Read Pangasinan JUAN 11 Bible Online

JUAN 11 - Pangasinan bible

JUAN 11

¹"Walay taloran sanaagi a taga ra Betania. Lazaro, Maria, tan Marta so kangaranan da.

²"(Si Maria sikato ya may angikalboy pabalingit ed saray sali na Katawan tan pinonasan to ra na buek to.) Mansasakit si Lazaro,

³"kanyan nampabaki ra may agagi ton bibii ed kinen Jesus tan impaibaga ra, Katawan, mansasakit imay malet a kaarom.

⁴"Balet nen nadngelan ya nen Jesus, inkuanto, Aliwan patey so pansumpalan to yan sakit nen Lazaro. Agawa yan pakagalangay Dios, pian nitanduroy Anak na Dios.

⁵"Inaro nen Jesus ira yan sanaagin Marta, Maria, tan Lazaro.

⁶"Nen nadngelan nen Jesus a mansasakit si Lazaro, nanayam nin duay agew dimad kawalaan to.

⁷"Kayari to may duay agew, imbaga tod saray disipulo to, Ompawil itayod Judea.

⁸"Maistro, inebat na saray disipulo, agano ni may panupak dad sika lawarid man. Akin et labay mo lamet so onlad man?

⁹"Inmebat si Jesus, Ag ta labinduay oras so sanagew? Kanyan no manakar so sakey a too no agew, ag nipatakba lapud nanengneng toy liwawa na sayan mundo.

¹⁰Balet sikatoy nipatakba no labiy panakar to, lapud anggapoy liwawad sikato.

¹¹Kapangibaga nen Jesus ed saya, inarum ton inkuan, Nanaogip si kaaro tin Lazaro. Onla ak ta bangonen ko.

¹²Inmebat iray disipulo, Katawan, no nanaogip labat, onabig sirin.

¹³Say impatey nen Lazaro so labay ya ibaga nen Jesus, balet say abaloan da ray disipulo et nanaogip labat a mampapainawa.

¹⁴Kanyan malinew ya imbaga nen Jesus, Inatey si Lazaro.

¹⁵Balet lapud sikayo maliket ak ya andid man ak, pian manisia kayo. Onla tid sikato.

¹⁶Si Tomas a tatawagey Siping inkuantod saray kapara ton disipulo, Mila tayod Maistro, pian ompatey itayon kaiba to.

¹⁷Kasabi nen Jesus, akabatan ton apat agew la nen Lazaro ed lobuk.

¹⁸Sakey a taloran kilomitro labat so kaarawiy Betania ed Jerusalem.

¹⁹Dakel iray Judio a linman manligliwa ed kindi Marta tan Maria, lapud impatey nen Lazaro ya agi ra.

²⁰Nen nadngelan nen Marta ya onsasabiy Jesus, inabet to; atilak balet si Maria ed abung.

²¹Inkuanen Marta ed kinen Jesus, Katawan, no wadya ka labat, ag komun inatey so agik!

²²Balet amtak ya anggan natan, iter na Dios so antokaman a kerewen mod sikato.

²³Inkuanen Jesus ed sikato, Nabilay lamet so agim.

²⁴Inmebat si Marta, Amtak a nabilay lamet no kaonuran ya agew, diad kiolid bilay.

²⁵Inkuanen Jesus ed sikato, Siak so kiolid bilay tan say bilay. Siopamay manisiad siak anggan ompatey, nabilay;

²⁶tan siopamay mambilay tan manisiad siak, ag balut ompatey. Sisiaen mo ya?

²⁷On, Katawan! inebat nen Marta. Manisia ak a sikay Anak na Dios, say Cristo ya onsabi diad mundo.

²⁸Kapangibaga nen Marta ed saya, pinmawil ed abung. Tinawag toy agi ton Maria tan inyesaes to, Wadya lay Maistro; patatawag to ka.

²⁹Kadngel nen Maria ed saya, inmalagey a tampol tan inmabet ed kinen Jesus.

³⁰(Ag ni akasabiy Jesus ed bario, no ag ingen wadman nid pasen ya angabetan nen Marta ed sikato.)

