Read Pangasinan JUAN 6 Bible Online

JUAN 6 - Pangasinan bible

JUAN 6

¹"Kasumpal to ya, binmasil si Jesus ed biek na Dayat na Galilea (o Dayat na Tiberias).

²"Dakerakel iray totoon tinmombuk ed sikat, lapud anengneng da ray makapakelaw a ginagawa to diad impamaabig tod saray mansasakit.

³"Tinmakdang si Jesus tan saray disipulo tod nipukdol a pasen, tan diman ira inmirung.

⁴"Asingger lad saman so Pista na Paskua da ray Judio.

⁵"Tinmangway Jesus tan anengneng toy amayamay a totoo ya ondaragod sikato. Tinepet tod kinen Felipe, Iner so panaliwan tayoy ipakan tayod sarayan totoo?

⁶"(Tinepet ya nen Jesus, ta labay ton subokey Felipe, balet diad tuay tua amta la nen Jesus so gawaen to.)

⁷"Inmebat si Felipe, Anggan mambiliy duan lasus a dinarion tinapay so saliwen, siansian ag ni naapisay eges dan amin.

⁸"Sakey ed saray disipulo, si Andres ya agi nen Simon Pedro, inkuantod kinen Jesus,

⁹"Wala diay sakey ya ogaw a laki a nambaloy limaran tinapay tan duaran sira. Balet piga la ya ed sayan karakel na totoo?

¹⁰Payorung yo ray totoo, inkuanen Jesus ed sikara. (Marikarikad saman a pasen.) Inmirung ya amin iray totoo, et sakey a liman libo la ray lalaki.

¹¹Inala nen Jesus so limaran tinapay, tan nen kasumpal ton akisalamat ed Dios, imbunog tod saray totoon akayorung. Ontan met so ginawa tod saramay sira, tan namperan angan iray totoo.

¹²Nen napnapsel la ran, amin inkuanen Jesus ed saray disipulo to, Tipon yoy amin a kera, pian anggapoy nadarak.

¹³Tinipon da ra, tan labinduan tiklis so apano ra na kera-kerad saramay limaran tinapay a kinay totoo.

¹⁴Diad impakanengneng na saray totood sayan milagron ginawa nen Jesus, inkuanda, Sikato yan tua may Propita ya onsabid sankamundoan!

¹⁵Lapud alikas nen Jesus a ngalngali ran pasooten ya alaen tan gawaen dan ari, linmimut lamet tan linman nambukbukor ed nipalandey a pasen.

¹⁶Nen mansironget la, linma ray disipulo nen Jesus ed gilig na dayat.

¹⁷Linmogan irad baloto ya onlad Capernaum. Ambilonget la, et anggapo niy Jesus.

¹⁸Pinmeles so dagem tan binmaleg iray daluyon.

¹⁹Nen akapansakay iray limara o anemiran kilomitro, anengneng day Jesus a manaakar ed tapew na danum tan onaasingger ed baloto, et ataktakot ira.

²⁰Balet inkuanen Jesus ed sikara. Ag kayo natatakot; siak si Jesus!

²¹Malikeliket iran amalogan ed kinen Jesus tan sinmarsar a tampol so baloto ed pasen a laen da.

²²Kaimbwasan, anengneng na saray dakerakel a totoon atilak ed biek na dayat a saksakey so baloton wadman. Amta ran ag akilogan si Jesus ed saray disipulo to, ta sikara labat so sinmiput.

²³Wala ray baloton nanlapud Tiberias a sinmabid pasen ya asingger ed samay anganan na saray totoo na tinapay, nen kasumpal na Katawan ya akisalamat.

²⁴Nen anengneng dan andid may Jesus tan saray disipulo to, linmogan irad saray baloto tan linma rad Capernaum a mananap ed kinen Jesus.

²⁵Nen arumog day Jesus ed biek na dayat, tinepet dad sikato, Maistro, kapigay insabim dia?

²⁶Inmebat si Jesus, Ibabagak ed sikayoy katwaan: aanapen yo ak aliwan lapud anengneng yo ray makapakelkelaw a gawgaway pakayarik, no ag lapud napsel kayon angay tinapay.

²⁷Mankimey kayo, aliwan pian nawalaan kayoy kakanen a naderal, no ag ingen pian nawalaan kayoy kakanen a mansiansia ya anggad bilay ya andi-anggaan. Iter na Anak na Too yan kakanen ed sikayo, lapud sikatoy initday Dios Ama na pakayari to.

²⁸Kanyan tinepet da, Antoy nepeg min gawaen pian nasumpal mi ray pagagaway Dios?

²⁹Inmebat si Jesus, Niay pagagaway Dios ed sikayo: manisia kayod imbaki to.

³⁰Tinepet dad sikato, Anton makapakelaw a gawa so nipanengneng mod sikami, pian sisiaen mi ka? Antoy gawaen mo?

³¹Insan da intuloy ya inkuan, Angan na manna ed kalawakan iray lalaki mi, ta ibabagay Masanton Sulat, Initdan to ray tinapay a nanlapud tawen.

³²Inmebat si Jesus, Ibabagak ed sikayoy katwaan: aliwan si Moises so angiter ed sikayo na tinapay a nanlapud tawen. Say amak so mangiiter ed sikayo na tuan tinapay a nanlapud tawen.

³³Ta say tinapay ya iiter na Dios et samay linmasur a nanlapud tawen tan mangiiter na bilay ed sankamundoan.

³⁴Inkuandan tampol, Katawan, itdan mo kami lawas sirin itan a tinapay.

