Read Pangasinan JUAN 3 Bible Online

JUAN 3 - Pangasinan bible

JUAN 3

¹"Walay sakey a Pariseo a manngaray Nicodemo, sakey a pangulo da ray Judio.

²"Aminsan a labi, linmad kinen Jesus. Rabi, kuanto, amta mi a sakey kan bumabangat ya imbaki na Dios. Ta anggapoy toon makagawa ed saray gagawaen mo, likud no walad sikatoy Dios.

³"Inmebat si Jesus ed sikato, Ibagak ed sikay katwaan: likud a nianak lamet so sakey a too, ag to nanengneng so Panariay Dios.

⁴"Tinepet nen Nicodemo ed sikato, Panon a nianak lamet so sakey a toon matakken la? Nayarian to tay ompawil ed eges na ina to insan iyanak lamet?

⁵"Ibagak ed sikay katwaan, ebat nen Jesus, no ag nianak ed danum tan Ispiritu so sakey a too, ag makaloob ed Panariay Dios.

⁶"Say nianak ed laman, laman, tan say nianak ed Ispiritu, ispiritu.

⁷"Ag ka mankelaw lapud imbagak ed sika, Nakaukolan kayon nianak lamet.

⁸"Onsiplug so dagem ed inerman a pasen a labay to, et narengel moy siplug to, balet ag mo amta no iner so panlalapwan tan lalaen to. Ontan met so kipapasey balang sakey a nianak ed Ispiritu.

⁹"Panon yan nagawa? tepet nen Nicodemo.

¹⁰Inmebat si Jesus, Maistro kad Israel et ag mo amta ya?

¹¹Ibagak ed sikay katwaan: sasalitaen miy amta mi, tan ibabaga miy naimatonan mi, balet ag yo nin siansia awaten so pantatasi mi.

¹²No ag yo ak sisiaen ed sasalitaen kod sikayo nipaakar ed mangaraldalin a bengatla, panoy panisia yod siak sirin no salitaen ko ray nipaakar ed mangatatawen a bengatla?

¹³Anggapoy akakar ed tawen no ag say Anak na Too a linmeksab a nanlapud tawen.

¹⁴No panoy impangibitin nen Moises na samay gansan oleg ed kalawakan, ontan met a nakaukolan a nibitin so Anak na Too,

¹⁵pian nawalaan na bilay ya andi-anggaan so siopaman a manisiad sikato.

¹⁶Ta diad ontan lan panangaroy Dios ed sankamundoan inter toy bogbogtung ya Anak to, pian siopamay manisiad sikato et ag nabalang no ag ingen nawalaay bilay ya andi-anggaan.

¹⁷Ta say Dios ag to imbakiy Anak to a manusa, no ag ingen mangilaban, ed sankamundoan.

¹⁸Ag nadusa so manisiad Anak, balet asintinsiaan lan nadusa so ag manisia, lapud ag anisia ed ngaran na bogbogtung ya Anak na Dios.

¹⁹Onyay impakaawat day sintinsian dusa: sinmabiy silew ed mundo, balet say kabilongetan so inaroy totoo, aliwan say silew, lapud maoges iray gawa ra.

²⁰Siopamay maoges iray gawa to bosulen toy silew tan ag ondagod silew, ompano napatnagan so kagagawa to.

²¹Balet siopamay mambilay onung ed katwaan, onsingger ed silew tan diad ontan napatnagan a katotoluk ed Dios iray gagawaen to.

²²Kasumpal to ya, linmad luyag na Judea si Jesus tan saray disipulo to. Nanayam diman ya agano a kaiba to ra, tan nambibinyag.

²³Si Juan mambibinyag met ed Enon, ya ag arawid Salim, lapud dakel so danum diman. Dinmarago ray totood sikato tan binibinyagan to ra.

²⁴(Ag ni aprisoy Juan ed saya).

²⁵Aminsan akisangsangan iray pigaran disipulo nen Juan ed sakey a Judio, nipaakar ed panaglinis onung ed ganggan.

²⁶Kanyan linma rad kinen Juan tan kuanda, Maistro, samay toon tinasian mo tan kaibam ed biek na Jordan et mamibinyag met la tan daragoen na amin a totoo.

²⁷Inmebat si Juan, Anggapoy antokaman a naawat na too, no ag iter na Dios ed sikato.

²⁸Sikayon diliy makatasi ya imbagak, Aliwan siak so Cristo, no ag ta imbaki ak labat ya onona nen sikato.

²⁹Say nubia kayaryan na nubio. Manalalagey ya ondengel so kaaro na nubio, tan manliket na baleg no narengel to lay bosis na nubio. Ontan to met a nagnap lay liket ko.

³⁰Nepeg toy nitanduro, balet nepeg koy niabeba.

³¹Say manlapud tagey, sankatalonggaringan ed amin. Say manlapud dalin, sikatoy taga dalin tan saray mangaraldalin a bengatla so salitaen to. Say manlapu ed tawen, sankatalonggaringan ed amin.

³²Paneknekan toy amin ya anengneng tan nadngel to, balet anggapoy manisiad pamaneknek to.

³³Say mangawat ed paneknek to paneknekan ton tua so Dios.

³⁴Ta say imbakiy Dios ipulong toy salitay Dios, ta ag nasabsabaay pangiter na Dios ed sikato na Ispiritu.

³⁵Inararoy Ama so Anak tan impalima tod sikatoy amin a bengatla.

³⁶Say manisiad Anak walay bilay ton andi-anggaan, balet say ag mangonur ed Anak ag nawalaay bilaymansiansia ingey pasnuk na Dios ed sikato.