³¹Saray Judio a wadmad abung a manliligliwad Maria et anengneng dan inmalagey a tampol tan pinmaway. Tinombuk da, ta abaloan da ya onlad lobuk tan diman manakis.

³²Akasabiy Maria ed pasen a kawalaan nen Jesus. Nen anengneng toy Jesus, dinmakmomod saliyan to, tan kuanto, Katawan, no wadya ka labat, ag komun inatey so agik!

³³Atenyeg so puso nen Jesus tan agunigon nen anengneng ton mannangnangis si Maria tan saray Judion kakaiba to.

³⁴Iner so angipomponan yod sikato? tinepet tod sikara. Inmebat irad sikato, Gala Katawan, ta nengneng mo.

³⁵Nannangis si Jesus,

³⁶kanyan inkuan na saray Judio, Agaylay panangaro tod kinen Lazaro!

³⁷Balet inkuan na saray arum, Initdan toy pakanengneng imay bulag, ag to met komun kasi apaabig si Lazaro pian ag inatey?

³⁸Maerermen lamet si Jesus tan linmad lobuk ya inyongib a walay akasaran bato.

³⁹Ipaliis yoy bato! ingganggan nen Jesus. Inmebat si Marta ya agi to may inatey, Katawan, maoges lay angub to natan, ta apat agew to lad dalem!

⁴⁰Inkuanen Jesus ed sikato, Ag ko ta imbagad sikan nanengneng moy pakayariy Dios no manisia ka?

⁴¹Impaliis da sirin imay bato. Tinmangay si Jesus tan kuanto, Misalamat ak ed sika Ama, ta dinengel mo ak.

⁴²Amtak a dedengelen mo ak lawas, balet imbagak ya lapud sarayan totood kaliber-liber ko, pian sisiaen da ya imbaki mo ak.

⁴³Kasumpal ton imbaga ya, inmingal na maksil a kuanto, Lazaro, paway ka!

⁴⁴Pinmaway imay inatey ya aputipotay abel iray lima tan sali to, tan aponggus na abel so lupa to. Inkuanen Jesus ed sikara, Okbaran yo tan paolyan yon manakar.

⁴⁵Anengneng na saramay Judion dinmalaw ed kinen Maria so ginawa nen Jesus, tan dakel ed sikara so anisiad sikato.

⁴⁶Balet pigarad sikaray linmad saray Pariseo tan imbalita ray ginawa nen Jesus.

⁴⁷Kanyan akitongtongan na saray manonan papari tan saray Pariseo ray kabyangay Sanidrin. Antoy gawaen tayo? kuanda. Dakel so milagron gagawaen to man a too.

⁴⁸No palpaolyan tayo, manisia lan amin iray totoo ed sikato tan kabekta, onla ra diay taga Roma a maneral na Timplo tan say baley tayo!

⁴⁹Inmebat so sakey ed sikara a Caifas so ngaran to tan sikatoy Pangulon Pari ed saman a taon, Anggapoy amta yon balut!

⁵⁰Ag yo ta amtan lalon maung nin ompatey so sakey a toon para saray katoowan, nen say naderal so intiron bansa?

⁵¹(Ag to ya inkuan a nanlapud nunot ton dili. Lapud sikatoy Pangulon Pari ed saman a taon, impasakbay ton ompatey si Jesus para saray Judio.

⁵²Aliwa labat a para saray Judio, no ag ingen pian pankakasakeyen to ray akaykayat ya anak na Dios.)

⁵³Nanlapud saman ya agew, implano ray pamatey dad kinen Jesus.

⁵⁴Kanyan ag la pinmarontal si Jesus ed saray Judio. Tinmaynan tan linmad baley na Efraim ya asingger ed kalawakan. Nanayam diman a kaiba to ray disipulo to.

⁵⁵Magano lan onsabiy Paskua da ray Judio tan dakel iray taga bario a linmad Jerusalem kasakbayan na Paskua, pian manlinis ira onung ed Ganggan.

⁵⁶Anapen day Jesus balet ag da narumog ed Timplo, kanyan nantetepetan ira, Antoy kuanyo? Onla dia kasi no pista o andi?

⁵⁷Ingganggan na saray manonan papari tan saray Pariseo a no walay makapikabat no iner so kawalaan nen Jesus, ibaga tod sikara pian naerel da.