Read Pangasinan SARAY GAWGAWA 17 Bible Online

SARAY GAWGAWA 17 - Pangasinan bible

SARAY GAWGAWA 17

¹"Dinmalan ira di Pablo tan Silas ed Amfipolis tan Apolonia, tan sinmabi rad Tesalonica. Walad may sinagoga da ray Judio,

²"tan onung ed kaogaliyan nen Pablo, linmoob diman. Diad loob na taloy simba, kapag Agew na Panagpainawa, akipalinewan diman ed saray totoo. Inkana toy Masanton Sulat

³"diad impampaliwawa tan impampaneknek to a nepeg a manirap tan onolid bilay so Cristo. Inkuan to, Sayan Jesus ya ipupulong kod sikayo, sikatoy Cristo!

⁴"Atanggoyur iray arum ed sikara tan akila rad kindi Pablo tan Silas; ontan met iray amayamay a Grigon mangigagalang ed Dios, tan saray dakerakel a bibirbiren a bibiid man.

⁵"Balet mangimon iray Judio, kanyan tinitipon da ray luko-lukon totoo ya akar-akar ed saray kalsada, tan nanggolo rad siudad. Nilooban day abung nen Jason, tan impasoot dan anapen ira di Pablo tan Silas, ta labay da ran iparontal ed saray totoo.

⁶"Balet nen ag da ra naalmo, inggagayugoy day Jason tan pigaran agagi, insan da ra inyakar ed arap na saray manoley na siudad, tan iningal-ingal da, Aloobay siudad tayo na totoon manggogolod inerman a laen da!

⁷"Si Jason so amatuloy ed sikarad abung to. Amin da susumlangen da ray ganggan na Impirador, ta ibabaga ran walay sakey nin arin manngaray Jesus.

⁸"Agoloy amin a totood man tan saray opisyal na siudad lapud sayan imbabaga ra.

⁹"Impampiansa na saray opisyal si Jason tan saray kakaiba to, insan da ra imbolus.

¹⁰Diad labi to man, saray agagi imbaki rad Berea si Pablo tan si Silas. Kasabi ra, linma rad sinagoga da ray Judio.

¹¹Magmaung ni rad may Judion pitongtongan nen saray taga Tesalonica. Agaylay karerengel da ed ipupulong nen Pablo, tan inagew-agew dan sosokayan so Masanton Sulat, ta labay dan nengnengen no tuay ibabaga nen Pablo.

¹²Kanyan amayamay irad may Judion anisia; ontan met na saray Grigosaray lalaki tan saray gagalangen a bibii.

¹³Balet nen nadngelan na saray Judio ed Tesalonica ya impulong met nen Pablo so salitay Dios ed Berea, pinmegdat irad man tan sinosogsogan da ray karaklan a manggolo.

¹⁴Saray agagi pinaalis dan tampol si Pablo tan pinaonla rad gilig na dayat, balet atilak ira di Silas tan Timoteo.

¹⁵Akilan anggad Atenas iray lalakin angibad kinen Pablo, insan ira pinmawil ed Berea. Imbilin nen Pablo ed sikara a patombuken dan tampol ira di Silas tan Timoteo ed sikato.

¹⁶Nen aalagaren nen Pablo si Silas tan si Temoteo ed Atenas, agunigon nen naimano ton napnoy diriyos iman a siudad.

¹⁷Kanyan, diad sinagoga akisangsangan ed saray Judio tan saray Hintil a mangigagalang ed Dios, tan diad saray amin a nabanaan ton inagew-agew ed plasa.

¹⁸Akisangsangan met ed saray maistron Epicureo tan Estioco. Inkuan na pigarad sikara, Anto tay labay ton ibaga yan manmaung-maungan a too? Inkuan met na saray arum, Sakey amon managpulong nipaakar ed saray arum a diriyos. Imbaga ra ya, ta nampupulong si Pablo na nipaakar ed kinen Jesus tan say kiolid bilay.

¹⁹Kanyan inala ray Pablo, insan da inyakar ed Areopago, tan inkuanda, Labay min amtaen no anto tay balon bangat ya ibabawag mo.

²⁰Balod sikami ra tay ibabagam, kanyan labay min amtaey kabaliksan da.

²¹(Ta anggapo lay arum a gagawaen da ray taga Atenas tan saray sangkailin manaayam diman no ag say pandengel tan say pantongtong da na nipaakar ed saray balon bengatla.)

²²Inmalagey si Pablo ed arap da ray nantitipon ed Areopago tan inkuanto, Sikayon taga Atenas, nanaimanok a rilihioso kayon maung,

²³ta diad pampapasiar kod siudad yo tan pannenengneng kod saray pasen a pampipikasian yo, akanengneng ak na sakey ya altar a nisulat so onya: Para Dios ya ag Kabat. Satan ya igagalang yo, anggaman ya ag yo kabat, sikatoy ipulong kod sikayo natan.

²⁴Say Dios ya amalsay mundo tan amin a logan to, sikatoy Katawan na tawen tan dalin, kanyan ag manaayam ed saray Timplon ginaway too.

²⁵Ag to met nakaukolan so antokaman a niiter na too diad panlingkur ed sikato, ta say Dios so mangiiter ed amin na bilay, linawa, tan amin a bengatla.

²⁶Manlapud saksakey a too, pinalsa toy katoowan ed amin a bansa tan impanayam to ra diad tapew na dalin. Sikaton diliy angigana ed saray panaon tan saray ketegan na panayaman da.

²⁷Ginawa to ya pian anapen day Dios, ta ompan diad panlilikas dad sikato et narumog da. Balet say katwaan to, ag arawiy Dios ed balang sakey ed sikatayo,

²⁸ta Walad sikatoy bilay, igagalaw, tan inkatoo tayo. Onya met so labay ya ibaga na saray managanlong yo nen inkuanda, Anak to itayo met!

²⁹Lapud anak itayo met na Dios, ag tayo komun ipasen a say Dios et singa talintaon balituk, pilak, o baton ginaway lima tan kakabatan na too.

³⁰Pinaolyay Dios iray panaon na anggapoy pikakabat na saray totoo ed sikato, balet natan igaganggan to ran amin diad inerman a pasen a mampatauli la ra.

³¹Ta wala lay inggana ton agew a panintinsia tod sankamundoan. Matonung so panintinsia to, diad panamegley na sakey a toon pinili to. Pinaneknekan to yad amin a katoowan nen pinaoli tod bilay yan too.

³²Nen nadngel day Pablo ya angibagay nipaakar ed kiolid bilay, niludlurey na pigarad sikara. Balet inkuay arum, Labay mi ka lamet a dengelen nipaakar ed saya.

³³Tinaynan to la ra sirin nen Pablo.

³⁴Wala ray pigaran lalakin akiolup ed sikato tan anisiad Dios, a singa si Dionisio a sakey ed saray kabyangan na Areopago, si Damaris a sakey a bii, tan arum ni ra.