Read Pangasinan JUAN 4 Bible Online

JUAN 4 - Pangasinan bible

JUAN 4

¹"Nadngelan na saray Pariseo a si Jesus et dakel niy natatanggoyur tan nabibinyagan to nen si Juan.

²"(Balet say katwaan to ag mamibinyag si Jesus, no ag ingen saray disipulo to.)

³"Nen akabatan ya nen Jesus, tinmaynan ed Judea tan pinmawil ed Galilea.

⁴"Nakaukolan balet ya ondalan ed Samaria.

⁵"Akasabid baley na Sicar ed Samaria ya asingger ed alog ya inter nen Jacob ed anak ton si Jose.

⁶"Diay kawalaan na bobun nen Jacob. Naknaksawan si Jesus lapud impanakar to, kanyan inmirung ed abay na bobun. Ngalngali lan alas dosi ed kaagewan.

⁷"Sinmabi so sakey a Samaritanan bii ya onasul. Inkuanen Jesus ed sikato, Nayariy miinom?

⁸"(Saray disipulo nen Jesus linma ran agano ed baley a manaliw na pangogtoan da.)

⁹"Inmebat imay biin Samaritana, Akin, anta Judio ka et mimiala kad siak na inomen mo? Ag mo ta amta a Samaritana ak? (Ta saray Judio ag ira mitotongtong ed saray Samaritano.)

¹⁰Inmebat si Jesus, No amtam labat so iter na Dios tan no kabat mo no siopay mikekerew ed sika na inomen, miala kad sikato angangko et itdan to kay mabilay a danum.

¹¹Inkuanto may bii, Anggapoy anggan iyasul mo tan araldalem ni met so bobun. Pangalaan moy mabilay a danum ey?

¹²Si laki min Jacob so angiter ed sayan bobun. Dia inmiinom ira di laki min Jacob, saray anak, apo, tan ayayep da. Akin, mabiskeg ka ni nen sikara?

¹³Naapgaan lamet so siopaman ya oninom na danum to yan bobun, ebat nen Jesus,

¹⁴balet ag lan balut naapgaan so siopaman ya oninom na danum, ya iter ko. Ta say danum ya iter kod sikato magmaliw a sobul ed loob to a mangiter ed sikatoy mabilay a danum tan bilay ya andi-anggaan.

¹⁵Inkuanto may biid sikato, Itdan mo ak pa sirin itan a danum, pian ag ak lan balut naapgaan tan ag ak la ompawil dian onasul.

¹⁶Laka, kuanen Jesus ed sikato, ta itagar mo diay asawam.

¹⁷Anggapoy asawak, ebat to may bii. Inkuanen Jesus, Tuay imbagam ya anggapoy asawam.

¹⁸Ta limara lay akiamungan mo tan ag mo asawan peteg so kaamung mo natan. Imbagam ed siak so katwaan.

¹⁹Inkuanto may bii ed kinen Jesus, Nalilikas kon sakey kan propita.

²⁰Saray lalaki mi inggalang day Dios ed sayan palandey; balet sikayo ran Judio kuanyon diad Jerusalem so nepeg a pangigalangad Dios.

²¹Inkuanen Jesus ed sikato, Sisia mo ak, magano lan onsabiy panaon ya ag yo la galangen so Ama ed sayan palandey odino diad Jerusalem.

²²Sikayo ran Samaritano et ag yo amtay gagalangen yo, balet sikami ran Judio kabat mi no siopay gagalangen mi, ta saray Judio so panlalapway kilalaban.

²³Balet onsasabi lay panaon, tan ginmapo la ingen, a saray tuan manangigalang et galangen day Ama ed ispiritu tan diad katwaan. Ta sikara yay aanapey Ama a mangigalang ed sikato.

²⁴Ispiritu so Dios, kanyan saray mangigalang ed sikato nepeg dan galangen ed ispiritu tan diad katwaan.

²⁵Amtak, kuanto may bii ed sikato, ya onsabiy Misias a tatawagey Cristo. No sikatoy onsabi, ipaliwawa tod sikatayoy amin a bengatla.

²⁶Siak itan, siak a dilin mitotongtong ed sika, ebat nen Jesus.

