Read Pangasinan JUAN 13 Bible Online

JUAN 13 - Pangasinan bible

JUAN 13

¹"Bispiras la na Paskua. Amta nen Jesus a sinmabi lay oras na itaynan tod sayan mundo tan ipawil tod Ama. Inaro to ray totoo ton wadyad mundo, tan inaro to ra ya anggad kasamputan.

²"Mamandem ira di Jesus tan saray disipulo to. Inseksek lan maung na Diablo ed puso nen Judas Iscariote, ya anak nen Simon, so pantraidor tod kinen Jesus.

³"Amta nen Jesus ya inter na Ama ed sikato so amin a bengatla, tan kabat to met a sikatoy nanlapud Dios tan ompawil ed Dios.

⁴"Kanyan nen mamandem ira, inmalagey si Jesus, inekal toy akakolibemben a kawes to tan angibariber na tualya ed awak to.

⁵"Angibales na danum ed palanggana, ginapoan ton orasan iray sali da ray disipulo, insan to ra pinonasan na tualyan akabariber ed awak to.

⁶"Nen asabi lay Simon Pedro inkuanto, Katawan, akin et orasan mo ray salik?

⁷"Inmebat si Jesus, Ag mo ni natan natalusan yay gagawaen ko, balet natalusan mo lamlamang naani.

⁸"Inkuanen Pedro ed sikato, Ag kon balut paorasan iray salik ed sika! Inmebat si Jesus, No ag mo ra paorasan ed siak, anggapo siriy pibibiang mod siak.

⁹"Inmebat si Simon Pedro, Katawan, aliwan saray salik labat sirin, no ag ingen pati saray limak tan say olok!

¹⁰Inkuanen Jesus, Ag la nakaukolan a manoras na laman to so siopaman a nanames la likud ed saray sali to, ta malinis lay intiron laman to. Malinis kayo la, balet aliwan amin yo.

¹¹(Kabat nen Jesus no siopay mantraidor ed sikato, kanyan inkuanto, Malinis kayo la, balet aliwan amin yo.)

¹²Kayarin inorasan nen Jesus iray sali ra, insolung to lamet imay inekal ton akakolibemben a kawes to, insan pinmawil ed yorungan to. Atalusan yoy kabaliksan na ginawak ed sikayo? tinepet tod sikara.

¹³Tatawagen yo ak na Maistro tan Katawan. Tuay kuanyo, ta ontan ak lanti.

¹⁴No siak sirin a Katawan tan Maistro yo et inorasan ko ray sali yo, nepeg met a manoorasan kayoy sali.

¹⁵Impanengneng kod sikayoy sakey ya oliran, pian aligen yo yan ginawak ed sikayo.

¹⁶Ibabagak ed sikayoy katwaan: anggapoy aripen a napalabsanan toy katawan to. Anggapo met so ibabakin napalabsanan toy angibakid sikato.

¹⁷Natan ta amta yo la ra ya, maliket kayo no gawaen yo ra.

¹⁸Aliwan para sikayon amin yan ibabagak; amtak iray pinilik. Balet nepeg a nasumpal so ibabagay Masanton Sulat, Dinepakan ak na mimikan ed siak.

¹⁹Ibabagak la yad sikayo natan kasakbayan a nagawa, pian no nagawa la, manisia kayon Siak si Siak.

²⁰Ibagak ed sikayoy katwaan: say mangawat ed siopaman ya imbakik awaten to ak met, tan say mangawat ed siak awaten to met so angibakid siak.

²¹Kasumpal ya imbaga nen Jesus ira ya, agunigon so puso to tan inkuanto, Ibabagak ed sikayoy katwaan: sakey ed sikayoy mantraidor ed siak.

²²Nannenengnengan ira may disipulo, ta ag da amta no siopay labay ton ibaga.

²³Akasaral ed pagew nen Jesus imay inararo ton disipulo.

²⁴Sininyasan nen Simon Pedro tan kuanto, Tepet mo pad sikato no siopay labay ton ibaga.

²⁵Kanyan inyansingger toy olo to may disipulo ed pagew nen Jesus tan tinepet to, Katawan, siopa tay kuanmo?

²⁶Inmebat si Jesus, No siopay pangitdan koy tinapay ya isawsaw ko, sikato. Angalay tinapay sirin, insawsaw to, insan to inter ed kinen Judas ya anak nen Simon Iscariote.

²⁷Kapangawat nen Judas na tinapay linmoob si Satanas ed sikato. Inkuanen Jesus ed sikato, Gawam lan tampol so labay mon gawaen!

²⁸(Anggapod saray karongo nen Jesus so akatalus ed imbaga tod kinen Judas.

²⁹Lapud si Judas so mambebembey kuarta, abaloan na saray arum a disipulo a pansaliwen nen Jesus na saray onkana no pista, odino ibabaki ton mangiter ed saray mairap-bilay.)

³⁰Inawat nen Judas imay tinapay tan nangganat a pinmaway. Et labi la.

³¹Kataynan nen Judas, inkuanen Jesus, Nipatnag la natay kagalangay Anak na Too, tan napagalangay Dios met natan diad panamegley to.

³²No nipatnag so kagalangay Dios ed panamegley to, say Dios met sirin ipatnag ton tampol so kagalangay Anak na Too.

³³Anak, maganggano lay piolup kod sikayo. Anapen yo ak naani, balet ibagak natan ed sikayo may imbagak lad saray Judio, Ag kayo makaonla ed laen ko.

³⁴Iter kod sikayoy sakey a balon ganggan: manaarowan kayo! Onung na impangarok ed sikayo, ontan met so panaarowan yo.

³⁵No manaarowan kayo, naamtaay amin a totoo a sikayo ray disipulok.

³⁶Iner so laen mo, Katawan? tinepet nen Pedro. Inmebat si Jesus, Ag ka makaonla natan ed laen ko, balet ontombuk ka naanid siak.

³⁷Katawan, akin et ag ta ka natombuk natan? tinepet nen Pedro. Sipaparaan ak ya ompatey makasengeg ed sika!

³⁸Inmebat si Jesus, Tua kasin sipaparaan kan ompatey makasengeg ed siak? Ibabagak ed sikay katwaan: kasakbayay ikukaok na lalung, mamitlon ibagam ya ag mo ak kabat.