Read Pangasinan LUCAS 23 Bible Online

LUCAS 23 - Pangasinan bible

LUCAS 23

¹"Inmalagey iran amin, insan da inyakar si Jesus ed kinen Pilato.

²"Ginapoan dan inakusa, Narel mi yan too, inkuanda, a sosogsogan to ray totoo mi a manggaway aliwa. Isesebel to met so pambayar na buis ed Impirador. Ibabaga to nid saray totoo a sikatoy Cristo, say sakey ya ari.

³"Tinepet nen Pilato, Sikay ari da ray Judio? Sika lan dili so mangibabaga, ebat nen Jesus.

⁴"Inkuanen Pilatod satan ed saray manonan papari tan saray totoo, Anggapoy naalmok a kasalanan to yan too.

⁵"Balet lalon kuandan impasoot, Diad panamegley na pambabangat to, nasosogsogan iray totoo. Inggapo tod Galilea, insan diad intiron Judea, tan wadya la natan.

⁶"Nen nadngel ya nen Pilato, tinepet to, Akin, taga Galiea yan too?

⁷"Nen akabatan ton si Jesus et nanlapud pasen a nasasakopan nen Herodes, imbaki toy Jesus ed sikato ta wadman ed Jerusalem ed saraman ya agew.

⁸"Makaliliket si Herodes nen anengneng toy Jesus, ta abayag lan mampipirawat a napilupaan to yan too, lapud amayamay lay abalitaan ton nipaakar ed sikato. Maniilalon nanengneng ton manggaway milagro si Jesus.

⁹"Kanyan abayag a tinepetan to, balet ag balut inmebat si Jesus.

¹⁰Inmasingger iray manonan papari tan saray iskriba tan ontan lay impangakusa rad kinen Jesus.

¹¹Si Herodes tan saray sondalo to niludlurey tan pinapabaingan day Jesus. Sinolungan day marakep a kawes, insan da impawil ed kinen Pilato.

¹²Diad saman ya agew, akapankaaroy Herodes tan si Pilato, saray gendat a mambobosulan.

¹³Impatawag nen Pilato ray manonan papari, saray opisyal na baley, tan saray totoo,

¹⁴tan inkuantod sikara, Inyakar yo yan tood siak, ta kuanyon sosogsogan to ray totoo a manggaway aliwa. Natan, inosisak la tan naimatunan yo met, balet nalmoan ko ya anggapoy kasalanan to ed saray ipapakasalanan yod sikato.

¹⁵Anggapo met so nalmoan nen Herodes a kasalanan to, kanyan pinapawil to diad sikatayo. Anggapoy ginawa to yan too a makasengeg na pamateyan ed sikato.

¹⁶Kanyan pasipsiplatan ko, insan ko la ibolus.

¹⁷

¹⁸Balet nankakasakey ya inmeyag iran amiy totoo, Pateyen itan a too! Si Barabbas so labay min ibolus mo!

¹⁹(Aprisoy Barabbas lapud golon agawad siudad, tan lapud impamatey to.)

²⁰Si Jesus balet so labay nen Pilato ya ibolus, kanyan nansalita lamet ed saray totoo.

²¹Balet lalon inmeyag ira, Ipasak mod krus! Ipasak mod krus!

²²Pinitlo nen Pilato ya inkuan ed sikara, Akin, antoy ginawa ton kasalanan? Anggapoy naalmoan kon ginawa ton makasengeg na pamatey ed sikato! Kanyan pasipsiplatan ko, insan ko la ibolus.

²³Balet lalon inkasikasil dan ineyag a nepeg ya ipasak ed krus si Jesus. Diad kaonuran, analoy impaneeyag da.

²⁴Kanyan insintinsia nen Pilato ed kinen Jesus imay kekerewen da.

²⁵Imbolus to may toon papaibolus da, samay apriso lapud impanggolo tan impamatey to. Insan impalima toy Jesus ed sikara, pian nagawaan dad sikato so labay da.

²⁶Nen iyaakar dan ipasak ed krus si Jesus, nabet day sakey a lakin nanlapud bario. Taga Cirene yan too, tan manngaray Simon. Sinabat da, tan impasakbat day krus ed sikato, insan da pinatombuk ed kinen Jesus.

²⁷Amayamay iray totoon tinmotombuk ed kinen Jesus, pati saray bibiin mannangnangis tan maneermen lapud sikato.

²⁸Nilingaw nen Jesus ira tan inkuanto, Bibiin taga Jerusalem! Ag yo ak nanangisan. Nangisan yo ingey sikayon dili tan saray anak yo.

