Read Pangasinan SARAY GAWGAWA 14 Bible Online

SARAY GAWGAWA 14 - Pangasinan bible

SARAY GAWGAWA 14

¹"Ontan met so agawad Iconio: linmoob ira di Pablo tan Bernabe ed sinagoga da ray Judio. Diad ontan lan impansalita ra, amayamay iray Judio tan Hintil ya anisia.

²"Balet saray aliwan mananisian Judio sinogsogsogan da ray Hintil tan tinatanggoyur da ran mamosul ed saray agagi.

³"Abagay ira may apostol diman, tan makpel so linawa ran nampupulong na nipaakar ed Katawan. Pinaneknekan na Katawan a tuay impupulong dan nipaakar ed baleg a panangaro to, diad panamegley na impangiter tod sikaray pakayarin manggawa na saray milagro tan pakelaw.

⁴"Naapag iray totoon walad siudad: wala ray pipilaan da ray Judio, tan wala ray pipilaan da ray apostol.

⁵"Nampapaknaan na saray Hintil tan saray Judio, pati saray pangulo ra, a kabilen tan tupaken da ray apostol.

⁶"Nen naamtaan ya na saray apostol, linma rad Listra tan Derbe, saray siudad na Licaonia, tan saray kaliber-liber a pasen.

⁷"Diman da impupulong so Maung a Balita.

⁸"Diad Listra, walay sakey a lakin ag to ni asaliy inmakar, ta lopuy lan nanlapud inkianak to.

⁹"Manyodyorung ya ondedengel ed pampupulong nen Pablo. Ninengneng ton maung imay lopuy, et nen anengneng ton walay pananisia ton onabig,

¹⁰inkuantod maksil a bosis, Alagey kay maptek! Linmukso may laki tan ginapoan toy nanakar-akar.

¹¹Nen anengneng na saray ombaley so ginawa nen Pablo, ineeyag-eyag dad dilin salita ra ed Licaonia, Nagmaliw a singa too ray diriyos, tan linmeksab irad sikatayo!

¹²Tinawag day Zeus si Bernabe, tan Hermes si Pablo, lapud sikatoy managsalita.

¹³Diad kapaway ed siudad so kawalaay timplo nen dios a Zeus. Say pari to tan saray totoo angawit irad puirtay siudad na saray bakan kalakyan tan dinedeyeng a rosas, ta labay day mangibagat ed saramay duaran apostol.

¹⁴Nen naamtaan ya nen Bernabe tan Pablo, ginabyas da ray kawes da tan batik iran linmad pegley na totoo. Iningal da,

¹⁵Sikayon totoo, akin et gagawaen yo ya? Totoo kami met a kapara yo! Impupulong mid sikayoy Maung a Balita, pian nalingwanan yo la ra yan andi-kakanaan a bengatla tan ondago ki lad mabilay a Dios ya amalsay tawen, dalin, tan dayat, tan amin a logan da ra ya.

¹⁶Nen saman, pinaolyan na Dios a manggaway labalabay da iray amin a totoo.

¹⁷Balet ag tinmondan mangiter na pakabirbiran yod sikato, diad panamegley na kamaungan a gagawaen to. Iitdan to kayoy oran a manlalapud tawen tan maung a panagani ed niganan panaon to. Iitdan to kayoy nakan, tan papanoen toy likey iray puso yo.

¹⁸Anggan wala ra yan balikas da ray apostol ngalngalin ag da apatonda ray totoon mangiter na bagat ed sikara.

¹⁹Wala ray Judion sinmabid man a nanlapud Antiokia tan Iconio. Atanggoyur da ray totoo a pilaan da ra, kanyan tinutupak day Pablo, insan da inggagayugoy ed paway na baley, ta abaloan dan inatey la.

²⁰Balet nen minokut na saray mananisia, inmalagey tan linmoob ed siudad. Kaimbuas, linmad Derbe si Pablo tan si Bernabe.

²¹Impupulong di Pablo tan Bernabe so Maung a Balita ed Derbe tan amayamay so atanggoyur dan mandisipulo. Pinmawil irad Listra, Iconio, tan diad Antiokia na Pisidia.

²²Pinabiskeg day linawa na saray disipulo, tan binilin da a mansiansia ran matoor ed pananisia. Inkuanda met ed sikara, Dakel iray nepeg tin palabasen ya irirap diad iloob tayod Panariay Dios.

²³Diad balang iglisian nila ra, nampili ray mamatakken ya onsalat ed sikara a mangasikaso. Kasumpal dan mampikasi tan manayuno, ipia da rad Katawan ya anisiaan da.

²⁴Kayari ran niliber so Pisidia, linma rad Pamfilia.

²⁵Impupulong dad Perge so salitay Dios, insan ira linmeksab ed Atalia.

²⁶Binmaliw iran pinmawil ed Antiokia, say pasen ya angimatalkan ed sikara ed panangasikasoy Dios lapud panangasi to, para sayan kimey ya asumpal da lan ginawa.

²⁷Kasabi rad man, tinipon da ray kabyangay iglisia, tan tinongtong dad sikaray amin a ginagaway Dios diad panamegley da, tan no panoy impangilokas toy dalan pian makapanisia ray Hintil.

²⁸Abayag irad man a nanayam a kaiba da ray mananisia.