Read Pangasinan JUAN 12 Bible Online

JUAN 12 - Pangasinan bible

JUAN 12

¹"Nen anem agew kasakbayan ya onsabiy pistay Paskua, linmay Jesus ed Betania a baley nen Lazaro a binilay to.

²"Imparaanan dad may pandeman to. Si Marta so nansirbi, tan si Lazaro so sakey ed saray akirongod kinen Jesus.

³"Angalay Maria na sakey botilyan nankargay sakey libran mabmablin pabalingit a puron nardo. Inkalbo tod saray sali nen Jesus, insan to ra pinonasan na buek to. Kinmayat so balingit ed intiron abung.

⁴"Inkuan na sakey ed saray disipulo to, si Judas Iscariote, a mantraidor ed sikato,

⁵"Akin et ag inlako yan pabalingit na talon lasus a dinario, insan inter ed saray mairap-bilay?

⁶"Inkuanto ya, aliwan lapud panangasi tod saray mairapbilay, no ag ingen lapud sikato et matakew. Sikatoy managegnay kuarta et angaala na natitipon.

⁷"Paolyan yon bukor! kuanen Jesus. Gagawaen to ya a pangiparaan tod pangipompon ed siak.

⁸"Kaiba yo lawas iray mairap-bilay, balet ag yo ak lawas kaiba.

⁹"Abalitaan na dakel a Judio a walad Betania si Jesus, kanyan linma rad man aliwan lapud kinen Jesus labat, no ag ingen lapud labay da met a nengnengen si Lazaro a binilay to.

¹⁰Implano na saray manonan papari a papatey da met si Lazaro,

¹¹lapud dakel la ray Judio ya onsisian ed saray pangulo ra tan ontotombuk la rad kinen Jesus.

¹²Kaimbwasan, nadngelan na dakerakel a totoon akipaskua a si Jesus et mamapaarap ed Jersalem.

¹³Kanyan angala ray sanga-sangay kiew a palma tan inabet dad paway na siudad. Ineeyag da, Hosanna! Bindisionan komuy Dios so onla dia ed ngaray Katawan! Bindisionan na Dios komun so Ari na Israel!

¹⁴Akarumog na kilaw ya asno si Jesus, tan kinabayoan to, onung na ibabagay Masanton Sulat,

¹⁵Ag ka natatakot, siudad na Sion! Nengneng mo, onsasabi lay arim, akakabayod kilaw ya asno!

¹⁶Nen inmona, ag ya atalusan na saray disipulo. Balet nen nitanduro lad kagalangan si Jesus, anunotan da a say Masanton Sulat ibabaga to yan nipaakar ed sikato, tan ginawa ra yan para sikato.

¹⁷Nantatasi ra may karaklan ya akaimaton ed kinen Jesus nen tinawag toy Lazaro ya ompaway ed lobuk tan binilay to.

¹⁸Kanyan inmabet iray dakerakel a totoo ed kinen Jesus lapud nadngelan dan sikatoy nanggawad saman na milagro.

¹⁹Inkuan sirin na saray Pariseo ed sakey tan sakey, Anggapo lay nagawaan tayo! Nengneng yo, ontotombuk la ray amin a totood sikato!

²⁰Grigo ray arum ed saramay linmad Jerusalem ya angigalang ed Dios nen Pista.

²¹Inasinggeran day Felipe a taga Betsaida, Galilea, tan kuandad sikato, Kaaro, labay min napinengnengay Jesus.

²²Imbaga nen Felipe yad kinen Andres, insan ira linman dua tan imbaga rad kinen Jesus.

²³Inmebat si Jesus ed sikara, Sinmabi lay oras a napagalangay Anak na Too.

²⁴Ibagak ed sikayoy katwaan: no ag napelag ed dalin so sakey a bokel na trigo tan ompatey, mansiansian saksakey. Balet no ompatey, mambungay dakel.

²⁵Say toon inaro toy bilay to naandid sikato, say too balet a mamosul ed bilay tod sayan mundo, mansiansiay bilay to ya anggad angga.

