Read Pangasinan JUAN 1 Bible Online

JUAN 1 - Pangasinan bible

JUAN 1

¹"Diad gapoy gapo wala la so Salita. Say Salita kaibay Dios tan sikatoy Dios.

²"Diad gapoy gapo kaiba lay Dios so Salita.

³"Diad panamegley to apalsa ya amiy bengatla; anggapoy bengatlan apalsa ya aliwan diad panamegley to.

⁴"Say Salita so nanlapway bilay, tan sayan bilay so silew da ray katoowan.

⁵"Onsisindag ed kabilongetan so silew tan ag balut naerep na kabilongetan.

⁶"Imbaki na Dios so sakey a toon manngaray Juan.

⁷"Linma diay Juan a mamaneknek na nipaakar ed silew, pian diad panamegley to manisiay amin a katoowan.

⁸"Aliwan si Juan so silew, balet linma dian mamaneknek na nipaakar ed silew.

⁹"Onsasabi diad mundo so tuan silew tan sikatoy mangiiter na liwawa ed saray katoowan.

¹⁰Say Salita sirin walad mundo. Pinalsay Dios so mundo ed panamegley to, balet sikatoy ag amta na sankamundoan.

¹¹Linmad dilin bansa to, balet ag inawat na saray dilin totoo to.

¹²Balet inter tod amin ya angawat, saray amin ya anisiad sikato so pankanepegan a magmaliw ya anak na Dios.

¹³Nagmaliw iran anak na Dios, aliwan lapud nianak iray too, tan aliwa met a lapud linawa na laman o pakayari na too, no ag ingen lapud pakayari na Dios.

¹⁴Nagmaliw a too so Salita tan akiayam ed sikatayo. Anengneng miy kagalangan to a napnoy aro tan katwaan. Inawat to yan kagalangan ed Ama, ta sikatoy bogbogtung ya Anak.

¹⁵Nantasiy Juan na nipaakar ed sikato. Imbabando to, Sikatoy labay kon ibaga nen kuankod sikayo, Manona nen siak so maromtombuk ya onsalat ed siak, lapud wala la kasakbayan a nianak ak.

¹⁶Diad inkapno toy aro, pinalangkapan to itayon amin na ag nasabsabaan a kaabigan.

¹⁷Inter na Dios so Ganggan ed panamegley nen Moises, balet say aro tan katwaan sinmabid panamegley nen Jesu-Cristo.

¹⁸Anggapo nin balut so akanengneng ed Dios, balet sikatoy impaamta na bogbogtung ya Anak a Dios ya inararon maung na Ama.

¹⁹Saray Judio ed Jerusalem angibaki ray pigaran papari tan Levita ed kinen Juan. Tinepet dad sikato, Siopa ka?

²⁰Ag namboriy Juan; kuantod sikaran malinlinew, Aliwan siak so Cristo.

²¹Tinepet da, Siopa ka sirin? Sika si Elias? Andi, aliwan siak, ebat to. Sika may propita ya alagden mi? tinepet da lamet ed sikato. Andi, ebat tod sikara.

²²Inkuandad sikato, Ibagam sirin no siopa ka, pian walay nibaga mid saray angibakid sikami. Antoy nibagam a nipaakar ed sikan dili?

²³Inmebat si Juan, Siak imay sinalita nen propita Isaias nen kuanto, Siak so bosis a mambabandod kalawakan. Apiger yoy panakaran na Katawan!

²⁴Saray Pariseo so angibakid saramay nantepet.

²⁵Tinepet dad kinen Juan, No aliwa kan Cristo, odino si Elias, odino samay Propita, akin et mamibinyag ka?

²⁶Inmebat si Juan, Bibinyagan ta kayo ed danum, balet wadtan ed pegley yoy ag yo kabat.

²⁷Ontombuk ya onsalat ed siak, balet ag ak manepeg a mangokbar na anggan bariber na sandalya to.

²⁸Agawa ra yan amin ed Betania diad nibaliw na Jordan a pamibinyagan nen Juan.

