Read Pangasinan LUCAS 6 Bible Online

LUCAS 6 - Pangasinan bible

LUCAS 6

¹"Aminsan ya Agew na Panagpainawa, ondaralan ed katrigowan si Jesus tan saray disipulo to. Lapud narasan ira nanaala ray disipulo to na bungay trigo, nililirlir dad lima ra, tan kinakakan da.

²"Tinepet na pigaran Pariseo, Akin et gagawaen yoy sebel no Agew na Panagpainawa?

³"Inmebat si Jesus ed sikara, Ag yo ta nin balut abasa so ginawa nen David nen sikato tan saray kakaiba to et narasan ira?

⁴"Linmoob ed abung na Dios, inala toy tinapay ya imbagat ed Dios, insan to kinan. Initdan to met iray kakaiba to anggaman ya, onung ed Ganggan, saray papari labat so nayarin mangan ed saman.

⁵"Inkuanto nid sikara, Say Anak na Too so Katawan na Agew na Panagpainawa.

⁶"Aminsan met ya Agew na Panagpainawa, linmay Jesus a mambangat ed sinagoga. Walad may lakin aparalisis so sakey a lima to.

⁷"Wala rad may iskriba tan Pariseo a manaanap na ipakasalanan dad kinen Jesus, kanyan siniim da no manambal kasi no Agew na Panagpainawa.

⁸"Balet amta nen Jesus so walad kanunotan da, kanyan inkuantod samay lakin aparalisis so lima to, Gala tan alagey ka diad arap. Dinmago may laki tan nanalagey diman.

⁹"Insan inkuanen Jesus ed sikara, Tepeten ta kayo pa: Antoy nayarin gawaen no Agew na Panagpainawa, onung ed Ganggan? Say panggaway maung, o say panggaway maoges? Say panambot na bilay o say pamatey ed sakey a too?

¹⁰Ninengneng ton amin iray walad kaliber-liber to, tan inkuantod samay laki, Iyonat moy limam! Inyonat ton tuay lima to, tan inmabig ed saman a bekta.

¹¹Mapalaloy pasnuk da ra may iskriba tan Pariseo. Nantotongtongan da no antoy gawaen dad kinen Jesus.

¹²Diad saman a panaon, linmay Jesus ed nipalandey a pasen tan sanlabin nampikasid man ed Dios.

¹³Kasabiy kabwasan, tinawag to ray disipulo to, tan pinili tod sikaray labindua, tan inngaran to ray apostol.

¹⁴Sikara yay pinili to: si Simon ya nginaranan toy Pedro, tan si Andres ya agi to; si Santiago tan si Juan, si Felipe tan si Bartolome,

¹⁵si Mateo tan si Tomas, si Santiago ya anak nen Alfeo tan si Simon a Patriota,

¹⁶si Judas ya anak nen Santiago, tan si Judas Iscariote a pinmaway a traidor.

¹⁷Kaleksab da, inmalagey si Jesus ed nipatar a pasen. Dakerakel met iray wadman a disipulo to, tan amayamay a totoon nanlapud intiron Judea tan Jerusalem, tan saray pasen ed gilig na dayat a nasasakopay Tiro tan Sidon.

¹⁸Dinmago ran mandengel ed kinen Jesus tan mampatambal na sakisakit da. Dinmago met iray papairapen na saray ispiritun maoges, tan pinapaabig to ra.

¹⁹Labay na amin a totoo a diwiten si Jesus, ta walay pakayarin manlalapud sikato a mamapaabig ed sikaran amin.

²⁰Ninengneng nen Jesus iray disipulo to tan inkuanto: Maliket kayon mairap-bilay, ta kayaryan yoy Panarian na Dios!

²¹Maliket kayon narasan natan, ta napesel kayo! Maliket kayon mannangis natan, ta napaliket kayo!

²²Maliket kayo no bosul-bosulen, ipolpolisay, pabpabaingan, tan pagpaogesen da kayo, lapud Anak na Too!

²³Manggayaga kayo tan lukso kayod liket no nagawa ya, ta balbaleg so tumang yod tawen. Onya met so ginagawa na saray lalaki ra ed saray propita.

²⁴Pakaskasi ki la, sikayon mamayaman, ta naawat yo lay ligliwa yo!

²⁵Pakaskasi ki la, sikayon napepesel natan, ta naerasan kayo! Pakaskasi ki la, sikayon maneelek natan, ta onermen tan onakis kayo!

²⁶Pakaskasi ki la no daydayewen kayoy amin a totoo, ta onyay ginagawa na saray lalaki ra ed saray tila-tilan propita.