²⁹Ta onsabi la ray agew ya ikuanda ray totoo, Mapalar iray bibiin lepes, saray ag mananak, tan saray ag nampasuso!

³⁰Diad sarayan agew, saray totoo ikuandad saray palandey, Tumbaan yo kami! tan diad saray pokdul. Tabunan yo kami!

³¹No gawaen da yad siak a kaparay mabilay a kiew, anto la kasiy gawaen dad sikayo a kaparay amagaan a kiew?

³²Wala met iray duaran kriminal ya inyakar dan pateyen a kabansag nen Jesus.

³³Nen sinmabi rad pasen a tatawagey Lapis-lapis na Olo, diman da impasak ed krus si Jesus. Impasak da met ed sansakey a krus ira may duaran kriminal, say sakey diad nikawanan tan say sakey diad nikawigi nen Jesus.

³⁴Inkuanen Jesus, Ama, pirdonam ira, ta ag da amtay gagawaen da! Kayari ran nampapalaranan iray kawes to, inapag da.

³⁵Manalalagey iray totood man tan bambantayan day Jesus; balet saramay opisyal na baley niludlurey da. Inkuanda, Inlaban to ray arum. Ilaban to met komuy laman ton dili, no tuan sikatoy Cristo a piniliy Dios!

³⁶Niludlurey met na saray sondalo; inasinggeran da, initdan day alak

³⁷tan inkuanda, Ilaban moy sikan dili, no tuan sikay ari da ray Judio!

³⁸Onyay akasulat ed olowan to: Sikato yay Ari da ray Judio.

³⁹Pinapabaingan na sakey ed saramay mambitbitin a kriminal. Inkuanto, Aliwa tan sikay Cristo? Ilaban moy sikan dili tan pati sikami met!

⁴⁰Balet nampasnukan na samay kaiba to ya inkuanto, Ag mo tatakotay Dios, anta namparay dusam ed sikato?

⁴¹Nepeg tan dua so nadusay onya lapud ginawa ta, balet sikato anggapoy kasalanan a ginawa to.

⁴²Insan inkuantod kinen Jesus, Nunot mo ak, Jesus, no kasabim ed Panarian mo!

⁴³Inkuanen Jesus ed sikato, Kuankod sika: diad sayan agew, kaiba mo ak ed Paraiso.

⁴⁴Sakey ya alas dosid kaagewan ya anggad alas tris ed ngarem nen binmilonget so intiron dalin,

⁴⁵naandiay liwawa so agew, tan apaldua so kurtina na Timplo.

⁴⁶Inmeyag na maksil si Jesus tan inkuanto, Ama, iyawat kod saray limam so ispirituk! Kapangibaga to ya, inatey.

⁴⁷Nen naimatunan yan agawa na kapitan da ray sondalo, indayew toy Dios. Inkuanto, Tua a matonung yan too!

⁴⁸Sayan agawa naimatunan na amin da ra may dinmagop a nambantay, tan sinmempet iran tapuk-tapuken day kapagewan da.

⁴⁹Manalalagey ed bandad arawi ray amin a kakaaro nen Jesus, pati saramay bibiin tinmombuk ed sikaton nanlapu lad Galilea, tan naimatunan da ra yan agawa.

⁵⁰Walay sakey a lakin manngaray Jose, taga Arimatea a sakey a baley na saray Judio. Maung tan matonung yan too, tan sakey met ed saray manaalagar ed Panariay Dios. Anggaman a kabyangan na Sanidrin, ag inmabuloy ed nankakasakeyan dan gawaen ed kinen Jesus.

⁵¹

⁵²Linmad kinen Pilato tan kinerew ton alaen so bangkay nen Jesus.

⁵³Inepas to sirin so bangkay nen Jesus, binalkut tod sidan abel, insan to insorub ed lobuk ya inongib ed bato tan ag nin balut angipomponan.

⁵⁴Agew na Panagparaan ed saman ya agew, tan ngalngali la onggapoy Agew na Panagpainawa.

⁵⁵Akilad kinen Jose ira may bibiin tinmombuk ed kinen Jesus a nanlapu lad Galilea. Anengneng da may lobuk tan say impangiyan diman ed bangkay nen Jesus.

⁵⁶Kasumpal to, sinmempet ira tan angiparaan iray pabalingit tan mira a para samay bangkay. Nen Agew na Panagpainawa, nampainawa ra, onung na ibabagay Ganggan.