³⁵Inkuanen Jesus, Siak so tinapay na bilay. Ag lan balut naerasan so siopaman ya ondagod siak, tan ag lan balut naapgaan so manisiad siak.

³⁶Balet imbagak lad sikayo ya anengneng yo ak la, et ag yo ak nin siansia sisiaen.

³⁷Ondagon amin iray iter na Ama ed siak. Ag con balut ipolisay so siopaman ya ondagod siak.

³⁸Ta linma ak dian nanlapud tawen pian gawaen koy linawa na angibakid siak, aliwan say linawak a dili.

³⁹Et saya so linawa na angibakid siak: ag kon balut paolyan a nabalang iray totoon inter na Ama ed siak, no ag ingen paolien ko rad bilay diad kaonuran ya agew.

⁴⁰Ta saya so linawa na Amak: amin a makanengneng tan manisiad Anak, nawalaan na bilay ya andi-anggaan. Paolien ko rad bilay ya amin diad kaonuran ya agew.

⁴¹Ngoro-ngoro ray Judio ed sikato lapud samay imbaga ton sikatoy tinapay a nanlapud tawen.

⁴²Kanyan inkuanda, Ag ta sikato ya may Jesus ya anak nen Jose? Kabat ti ray atateng to! Panoy pangibabaga to natan a nanlapud tawen?

⁴³Inmebat si Jesus sirin ed sikara, Ag kayo ngoro-ngoro.

⁴⁴Anggapoy makaragod siak no ag iyasingger na Ama ya angibakid siak. Diad kaonuran ya agew paolien kod bilay so ondagod siak.

⁴⁵Insulat na saray propita, Tan nabangatan iran amin na Dios. Ondadagod siak so balang sakey ya onderengel tan manaaral ed Ama.

⁴⁶Ag to kabaliksan yan wala lay akanengneng ed Ama. Say nanlapud Dios labat so akanengneng lad Ama.

⁴⁷Ibabagak ed sikayoy katwaan: say manisia walay bilay ton andi-anggaan.

⁴⁸Siak so tinapay na bilay.

⁴⁹Angan na manna ed kalawakan iray lalaki yo, et siansian inaatey ira.

⁵⁰Balet ag ompatey so siopaman a mangan ed sayan tinapay a linmeksab a nanlapud tawen.

⁵¹Siak so mabilay a tinapay a linmeksab a nanlapud tawen. Mambilay ya andi-angga so siopaman a mangan ed sayan tinapay. Say tinapay ya iter kon makapangiter na bilay ed sankamundoan et say laman ko.

⁵²Lapud saya, ginmapoy ampetang a sangsangan da ray Judio. Panoy pangiter to yan too na laman to a kanen tayo? tinepet da.

⁵³Inkuanen Jesus sirin ed sikara, Ibabagak ed sikayoy katwaan: no ag yo kanen so laman tan inomen so dala na Anak na Too, ag kayo nawalaay bilay ed sikayon dili.

⁵⁴Siopamay mangan na laman ko tan oninom na dalak, walay bilay ton andi-anggaan tan paolien kod bilay diad kaonuran ya agew.

⁵⁵Ta say laman ko et petepeteg a kakanen, tan say dalak et petepeteg ya iinomen.

⁵⁶Siopamay mangan na laman ko tan oninom na dalak, manayam ed siak tan manayam ak ed sikato.

⁵⁷Say mabilay ya Ama so angibakid siak, tan mambilay ak lapud sikato. Ontan met a siopamay mangan ed siak, mambilay lapud siak.

⁵⁸Sikato ya sirin so tinapay a linmeksab a nanlapud tawen. Siopamay mangan ed sayan tinapay mambilay a magnayon. Doma yad samay inaakan ed kalawakan na saray lalaki yo, ta siansian inaatey ira.

⁵⁹Sinalita nen Jesus ira ya nen nambangat dimad sinagoga ed Capernaum.

⁶⁰Nadngel ya na saray disipulo to tan dakel iray nankuan, Mairap yan bangat! Siopa kasiy makatalus ed saya?

⁶¹Balet amta nen Jesus a ngoro-ngoro ray disipulo to nipaakar ed saya, kanyan kuantod sikara, Onsawa ki la kasid siak lapud sayan bangat?

⁶²Anto kasi no nanengneng yoy Anak na Too ya ompawil ed nanlapwan to?

⁶³Say Ispiritu so mangiiter na bilay; ag ya nagawaay too. Ispiritu tan bilay iray sinalitak ed sikayo.

⁶⁴Balet wala rad sikayoy ag manisia. (Ta gendat lan kabat nen Jesus no siopa ray ag manisiad sikato, tan no siopay mantraidor ed sikato.)

⁶⁵Intuloy nen Jesus ya inkuan, Sikato yay makasengeg no akin et imbagak ed sikayo ya anggapoy makaragod siak no ag iyasingger na Ama.

⁶⁶Lapud saya, dakel ed saray disipulo toy tinmaynan, tan ag la ra akiolup ed sikato.

⁶⁷Kanyan tinepet nen Jesus ed saray labinduan disipulo, Labay yo met so ontaynan?

⁶⁸Inmebat si Simon Pedro, Katawan, siopay laen mi ni? Walad sika ray salitan mangiiter na bilay ya andi-anggaan.

⁶⁹Manisia kami tan amta mi a sikay Masanto na Dios.

⁷⁰Inmebat si Jesus, Sikayon labindua, ag ta siak so amilid sikayo? Anggaman ontan, sakey so diablo ed sikayo.

⁷¹Si Judas ya anak nen Simon Iscariote so labay ton ibaga. Ta si Judas a sakey ed saray Labindua so mantraidor ed kinen Jesus.