Read Pangasinan JUAN 7 Bible Online

JUAN 7 - Pangasinan bible

JUAN 7

¹"Kasumpal na sarayan bengatla, niliber-liber nen Jesus so Galilea. Ag to labay so onlad Judea lapud labay a pateyen na saray Judio.

²"Magano lan onsabiy Pista na saray Abung-abung, sakey a pista da ray Judio.

³"Inkuan sirin na saray lalakin agagi nen Jesus ed sikato, Taynan ka dia tan lakad Judea, ta pian nanengneng na saray disipulom iray gagawaen mo.

⁴"Ta anggapoy toon iyamut toy kimey to no labay toy ombantug. Gagawaen mo ni lamlamang ira yan bengatla, kanyan ibawag mo lay sikan dili ed sankamundoan.

⁵"(Ta anggan saray lalakin agagi nen Jesus it ag ira manisiad sikato.)

⁶"Inkuanen Jesus ed sikara, Ag ni sinmabiy oras ko. Maung ed sikayo ta nayariy amin a panaon.

⁷"Ag kayo nayarin bosulen na sankamundoan balet bosulen to ak, lapud papaneknekan kon maoges iray gawa to.

⁸"Onla ki lan mipista. Ag ak ni onla, ta ag ni sinmabiy oras ko.

⁹"Kapangibaga tod saya tinmilak nid Galilea.

¹⁰Kasiput na saramay agagi ton onlad pista, linma met si Jesus, balet ag to impalikas ed siopaman.

¹¹Aanapen sirin na saray Judio ed pista. Tinepet da, Iner so kawalaan to?

¹²Dakel so iyeesaes na saray totoon nipaakar ed sikato. Maung a too, kuan na saray arum, balet wala ray mangibabaga, Andi, ta ibabalang to ray totoo.

¹³Balet antakot iran amin ed saray Judio, kanyan maneesaesan ira labat.

¹⁴Nen mamepegley lay pista, linmoob si Jesus ed Timplo tan nambangat.

¹⁵Mankelaw iray Judio tan kuanda, Akin et amayamay so amta to yan too, anta ag balut nanaral?

¹⁶Inmebat si Jesus ed sikara, Ag ko kien so ibabangat ko, no ag ingen kien na angibakid siak.

¹⁷Siopamay maliket a mangonur na linaway Dios, naamtaan to no kasi say ibabangat ko et manlalapud Dios odino manlalapud siak a dili.

¹⁸Say toon manlapud sikaton diliy bangat to, say kitanduro toy aanapen to. Say mananap balet na pakagalangay angibakid sikato, matwa tan matonung.

¹⁹Ag ta inter la nen Moises so Ganggan ed sikayo? Balet anggapod sikayoy mangoonur. Akin et labay yo ak a pateyen?

²⁰Inmebat iray karaklan, Inaponan kay dimonyo! Siopa tay malabay a mamatey ed sika a?

²¹Saksakey labat niy ginawak, et mankelaw ki lan amin, inebat nen Jesus.

²²Lapud ingganggan kayo nen Moises a mampasegat (aliwan si Moises so angigapod saya no ag saray lalaki yo), manesegat kayoy ogaw a laki ya anggan Agew na Panagpainawa.

²³No segaten so ogaw ed Agew na Panagpainawa pian ag nasumlang so Ganggan nen Moises, akin et mamapasnuk kayod siak lapud impamaabig koy sakey a too ed Agew na Panagpainawa?

²⁴Ag yo sisintinsiaay too lapud saray nanengneng yon gagawaen to; sintinsiaan yo onung ed kaptekan.

²⁵Kanyan pigaran totoo a taga Jerusalem so nankuan, Ag ta saya may toon labay dan pateyen?

²⁶Nengneng yo! Mansasalitad arap na karaklan et anggapo met so ibabaga ran sumlang ed sikato. Nayari kasin amtan talaga na saray manoley a sikato so Cristo?

