Read Pangasinan LUCAS 7 Bible Online

LUCAS 7 - Pangasinan bible

LUCAS 7

¹"Kasumpal nen Jesus ya imbaga ra ya amin ed saray totoo, linmad Capernaum.

²"Walad may sakey a kapitan na sanlasus a sondalo a say inararo ton katulong et mansasakit tan ngalngali la ompatey.

³"Nen abalitaan toy nipaakar ed kinen Jesus, angibaki na pigaran mamatakken a Judio, ta kerewen dad kinen Jesus a paabigen to may katulong na kapitan.

⁴"Linma ra sirin ed kinen Jesus tan akikasi ra, Manepeg a tulongan mo yan too,

⁵"ta inaro toy a bansa tayo. Impaalageyan to itayo niy sakey a sinagoga.

⁶"Akila sirin si Jesus ed sikara. Nen asingger lad abung, angibaki may kapitan na kakaaro to ed kinen Jesus tan impaibaga to, Katawan, ag mo la aabalaey sikan dili. Ag ak manepeg a laen mo nid abung ko.

⁷"Ontan met ya ag ak manepeg ya onlad sika. Ibagam labat lay salita, et onabig lay katulong ko.

⁸"Ta sakey ak met a walad silong na pakaoley na arum a totoo, tan wala met iray sondalo ed silong na pakaoley ko. Kanyan no kuankod sakey, Laka! onla; no kuankod sananey, Gala! ondago. No iganggan kod aripen ko, Gawam ya! gawaen to.

⁹"Mankelaw si Jesus nen nadngel to ya. Inarap to ray totoon ontotombuk ed sikato tan inkuanto, Kuankod sikayo: ag ko ni akarumog na ontan lan pananisiay too, ya anggan diad Israel!

¹⁰Kapawil dad abung na kapitan ira may totoon imbaki, asabian dan inmabig la may katulong.

¹¹Ag abayag, linmay Jesus ed sakey a baley a manngaray Nain. Akilad sikato ray disipulo to tan saray dakerakel a totoo.

¹²Nen asingger lad puirtay baley, nabet toy tolur na bogbogtung a lakin anak na sakey a biin balo. Amayamay iray mitotolur.

¹³Nen anengneng na Katawan imay ina na inatey akasian to, kanyan inkuanto, Ag ka onaakis.

¹⁴Inmasingger, insan to diniwit so longun, kanyan tinmonda ra may mangaawit. Inkuanto natan, Balolaki, kuankod sika, bangon ka!

¹⁵Inmalagey imay inatey tan ginapoan toy mansalita, tan inter nen Jesus ed samay ina to.

¹⁶Asabiay takot iray amin a wadman, tan indaydayew day Dios. Inkuanda, Sinmabid pegley tayo so matalonggaring a propita! Ag nilingwanay Dios ya ilaban iray totoo to!

¹⁷Binmawag yan balitan nipaakar ed kinen Jesus ed intiron Judea tan diad amin a kaliber-liber a pasen.

¹⁸Saray disipulo nen Juan imbalita rad sikato ra yan amin. Tinawag nen Juan so duarad sikara,

¹⁹tan imbaki to rad Katawan a manepet, Sika may aalagden min onsabi, o manalagar kami niy sananey?

²⁰Kasabi rad kinen Jesus inkuanda, Imbaki kami dia nen Juan a Managbinyag tan patetepet to no sika may aalagden min onsabi o manalagar kami niy sananey.

²¹Diad saman ya oras, pinapaabig nen Jesus iray amayamay a mansasakit, saray nanairapan, tan saray inaaponay dimonyo. Iniitdan toy pakanengneng met iray amayamay a bulag.

²²Inmebat ed saramay imbaki nen Juan, Pawil kayod kinen Juan tan ibaga yoy anengneng tan nadngel yo: saray bulag makakanengneng ira, saray lopuy makakaakar ira, saray akating onaabig ira, saray telek makakadngel ira, saray inaatey nabibilay ira, tan saray mairap-bilay nipupulong ed sikara so Maung a Balita.

²³Maliket so toon ag naekalay pananisia ed siak!

²⁴Nen kasiput da ra may imbaki nen Juan, nansalitay Jesus nipaakar ed kinen Juan, Nen linma kayod kalawakan, antoy getma yon nengnengen? Sakey kasin bolo ya ipapalig-palig na dagem?

²⁵Anton talaga so labay yon nengnengen? Sakey a toon akakawes na marakep? Walad saray palasio ray mankakawes na mararakep tan mambibilay ed inawa!

