tan saray bibiin nibilang ed saray manepeg ya onolid bilay, tan makakar ed biek a bilay, ag la ra mangasawa o miasawa.

³⁶Ag la ra nayarin ompatey, ta singa ra saray anghil. Anak iray Dios, ta inmoli rad bilay.

³⁷Anggan si Moises a dili papaneknekan ton naolid bilay iray inaatey. Diad samay tongtong a nipaakar ed manliub ya abeban kiew, sinalita to a say Katawan et Dios nen Abraham, Dios nen Isaac, tan Dios nen Jacob.

³⁸Say labay to yan ibaga sikatoy Dios na saray mabilay, aliwan Dios na saray inaatey, ta diad sikato mabilay ya amin iray katoowan.

³⁹Inkuan na pigaran iskriba, Marakep itan ya ebat mo, Maistro!

⁴⁰Nanlapud saman, anggapo lay akakpel a mantepet ed kinen Jesus.

⁴¹Inkuanen Jesus ed sikara, Panoy pangibaga ran say Cristo et kabyangay boleg nen David?

⁴²Ta si David a dili so angikuan, diad libro na saray Salmo: Say Katawan inkuantod Katawan ko: Yorung ka ed nikawanan ko,

⁴³anggad napasukok ed sika ray kalaban mo!

⁴⁴Tinawag sirin nen David na Katawan so Cristo. Panon sirin a sikatoy kabyangay boleg nen David?

⁴⁵Leleg ya onderengel ya amin iray totoo ed kinen Jesus, inkuantod saray disipulo to,

⁴⁶Manalwar kayod saray iskriba, a labalabay day akar-akar ya andokey so saloy na kawes da, tan igalgalang irad publiko. Labalabay dan pilien iray manonan yorungan ed saray sinagoga tan diad saray ponsia.

⁴⁷Kakatkatan da ray balon bibii, insan mampikasi ray andorokey a panisimula rad gagawaen da. Lalon ombelat so dusa ra!