Read Pangasinan JUAN 2 Bible Online

JUAN 2 - Pangasinan bible

JUAN 2

¹"Kalabas na duay agew, walay bansal ed baley na Cana ed Galilea tan wadmay ina nen Jesus.

²"Akibansal si Jesus tan saray disipulo to, ta naimbitaan met ira.

³"Kinmulang so alak kanyan imbagay ina nen Jesus ed sikato, Naoputan iray alak.

⁴"Inkuanen Jesus ed kinen ina to, Ag nepeg ya ibaga yoy gawaen ko. Ag ni sinmabiy oras ko.

⁵"Imbagay ina tod satan ed saray katulong, Onur yoy antokaman ya ibaga to.

⁶"Walay anemiran pasig diman a balang sakey et mankargay duamplo ya anggad talomplon galon. Akatarya ra yan pasig lapud kaogaliyan da ray Judio nipaakar ed panaglinis.

⁷"Si Jesus kuantod saramay katulong, Pano yoy danum ira yan pasig. Kinargaan da ra sirin ya anggad sangab.

⁸"Insan inkuantod sikara, Mangaur kayo natan tan iyakar yod inkargadod sayan bansal. Angyakar irad inkargado

⁹"tan tinawayan to may danum a nagmaliw ya alak. Ag to amta no iner so nanlapway alak, balet amta na saramay katulong ya angyakar ed sikato, kanyan impatawag toy nubio

¹⁰tan kunatod sikato, Balang sakey ipainom ton onona so maung a klasiy alak, insan no akainom lan maung iray bisita, itombuk toy makapoy a klasi. Balet, sika, inyonur moy maung a klasiy alak.

¹¹Sayan ginawa nen Jesus dimad Cana ed Galilea et onona-ona ed saray milagron ginagawa to. Diad panamegley na sayan agawa impatnag nen Jesus so kagalangan to, kanyan anisiad sikato ray disipulo to.

¹²Kasumpal to ya, linmad Capernaum si Jesus, si ina to, saray agagi to, tan saray disipulo to. Nanayam irad man a pigay agew.

¹³Asingger lay Paskua a Pista da ray Judio, tan linmay Jesus ed Jerusalem.

¹⁴Anengneng tod dalem na Timplo ray totoon manlalakoy baka, karniro, tan malapati, tan saray akayorung a mansasalat na kuarta.

¹⁵Nanggaway siplat a lobir insan to pinapapaway iray totoo, a pati saray baka tan karniro ra. Imbubuyandak toy kakuartaan da ray managsalat na kuarta tan imbabalintuag toy amin a lamisaan da.

¹⁶Kuantod saray managlakoy malapati, Ipaway yo dia ra tan! Ag yo gagawaen a tindaan so abung na Amak!

¹⁷Anunotan na saray disipulo so walad Masanton Sulat: Say panangisakit kod abung mo et singa manliub ya apoy ed pusok.

¹⁸Dinmago sirin iray Judio ed sikato tan tinepet da, Anton milagro so nipanengnemg mod sikami a mamaneknek na pankatonungan mon manggawad saraya?

¹⁹Inmebat si Jesus, Igeba yo yan Timploy Dios, insan ko ipaalagey ed loob na taloy agew.

²⁰Inkuan na saray Judio, Anto, ipaalagey mod loob na taloy agew? Nipaalagey yan Timplo ed loob na apataplo tan anem a taon!

²¹Balet say labay ya ibaga nen Jesus a Timplo et say laman to.

²²Kanyan nen inmolid bilay si Jesus, anunotan na saray disipulo to yan imbaga to. Anisia ra sirin ed Masanton Sulat tan diad saray salita nen Jesus.

²³Nen Pistay Paskua, walad Jerusalem si Jesus. Dakel so anisiad sikato diad impakanengneng day makapakelaw iran milagro a ginagawa to.

²⁴Balet ag inmatalek nen Jesus so sikaton dili ed sikara, lapud kabat ton amin iray totoo.

²⁵Ag la nakaukolan ya ipaamta na siopaman ed sikato no antoy inkatoo na anggan siopa, ta kabat to so walad puso na too.