²⁷Balet kuankod sikayon onderengel ed siak: Aro yo ray kalaban yo, manggawa kayoy kamaungan ed saray mamobosul ed sikayo,

²⁸kerew yod Dios a bindisionan to ray mangisasambad sikayo, tan pikasi yo ray mamapairap ed sikayo.

²⁹No walay manampal na sakey ya aping mo, patampal mo niy pagpag. No walay mamasoot a mangalay kawes mo, iter mo ni ingey kamisitam.

³⁰No walay siopaman a mikerew ed sika, iter moy kerewen to. No walay mangalay antokaman a kayaryan mo, ag mo la bababawien.

³¹Gawa yod kapara yon totoo so labay yon gawaen da met ed sikayo.

³²No saray mangaarod sikayo labat so aaroen yo, anto niy tumang ya alagaren yo? Anggan saray makasalanan aaroen da met iray mangaarod sikara!

³³No saray manggaway kamaungan ed sikayo labat so panggawaan yoy kamaungan, anto niy tumang ya alagaren yo? Gagawaen ya met na anggan saray makasalanan!

³⁴No saray ilaloan yon makabayar labat so papautangen yo, anto niy tumang ya alagaren yo? Anggan saray makasalanan pautangen da met iray makasalanan ya amta ran makabayar!

³⁵Aliwan ontan! Aro yo ray kalaban yo, tan manggawa kayoy kamaungan ed sikara. Mamabayes kayo ya ag yo ilaloan lan ompawil. No sikato yay tombuken yo, balbaleg so naawat yon tumang tan nibilang kayon anak na Sankatageyan a Dios. Ta maung so Dios ed saray maoges tan saray ag da amtay mamirbir na utang na linawa.

³⁶Nepeg yoy mapangasi, a singa say mapangasin Ama yo.

³⁷Ag yo sisintinsiaay kapara yon too, pian ag kayo met sintinsiaay Dios. Ag yo dudusaey kapara yon too, pian ag kayo met dusaey Dios. Pirdona yoy kapara yon too, pian pirdonaen kayo met na Dios.

³⁸Mangiter kayod kapara yon too, pian mangiter met so Dios ed sikayo. Say iter na Dios ed sikayo et singa salup a pinatuk, pinerper tan mantampuwag. Ta no panoy panukat yod arum a too, ontan met so panukat na Dios ed sikayo.

³⁹Sinalita met nen Jesus yan alimbawa, Ag nayarin itabin na bulag so kapara ton bulag, ta no andi napelag iran duad banawang.

⁴⁰Anggapoy babangatan a palabsanan toy bumabangat to. Balet balang babangatan ya asumpal to lay aral to, mipara lad bumabangat to.

⁴¹Akin et imanoen moy mokat ed matay agim, balet et ag mo naimanoy troson wadtad dilin matam?

⁴²Panoy pangibagam ed agim, Agi, gala pa ta ekalen koy mokat ed matam, no ag mo nanengneng so troson wadtad dilin matam? Mansimpisimpitan! Ekal mo nin onona so troson wadtad matam, insan ka makanengneng a maung tan naekal moy mokat ed matay agim.

⁴³Anggapoy maung a kiew a mambungay makapoy, tan anggapoy makapoy a kiew a mambungay maung.

⁴⁴Diad bunga so pakabirbiran no maung o makapoy so sakey a kiew. Ta say igos ag naborbor ed kasabitan, tan say ubas ag naborbor ed sengeg ya aliwan ubas.

⁴⁵Maung so manlalapud maung a too, lapud napnoy puso to na kamaungan. Maoges so manlalapud maoges a too, lapud napnoy puso to na kaogsan. Ta manlalapud puso so ibabalikas na sangi.

⁴⁶Akin et tatawagen yo ak na Katawan, Katawan! et ag yo lamlamang totombukey ibabagak?

⁴⁷Ipanengneng kod sikayo no antoy aliling na toon onsisingger ed siak, ondedengel, tan ontotombuk ed saray salitak.

⁴⁸Aliling toy sakey a toon angotkot na aralem, tan inletneg tod baton-dampay so pundasion na abung ya impaalagey to. Dinmelap, tan say maksil a danum binmasig ed saman ya abung, balet ag agalaw, lapud malet so inkagawa to.

⁴⁹Say toon ondengel ed saray salitak, balet et ag to ra lamlamang tombuken, aliling toy sakey a toon angipaalagey na abung ed dalin tan anggapoy pundasion. Nen sinmabiy delap, nagban tampol iman ya abung, tan makapataktakot so inkaderal to!