²⁹Diad kaimbwasan, anengneng nen Juan si Jesus ya ondaragod sikato. Inkuanto, Nia so Kordiro na Dios a mangekal na kasalanay sankamundoan.

³⁰Sikato ya may labay kon ibaga nen kuanko, Manona so manomtombuk ya onsalat ed siak lapud wala la kasakbayan a nianak ak.

³¹Siak a dili, ag ko ni kabat nen saman no siopa, anggaman a wadya ak a mamibinyag ed danum a mangipakabat ed sikatod Israel.

³²Onyay impamaneknek nen Juan: Anengneng koy Ispiritun singa malapati ya ondadapon nanlapud tawen tan nanayam ed sikato.

³³Ag ko ni kabat nen saman, balet say Dios ya angibakid siak a maminyag ed danum kuantod siak, Say nanengneng mon toon dadapoay Ispiritu tan panayaman to sikatoy maminyag na totoo ed Ispiritu Santo.

³⁴Anengneng ko ya tan papaneknekan kod sikayo a sikatoy Anak na Dios.

³⁵Diad ontombuk ya agew, wadman lamet si Juan a kaiba to ray duaran disipulo to.

³⁶Nen anengneng ton manaakar si Jesus inkuanto, Niay Kordiro na Dios!

³⁷Nadngel ya na saramay duaran disipulo nen Juan tan akila rad kinen Jesus.

³⁸Nen linmingaw si Jesus, anengneng to ran ontotombuk kanyan tinepet tod sikara, Antoy anapen yo? Inmebat ira, Iner so panaayaman mo, Rabi? (Maistro so kabaliksan na Rabi.)

³⁹Mila kayo tan nengneng yo, ebat nen Jesus. Kanyan akila rad sikato tan anengneng day panaayaman to. Akiayam irad sikatod saman ya agew. Sakey ya alas kuatrod ngarem lad saman.

⁴⁰Say sakey ed saray duaran akadngel ed kinen Juan tan tinmombuk ed kinen Jesus et si Andres ya agi nen Simon Pedro.

⁴¹Arumog ton tampol si agi ton Simon, tan kuanto, Arumog miy Misias! (Cristo so kabaliksan to ya.)

⁴²Insan intagar toy Simon ed kinen Jesus. Ninengneng nen Jesus tan kuanto, Sikay Simon ya anak nen Juan, Nangaranan ka na Cefas. (Say ngaran a Cefas, kapara toy ngaran a Pedro.)

⁴³Diad ontombuk ya agew, linmay Jesus ed Galilea. Arumog toy Felipe tan kuantod sikato, Tombuk kad siak.

⁴⁴(Si Felipe taga Betsaida a baley di Andres tan Pedro.)

⁴⁵Nalmo nen Felipe si Nataniel tan kuantod sikato, Arumog miy Jesus a taga Nazaret ya anak nen Jose. Sikato may toon labay ya ibaga nen Moises ed insulat tod Ganggan, tan sikato met imay labay ya ibaga da ray propita.

⁴⁶Wala tay kamaungan a manlapud Nazaret? tepet nen Nataniel. Gala, ta nengneng mo, ebat nen Felipe.

⁴⁷Nen anengneng nen Jesus si Nataniel ya ondaragod sikato inkuanto, Niay tuan Israelita ya ag manasaol na kapara ton too.

⁴⁸Panoy pakapikabat mod siak, tepet nen Nataniel. Inmebat si Jesus, Anengneng ta kad silong na kiew ya igos, kasakbayan a tinawag ka nen Felipe.

⁴⁹Inkuanen Nataniel ed kinen Jesus, Maistro, sikay Anak na Dios! Sikay Ari na Israel!

⁵⁰Manisia ka, lapud imbagak ed sikan anengneng ta ka ed silong na igos? Makanengneng ka ni ray makapakelkelaw nen saya, inkuanen Jesus ed kinen Nataniel.

⁵¹Insan to inkuan ed sikaran amin, Ibagak ed sikayoy katwaan, nanengneng yon nalokasay tawen tan nanengneng yo ray anghil na Dios ya onsesegep tan onlalasur ed Anak na Too.