Read Pangasinan SARAY GAWGAWA 1 Bible Online

SARAY GAWGAWA 1 - Pangasinan bible

SARAY GAWGAWA 1

¹"Pinablin Teofilo: Diad samay inmonan libro ya insulat ko, insalaysay koy amin a ginagawa tan imbabangat nen Jesus, nanlapud impangigapo toy kimey to

²"ya anggad agew na impakaitagey tod tawen. Kasakbayan na impakaitagey to, binilin tod panamegley na Ispiritu Santo iray pinili ton apostol.

³"Kasumpal na impatey to, amimpigan nampapanengneng ed sikara, kanyan apaneknekan a tuan mabilay. Diad loob na apataploy agew, nampapanengneng ed sikara tan imbabangat to ray nipaakar ed Panariay Dios.

⁴"Aminsan ed sarayan impantitipon da inkuanen Jesus, Ag ki ni ontataynan ed Jerusalem, ta alagar yo niy asalitak lad sikayon insipay Amak.

⁵"Nambinyag na saray totoo si Juan ed danum, balet ag mabayag, nabinyagan kayo ed Ispiritu Santo.

⁶"Kanyan nen aminsan a nantitipon ira, tinepet dad kinen Jesus, Katawan, ipawil mo la kasi natan ed Israel so Panarian?

⁷"Inmebat si Jesus, Saray panaon tan agew ya inggetar na Ama diad pakayari ton dili, et ag la nakaukolan ya amtaen yo ra.

⁸"Balet naitdan kayoy pakayari no onsabid sikayoy Ispiritu Santo, tan magmaliw kayon tasik ed Jerusalem, diad intiron Judea tan Samaria, tan diad amin a sokung na mundo.

⁹"Kapangibaga to ya, niatagey ed tawen leleg dan nenengnengen, insan asaniban na lorem.

¹⁰Akatangay ni rad tawen a sankanengneng day itataynan to nen kabebekta, duaran lalaki ya akakawes na ampoti so nanalagey ed abay da.

¹¹Sikayon lalaki a taga Galilea, inkuanda, akin et manalalagey kayon akatangay ed tawen? Sayan Jesus a nanlapud pegley yo tan niatagey ed tawen, et ompawil lamlamang a singa impakanengneng yod sikaton linma ed tawen.

¹²Pinmawil ed Jerusalem iray disipulo. Nanlapu rad Palandey na Kaolibaan, a ngalngali sakey kilomitroy kaarawi tod siudad na Jerusalem.

¹³Sikara ya di Pedro, Juan, Santiago, Andres, Felipe, Tomas, Bartolome, Mateo, Santiago ya anak nen Alfeo, Simon a Patriota, tan si Judas ya anak nen Santiago. Kasabi rad abung a tutuloyan da, sinmegep ira tan linmoob irad sakey a kuarto.

¹⁴Naynay iran mankakasakey a mampikasi, a kaiba da ray pigaran bibii tan si Maria ya ina nen Jesus, tan saray lalakin agagi nen Jesus.

¹⁵Kalabas na pigaran agew, nantitipon iray sakey a sanlasus tan duamplon mananisia. Inmalagey si Pedro tan inkuanto,

¹⁶Agagik, nakaukolan a nasumpal so walad Masantod Sulat ya imbaga na Ispiritu Santo, diad panamegley nen David, nipaakar ed kinen Judas ya angipangulo ed saray angerel ed kinen Jesus.

¹⁷Kabkaiba mi nen saman, ta apili met a minabang ed panaglingkur.

¹⁸(Insaliw nen Judas na dalin imay bayar na impantraidor tod kinen Jesus. Diman met lay inateyan to, ta apaktak, awabwab so eges to, tan pinmaway so pait to.

¹⁹Naamtaan ya na amin da ray manaayam ed Jerusalem, kanyan tatawagen da man a dalin ed dilin salita ra na Akeldama, a say talus to et Alog na Dala.)

²⁰Ta onyay nisulat ed libro na saray Salmo: Napaolyan komuy abung to, tan anggapo komuy manayam diman. Nisulat met, Wala komuy onsalat ed pasen tod panaglingkur.

²¹Nakaukolan, sirin, a mamili tayoy kaiba min mantasid inkiolid bilay na Katawan a Jesus. Nepeg a say pilien tayo et sakey a lakin kabkaiba mid sanlegay panaon na impipila mid Katawan a Jesus, nanlapud impaminyag nen Juan ed sikato ya anggad impakaitagey tod tawen.

²³Nampili ra sirin na duaran lalaki: si Matias tan si Jose a tatawagen day Barsabas (tatawagen da met na Justo).

²⁴Insan ira nampikasi, Katawan, kabat moy walad puso na balang sakey. Ipanengneng mo pad sikami no siopay pinilim ed sarayan dua

²⁵a magmaliw ya apostol ya onsalat ed kinen Judas a linma lad pasen a kanepegan to.

²⁶Kasumpal to ya, kinaut da no siopay napalaran, et si Matias so apili. Sikato sirin so niarum ed saramay labinsakey ya apostol.