²⁶Anton talaga so labay yon nengnengen diman? Sakey a propita? On, kuankod sikayo, matalona nen say propita so anengneng yo.

²⁷Ta nipaakar ed kinen Juan so ibabagay Masanton Sulat: Inkuay Dios, Niay managpulong ko. Sikatoy ibakik ya onona nen sika a mangiparaay dalanen mo!

²⁸Kuankod sikayo a si Juan so sankatalonaan ed amin da ray totoon nianak, balet matalona ni nen sikato so toon sankaabebaay pasen ed Panariay Dios.

²⁹Dinengel na amin ya ombaley si Jesus, pati saray sumisingil na buis. Sikaray amirbir a matonung so Dios nen nampabinyag irad kinen Juan.

³⁰Balet ag sinumpal na saray Pariseo tan saray iskriba so linaway Dios para sikara, ta ag ira nampabinyag ed kinen Juan.

³¹Intuloy nen Jesus, Antoy pangiparaan kod saray totood sayan panaon? Antoy kaparpara ra?

³²Singa ra ogogaw a manyodyorung ed tindaan ya eeyagan da ray kagalaw da, Tinogtogan mi kayoy sasayawan, ag ki met sinmayaw; angansion kamiy makapaermen, ag ki met inmakis!

³³Sinmabiy Juan a Managbinyag, manaayuno tan ag oniinom na alak, balet kuanyo, Walay dimonyo ed sikato!

³⁴Sinmabiy Anak a Too, mangakan tan oniinom, balet kuanyo, Nengneng yo yan too. Masiba tan mainom na alak, tan kakaaro to ray sumisingil na buwis tan saray makasalanan!

³⁵Anggaman ontan, diad saray gawgawa so pakapatnagan a tua so kakabatay Dios.

³⁶Inimbitaan na sakey a Pariseo si Jesus a mangan ed abung to. Linma sirin si Jesus ed abung to may Pariseo tan dinmongo a mangan.

³⁷Diad saman a baley, walay biin bantug a makasalanan. Nadngelan ton mangakay Jesus ed abung to may Pariseo, kanyan linman sankaawit toy botilyan alabastro a napnoy pabalingit.

³⁸Inmasingger ed nibeneg nen Jesus, diad saliyan to. Mannangnangis diman tan manterter so lua to ed sali nen Jesus. Pinonasan to ray sali nen Jesus na buek to, inanguban to ra tan pinoyukan to ray pabalingit.

³⁹Nen anengneng ya na samay Pariseon angimbita, inkuantod sikaton dili, No tuan propita yan too, kabat to komun no siopa yan bii so mandiriwit ed sikatosakey a makasalanan!

⁴⁰Simon, inkuanen Jesus, wala pay labay kon ibagad sika. Anto man, Maistro? ebat to.

⁴¹Inkuanen Jesus, Walay duaran too ya akautang ed sakey a managpabayes na kuarta. Say sakey akautang na sanliboy pisos tan samay sakey akautang met na sanlasus pisos.

⁴²Anggapod sikaran duay makabayar, kanyan pinirdona to la ray utang da. Siopa natan ed sikaran duay lalon baleg so pangaro tod samay managpabayes?

⁴³Samay lalon dakel so utang ton apirdona, ebat nen Simon. Dugay ebat mo, kuanen Jesus.

⁴⁴Insan to nilingaw imay bii tan inkuantod kinen Simon, Nanenengneng mo yan bii, anto? Linmoob ak ed abung mo, et ag mo ak labat initdan na danum a panoras ko ray salik. Balet sayan bii inorasan to ray salik na lua to, tan pinonasan to ra na buek to.

⁴⁵Ag mo ak inanguban, balet ag to tinondaan ya inangub-anguban iray salik nanlapud insabik dia.

⁴⁶Ag mo anggan nilarakay olok, balet sayan bii pinoyukan to ray salik na pabalingit.

⁴⁷Kanyan kuankod sika ya apirdona ray amayamay a kasalanan to; papaneknekan ya na impanengneng ton balbaleg a panangaro to. Balet say toon dagdaiset so kasalanan ton apirdona, dagdaiset met so panangaron ipanengneng to.

⁴⁸Insan kuanen Jesus ed samay bii, Apirdona la ray kasalanan mo.

⁴⁹Saray karongo tod lamisaan inkuandad sikaran dili, Siopa ya kasin too et mamipirdonay pati anggan saray kasalanan?

⁵⁰Balet inkuanen Jesus ed samay bii, Say pananisiam so angilaban ed sika. Laka la, tan pakpel moy linawam.