²⁷Pinmawil ed saman a bekta ray disipulo to. Nikelawan ira nen anengneng dan mitotongtong si Jesus ed sakey a bii, balet anggapod sikaray anepet no antoy aanapen to may bii odino akin et mitotongtong si Jesus ed sikato.

²⁸Linma la may bii tan tinaynan to lay boyug to. Pinmawil ed baley, insan to imbabagad saray totoo,

²⁹Mila kid siak, ta nengneng yoy toon angibagad siak na amin a ginagawak. Sikato la kasiy Cristo?

³⁰Kanyan pinmaway irad baley, tan linma rad kinen Jesus.

³¹Legay intaynan to may bii, kekerewen na saray disipulo a mangan si Jesus. Inkuanda, Rabi, mangan ka la!

³²Balet inmebat si Jesus ed sikara, Walay kanen kon ag yo amta.

³³Kanyan nantetepetan ira may disipulo, Wala kasiy angiter na kanen to?

³⁴Inkuanen Jesus ed sikara, Say kanen ko say pangonur koy linawa na angibakid siak tan say panumpal koy kimey a pagagawa tod siak.

³⁵Ag yo ta ibabaga, Apat bulan ni insan la panagani? Imano yo ray kaalogan. Kuankod sikayo, nayari lan anien iray tanem da!

³⁶Say manaani et ag labat naopaan no ag ingen mantipon met na bunga ya onkanad bilay ya andi-anggaan, et diad ontan, manliket iran so tumatanem tan omaani.

³⁷Ta diad saya nasumpal yan salita: Sakey so mantanem, tan sananey so manani.

³⁸Imbaki ta kayon manani ed ag yo nansagputan; saray arum so nansagput, balet sikayoy mantipon ed saray nansagputan da.

³⁹Dakel a Samaritano ed saman a siudad so anisiad kinen Jesus lapud impantasi to may bii nen inkuanto, Imbaga tod siak iray amin a ginagawak.

⁴⁰Kanyan nen inasinggeran na saray Samaritano si Jesus, kinerew dad sikato a miayam nid sikara. Tinmilak nid man sirin na duay agew.

⁴¹Wala ni ray dakel ya anisiad sikato lapud salita to.

⁴²Kanyan imbaga rad samay bii, Manisia kami la natan, aliwan lapud samay imbagam, no ag lapud nadngel min dili; tan amta mi a sikaton tuay Manangilaban na sankamundoan.

⁴³Kalabas na duay agew, pinmikal si Jesus tan linmad Galilea.

⁴⁴Ta imbaga nen Jesus a dili ya ag nagalang so propita ed dilin baley to.

⁴⁵Nen kasabi tod Galilea, malikeliket iray totood man ya angawat ed sikato lapud anengneng da so ginagawa to nen akipista rad Jerusalem.

⁴⁶Linma lamet si Jesus ed baley na Cana ed Galilea, a diman imay nanggawaan toy milagro ya impagmaliw ton alak so danum. Walay sakey a panguloy baley a mansasakit so anak ton laki ed Capernaum.

⁴⁷Nen nadngelan ton linmay Jesus ed Galilea a nanlapud Judea, tinombuk to tan akikasin milay Jesus ed Capernaum, ta patambal to may anak ton ngalngali la ompatey.

⁴⁸Inkuanen Jesus ed sikato, Anggapod sikayoy manisia likud no makanengneng kayo ray tanda tan makapakelaw iran gawa.

⁴⁹Inkuanto may panguloy baley, Gala la, kasakbayan ya ompatey so anak ko.

⁵⁰Inkuanen Jesus ed sikato, Laka la; mambilay so anak mo! Anisia may too ed salita nen Jesus, tan linma la.

⁵¹Wala nid dalan nen inabet la na saray aripen to tan imbalita rad sikaton inmabig lay anak to.

⁵²Tinepet tod sikara no anton oras so inabig na anak to tan kuandad sikato, Karoman na ala onad ngarem so inekal na petang to.

⁵³Insan to anunotan a saman imay oras na impangibaga nen Jesus a say anak to et mambilay. Kanyan sikato tan say intiron pamilya to et anisia rad kinen Jesus.

⁵⁴Sikato yay kumadwan milagro a ginawa nen Jesus nen linmad Galilea a nanlapud Judea.