Read Pangasinan JUAN 16 Bible Online

JUAN 16 - Pangasinan bible

JUAN 16

¹"Ibabagak ira yad sikayo, pian ag kayo naekalay panagmatalek ed siak.

²"Papawayen da kayod saray sinagoga. Onsabi ingey panaon a siopamay mamatey ed sikayo, ipasen ton manlilingkur ed Dios.

³"Gawaen da ra yad sikayo, ta ag da kabat so Ama odino say siak.

⁴"Ibabagak ira yad sikayo, pian no onsabi lay panaon na panggawa rad saraya, nanunotan yon pinasakbayan ta ki la. Ag ko ni imbaga ra yad sikayo nen inmona, lapud kaolup-olup ta kayo ni.

⁵"Balet natan ya ompawil ak lad angibakid siak, anggapoy anggan sakey ed sikayoy manetepet ed siak no iner so laen ko.

⁶"Natan ta imbagak ira yad sikayo, mapalaloy ermen na puso yo.

⁷"Balet nepeg yon naamtaay katwaan a pankaabigan yoy itaynan ko, ta no ag ak ontaynan, ag onsabid sikayoy Mananulong; balet na ontaynan ak, ibakik so Mananulong ed sikayo.

⁸"No onsabi paneknekan tod saray totoo ed sankamundoan so inkalingo ra nipaakar ed kasalanan, kaptekan, tan panagsintinsia.

⁹"Paneknekan toy inkalingo da ray totoo nipaakar ed kasalanan, ta ag ira anisiad siak.

¹⁰Paneknekan to met so inkalingo ran nipaakar ed kaptekan, ta onla ak ed Ama tan ag yo ak la nanengneng;

¹¹tan nipaakar ed panagsintinsia, ta asintinsiaan lay manoley ed sayan mundo.

¹²Dakel ni ray ibagak ed sikayo, balet ag yo ni ra nayarian a talusan natan.

¹³No onsabiy Ispiritu na katwaan, iwanwan to kayon mangamta ed amin a katwaan, ta ag mansalitan manlapud sikaton dili. Ingen, salitaen tod sikayoy nadngel to tan ibaga to ray bengatlan onsabi.

¹⁴Pagalangan to ak, ta alaen tod siak iray salitaen tod sikayo.

¹⁵Kien ko ray amin a kayaryan na Amak, kanyan imbagak ya alaen na Ispiritu ed siak iray salitaen tod sikayo.

¹⁶Antiktikey lan panaoy pakanengneng yod siak, balet ag mambayag nanengneng yo ak lamet.

¹⁷Nantotongtong iray pigaran disipulo. Inkuanda, Anto kasiy labay ton ibaga nen inkuanto, Antiktikey lan panaoy pakanengneng yod siak, balet ag mambayag nanengneng yo ak lamet? Tan kuanto ni, Lapud onla ak ed Ama.

¹⁸Anto kasi yay antiktikey lan panaon? Ag tayo natalusay ibabaga to!

¹⁹Amta nen Jesus a labay dan tepetan, kanyan kuantod sikara, Mantetepetan kayoy nipaakar ed imbagak, Antiktikey lan panaoy pakanengneng yod siak, balet ag mambayag nanengneng yo ak lamet.

²⁰Ibabagak ed sikayoy katwaan: mannangis tan manermen kayo, balet manliket so sankamundoan. Manermen kayo, balet magmaliw a liket so ermen yo.

²¹No mampasakit lay malokun a bii, maermen lapud asabi lay oras na panirap to. Balet no nianak lay ogaw, nalingwanan to lay kairapan to, lapud liket tod impaway ed mundo na sakey a too.

²²Ontan kayo met: maermen kayo natan, balet nanengneng ta kayo lamet, et napanoy liket so puso yo, liket ya anggapon balut so toon makaekal.

²³No onsabiy tan ya agew, ag kayo onkerew ed siak na antokaman. Ibabagak ed sikayoy katwaan: iter na Ama so antokaman a kerewen yod sikato diad ngaran ko.

²⁴Anggad natan ag kayo ni kinmerew na antokaman ed ngaran ko. Kerew kayo et makaawat kayo, pian magmaliw a nagnap so liket yo.

²⁵Imbagak ira yad sikayo diad panamegley na alimbawa. Balet onsabiy panaon ya ag ko la mansalitay onya, no ag ta ibagak lan malinlinew ed sikayoy nipaakar ed Ama.

²⁶No onsabi yan agew, onkerew kayod sikato diad ngaran ko; et ag ko ibagad sikayo ya ipikasi ta kayod Ama,

²⁷ta sikaton dili et inaro to kayo. Inaro to kayo lapud inaro yo ak, tan sinisia yon nanlapu ak ed Dios.

²⁸Nanlapu ak ed Ama tan linma ak diad mundo. Natan balet taynan ko lay mundo tan ompawil ak lad Ama.

²⁹Inkuan ed satan na saray disipulo to, Mansasalita ka lan malinew natan, aliwan diad panamegley na alimbawa.

³⁰Amta mi la natan a kabat mo ray amin a bengatla tan ag mo kakaukolay anggan siopa a manepet ed sika. Lapud saya manisia kamin nanlapu kad Dios.

³¹Inmebat si Jesus, Manisia kayo ta la natan?

³²Onsabiy oras, diad tuay tua ginmapo la, a nikaykayat kayo. Onlay balang sakey ed sikayo ed labay ton laen tan natilak ak a bukor. Anggaman ontan, siansian ag ak mambukbukor, ta kaibak so Ama.

³³Imbagak yad sikayo, pian nawalaan kayoy kareenan diad pikasakey yod siak. Manirap kayo diad mundo, balet pabiskeg yoy linawa yo! Tinalok lay sankamundoan!