²⁶Siopamay manlingkur ed siak, nepeg to ak a tombuken, ta no iner so kawalaan ko diman met so kawalaan na aripen ko. Pagalangan na Amak so siopaman a manlingkur ed siak.

²⁷Nagugunigon ak natan; anto kasiy ibagak? Ikuanko kasi, Ama, ilaban mo ak ed oras na panliknak na kairapan? Andi, ta say panliknak na kairapan so inakaran ko dia.

²⁸Ama, pagalangan moy ngaran mo! Insan walay bosis a nanlapud tawen a kuanto, Pinagalangan ko la, tan pagalangan ko lamet.

²⁹Nadngel ya na saray totoon wadman tan kuanda, Kinmarul! Inkuan balet na saray arum, Akisalitay sakey ya anghil ed sikato!

³⁰Balet inkuanen Jesus ed sikara, Imparengel yan bosis lapud sikayo, aliwan lapud siak.

³¹Panaon lan nasintinsiaay sankamundoan. Nibantak la natan so manoley na sayan mundo.

³²No nibitin ak la, natanggoyur kon onsingger lad siak ya amiy totoo.

³³(Imbaga to yan pangipanengneng toy klasi na ipatey to.)

³⁴Inmebat iray totood sikato, Nadngel mid Ganggan a say Cristo mansiansiad ando lan ando. Panoy pangibagam sirin a nibitin so Anak na Too? Siopa ta yay Anak na Too?

³⁵Inmebat si Jesus, Maganggano lan nakaiba yo niy silew. Manakar kayo legan a kaiba yo niy silew, pian ag kayo naabotay bilonget. Ta ag amta na toon manaakar ed ambilonget so lalaen to.

³⁶Ambegyan kaiba yo niy silew sisia yo, pian magmaliw kayon mananombuk na silew. Kapangibaga nen Jesus ed saya, tinmaynan tan inamutan to ra.

³⁷Ag nin siansia anisia ray totoo ed kinen Jesus, anggaman ya anengneng da ray milagron ginagawa to.

³⁸Asumpal sirin so sinalita nen propita Isaias nen kuanto: Katawan, siopay anisiad saray imbaga mi? imbaga mi? Siopay angipatnagay Katawan na pakayari to?

³⁹Say sakey nin makasengeg no akin et ag ira makapanisia, say imbaga nen Isaias:

⁴⁰Binulag na Dios iray kamataan da, tan pinaawet toy kapusoan da, pian ag ira makanengneng, ni makatalus, tan ag ira ompawil ed siak pian paabigen ko ra.

⁴¹Imbaga ya nen Isaias, lapud anengneng toy kagalangan nen Jesus tan nansalitan nipaakar ed sikato.

⁴²Anggaman ontan, dakel ed saray manoley na Judio so anisiad sikato. Balet ag da ibawag lapud antakot irad saray Pariseo, ta ompan papawayen da rad sinagoga.

⁴³Ta labay da ni a pagalangan iray totoo nen say pagalangan iray Dios.

⁴⁴Inkuanen Jesus ed maksil a bosis, Say toon manisiad siak et, aliwan siak et labat so panisiaan to, no ag ingen pati say angibakid siak et.

⁴⁵Tan say toon makanengneng ed siak et nanengneng to met so angibakid siak et.

⁴⁶Linma ak dia a silew ed sankamundoan, pian siopamay manisiad siak et ag mansiansiad kabilongetan.

⁴⁷Ag ko sintinsiaay toon makadngel na saray salitak ya ag to ra lamlamang onuren. Ta linma ak dian mangilaban, aliwan manintinsiad sankamundoan.

⁴⁸Walay mangiter na sintinsia ed siopaman a mangipolisay ed siak tan ag mangawat ed saray salitak. Say salitan impulong ko so manintinsiad sikato diad kaonuran ya agew.

⁴⁹On, lapud ag ak nansalitad pakaoley kon dili. Say Ama ya angibakid siak so angiganggan no antoy nepeg kon salitaen tan ibaga.

⁵⁰Tan amtak a say ganggan to et mangiter na bilay ya andi-anggaan. Kanyan sasalitaen ko labat so papaibagay Ama.