²⁷Anggapo so makapikabat no iner so panlapwan na Cristo no sikatoy onla dia. Balet amta tayo no iner so nanlapwan to yan too.

²⁸Kanyan nen mambabangat si Jesus ed Timplo, inkuantod maksil a bosis, Tua kasin kabat yo ak tan amta yoy nanlapwan ko? Ag nanlapud siak a dili so inyakar ko dia. Balet matway angibakid siak tan ag yo kabat.

²⁹Kabkabat ko lapud nanlapu ak ed sikato tan imbaki to ak.

³⁰Inanap da sirin ya erelen, balet anggapoy aningkat ed sikato lapud ag ni sinmabiy oras to.

³¹Anggaman ontan, dakel nin siansiay anisiad sikato tan kuanda, No onsabiy Cristo, makapanggawa ni kasiy lalon dakel iran milagro nen saray ginagawa to yan too?

³²Nadngel na saray Pariseo iray karaklan a mantotongtong na saray bengatlan nipaakar ed kinen Jesus, kanyan angibaki ra tan saray manonan papari na saray guardian mangerel ed sikato.

³³Inkuanen Jesus, Nakaiba yo ak nin magano, insan ak la ompawil ed samay angibakid siak.

³⁴Anapen yo ak ed satan et ag yo ak narumog, ta ag kayo makaonla ed laen ko.

³⁵Mantotongtong iray Judio a kuanda, Iner la kasiy laen to yan too et ag tayo narumog? Onla kasin mambangat ed Grigo diad saray siudad da a kawalaan da ray Judio?

³⁶Ibabaga ton anapen tayo, balet ag tayo narumog tan ag itayo makaonla ed laen to. Anto kasiy labay ton ibagad saya?

³⁷Diad kaonuran tan manona ya agew na pista, inmalagey si Jesus tan kuantod maksil a bosis, Siopamay napgaan nepeg toy ondagod siak tan oninom.

³⁸Onung na ibabagay Masanton Sulat, Siopamay manisiad siak, onagos a manlapud puso to ray sobul na danum a mangiter na bilay.

³⁹Diad saya, say labay ya ibaga nen Jesus et say Ispiritu ya awaten na saray manisiad sikato. Ag ni niiter ed saman so Ispiritu, ta ag ni inatey tan inmolid bilay si Jesus.

⁴⁰Nen nadngel da yan salita nen Jesus, inkuan na saray arum, Talagan saya may propitan aalagden tayo!

⁴¹Saray arum balet kuanda, Sikatoy Cristo! Inkuan ni na saray pigara, Manlapu inged Galilea so Cristo?

⁴²Ag ta kuay Masanton Sulat a diad boleg nen David so panlapway Cristo tan nianak ed Betlehem, say baley a nanayaman nen David?

⁴³Kanyan lapud kinen Jesus, walay pambabalingaay totoo.

⁴⁴Labay ya erelen na arum, balet anggapoy aningkat ed sikato.

⁴⁵Pinmawil ira may guardia ed saray manonan papari tan saray Pariseo. Tinepet dad sikara, Akin et ag yo dia inyakar?

⁴⁶Inmebat ira may guardia, Anggapo niy toon nansalita a singa panagsalita to man too!

⁴⁷Pati sikayoy atilaan to met sirin? tinepet na saray Pariseo.

⁴⁸Wala tay amta yon anggan sakey a manoley odino sakey a Pariseo a manisiad sikato?

⁴⁹Balet insambay Dios yan karaklan ta ag da amtay Ganggan!

⁵⁰Kaiba rad may Nicodemo a nen aminsan et sinmingger a nanosisa ed kinen Jesus. Tinepet to,

⁵¹Ag ta isesebel na Ganggan so panintinsiad sakey a toon ag ni atepetan tan ag ni amtay gagawaen to?

⁵²Inmebat ira, Taga Galilea ka met sirin? Manaral ka pay Masanton Sulat, pian narumog mo ya anggapoy propitan manlapud Galilea.