Read Pangasinan LUCAS 21 Bible Online

LUCAS 21 - Pangasinan bible

LUCAS 21

¹"Nen tinmangway Jesus, anengneng to ray mamayaman a mangipepelag na donasion dan kuarta diad panagpelagan ed Timplo.

²"Anengneng to met so mairap-bilay a biin balo a mangipepelag na duaran sinsilyo.

³"Inkuanto, Kuankod sikayo a dakel ni so inter to man a mairap-bilay a balo nen saray amin da ray arum.

⁴"Ta say inter na arum manlalapud soluk na kayamanan da, balet anggan mairap-bilay man a balo, inter toy amin a pambilay to.

⁵"Pantotongtongan na pigarad sikara so nipaakar ed Timplo, saray mararakep a bato ya inkana tan saray bagat ed Dios. Balet inkuanen Jesus,

⁶"Nipaakar ed amin da ra yan nanenengneng yo natan: onsabi ray agew ya anggapoy anggan sakey a baton natilak ed pasen to, ta nageba ran amin.

⁷"Maistro, tinepet da, kapigan nagawa ya? Tan antoy pakapatnagan ya asingger lan nagawa?

⁸"Inkuanen Jesus, Manalwar kayo tan ag kayo palilingo ed siopaman! Ta amayamay iray onsabi tan ikana ray ngaran ko ya ikuanda, Siak so Cristo! tan Sinmabi lay panaon! Balet ag yo ra totombuken.

⁹"Ag kayo natatakot no nabalitaan yo ray bakabakal tan gologolo. Nakaukolan ya onona ra yan nagawa, balet aliwa nin asingger so anggaay mundo.

¹⁰Inkuanto nid sikara, Manlalaban iray bansa; ontan da met iray nanarian.

¹¹Wala ray onsabin maksil a yegyeg, eras, tan sakisakit diad nandoroman pasen. Onletaw iray makapataktakot a bengatla tan makapakelkelaw iran tandan manlapud tawen.

¹²Balet kasakbayan a nagawa ra yan amin, erelen da kayo, insan da kayo pairapen. Iyakar da kayod saray sinagoga tan saray prisowan. Iyarap da ki met ed saray arari tan saray gobirnador, lapud siak.

¹³Sikato yay pankanawnawa yon mantasid siak.

¹⁴Paligen yo, lad kanunotan yo ya ag yo panggugunigonan no panoy pangyagel yod sikayon dili,

¹⁵ta itdan ta kayoy kakabatan tan panagsalitan ag nasarag a sumlangen o paandien na saray amin a kalaban yo.

¹⁶Mantraidor ed sikayoy anggan saray dilin atateng, agagi, kakanayon, tan kakaaro yo. Papatey da ni ray arum ed sikayo.

¹⁷Bosulen kayoy amin a katoowan lapud siak,

¹⁸balet anggapoy anggan sakey a naandin buek ed olo yo.

¹⁹Mananos kayo, pian nagamuran yoy tuan bilay.

²⁰No nanengneng yon aliber na sondalo so Jerusalem, amta yo lan asingger lay kaderal to.

²¹Nakaukolan ed satan ya ombatik ed kapalandeyan iray taga Judea, ontaynan iray walad siudad, tan ag la onlad siudad iray walad kalawakan.

²²Ta saraya lay Agew na Dusa, pian ontuay amin ya ibabagay Masanton Sulat.

²³Agaylay panirap da ray malokun tan saray walay anak nin mansususo! Ta makapataktakot so onsabin kairapan ed sayan bansa, tan say onsabin pasnuk na Dios ed sarayan totoo.

²⁴Ompatey irad ispada, awiten da ran aripenen ed amin a bansa, tan deralen na saray Hintil so Jerusalem, anggad nasumpal so panaon da.

²⁵Onletaw iray tanda ed agew, bulan, tan saray bitewen. Diad dalin, saray bansa nagolo rad kataktakot dad saray daluyon tan say ungol na dayat.

²⁶Patey-pateyan iray totood takot da diad panalagar dad kairapan ya onsabid sankamundoan, ta ag natombuk na saray pakayarid liwang so gendat a kinaoksuy da.

²⁷Insan nanengneng day Anak na Too ya onsasabin walad lorem tan walaay pakayari tan baleg a kagalangan.

²⁸No ginmapo la ra yan nagawa, alagey kayo tan tangay kayo, ta asingger lay kilalaban yo.

²⁹Insan sinalita nen Jesus so sakey ya alimbawa, Nengneng yoy sengeg na igos tan arum iran kiew.

³⁰No ompapaway la ray bolubolung da, amta yon asingger lay tiagew.

³¹Ontan met, no nanengneng yo la ra yan nagagawa, amta yon magano lan onsabiy Panariay Dios.

³²Tandaan yo ya! Nagawa ra yan amin kasakbayay ipatey da ray totood sayan panaon.

³³Naandipat so tawen tan dalin, balet ag balut naandipat iray salitak.

³⁴Manalwar kayo! Ag kayo mapalalon kapaakan tan kapabuek, tan ag kayo met kapagunigon ed panagbilay yo, ta ompan biglan onsabid sikayo yan Agew

³⁵tan ag kayo akaparaan. Ta diad sayan Agew onsabid amin a katoowad intiron mundo ya ag da naamamtaan.

³⁶Kanyan nakaukolan a sipaparaan kayo lawas tan ag yo totondaay mampikasi, pian nawalaan kayoy biskeg ya ompaliis ed amin da ra yan nagawa, tan makapiarap kayod Anak na Too.

³⁷Inagew-agew a nambabangat ed Timplo si Jesus. Kapag onsironget la, ontaynan diman tan mansanlabiyan ed Palandey na Kaolibaan.

³⁸Kabkabwasan ya onlad Timplo ray totoon ondengel ed sikato.