Read Pangasinan SARAY GAWGAWA 24 Bible Online

SARAY GAWGAWA 24 - Pangasinan bible

SARAY GAWGAWA 24

¹"Kalabas na limay agew, sinmabid Cesarea si Ananias a Pangulon Pari. Kaiba to ray pigaran mamatakken na baley tan say sakey ya abogadon manngaray Tertulo. Imbaga rad gobirnador iray ipapakasalanan dad kinen Pablo.

²"Impatawag day Pablo, tan kasabi to, ginapoan nen Tertulo ya akusaen. Inkuanto, Kagalgalang kon Gobirnador Felix! Lapud maung a panangiwanwan mo, abayag lay pambibilay mid kareenan. Amayamay met iray inooman mon para kaabigan na bansa tayo.

³"Bibirbiren mi yan utang na linawa mid sika tan misalsalamat kamid sika ed anggan inerman a pasen tan anggan kapigan.

⁴"Balet pian ag mi ka la naabala, kerewen mi ya ipangasim a dengelen mo pan magano so ibaga mi.

⁵"Ta nalmoan min magolo yan too. Manangigapoy golo ed amin da ray Judio ed intiron mundo, tan sikatoy panguloy sikta na saray Nazareno.

⁶"Murmuraen to ni lawariy Timplo, balet inerel mi.

⁸"No tepetan mo, naamtaan mon dili ray amin a pangaakusaan mid sikato.

⁹"Akikasakey ira may Judio ed kinen Tertulo, tan pinaneknekan dan tua ya amin so imbaga to.

¹⁰Sininyasan nen Gobirnador si Pablo a mansalita. Inkuanen Pablo, Kabat kon pigay taon ka lan huis ed sayan bansa, kanyan maliket ak a mangyagel ed laman kon dili diad arap mo.

¹¹Naamtaan mo lamlamang no osisaen mo a nanlapud insabik ed Jerusalem a mangigalang ed Dios, anggapo niy labinduan agew so linmabas.

¹²Saray Judio ag da ak anengneng ya akisangsangan ed siopaman diad dalem na Timplo, o nanggaway golo diad sinagoga o inerman a pasen diad siudad.

¹³Ag da met napaneknekan iray ipapakasalanan dad siak.

¹⁴Birbiren kod sika a mangigagalang ak ed Dios na saray lalaki mi diad panamegley na itotombuk kod Dalan, ya ipapasen dan sakey a tilatilan sikta. Balet manisia ak met ed amin a nisulat ed Ganggan tan saray libro da ray propita.

¹⁵Mailalo ak met ed Dios, a singa sikara, ya onolid bilay ya amin iray totoo, matonung man ira o andi.

¹⁶Kanyan gagawaen koy anggaay nayarian ko a malinis lawas so konsinsiak ed arap na Dios tan saray totoo.

¹⁷Pigay taon ya anggapo ak ed Jerusalem, insan ak pinmawil a mangiter na tulong ed saray kabaleyan ko, tan mangibagat ed Dios.

¹⁸Nibambana a nen gagawaen ko ya, asabian da ak ed Timplo, kasumpal kon nanlinis onung ed Ganggan. Anggapoy dakel a totoon wadman, tan anggapo met so agawan golo.

¹⁹Balet wala rad may pigaran Judio a taga Asia. Sikara komuy onla diad sikan mangakusad siak, no talagan walay nibaga ran sumpad siak.

²⁰Odino andi, ibaga komun na saray totoon wadya no antoy kasalanan a nalmo rad siak nen inmarap ak ed Sanidrin.

²¹Nayarin ibaga ran aliway ginawak nen inkuankod arap da, Lapud ilalok ya onolid bilay iray inaatey, imbistigaen yo ak natan!

²²Lapud si Felix et dakel so amta ton nipaakar ed Dalan, pinatonda to lay bista. Inkuanto, Sano onsabi lay Lisias a kapitan so panumpal koy kaso yo.

²³Kasumpal to, binilin to may opisyal a bantayan day Pablo, balet ag da eeletan a maung, tan ag da sesebelan ya ontulong ed sikato ray kakaaro to.

²⁴Kalabas na pigay agew, sinmabiy Felix a kaiba toy asawa ton Drusila a sakey a Judio. Impatawag toy Pablo tan dinengel ton nansalitay nipaakar ed pananisiad Cristo Jesus.

²⁵Balet nen ituloy nen Pablo so mampaliwaway nipaakar ed kamaungan, panagadyad dilin laman, tan say okum ya onsabi, ataktakot si Felix tan inkuanto, Alis ka ni, ta patawag ta ka no walay panaon ko.

²⁶Iilaloan to met a pasoksokan nen Pablo na kuarta, kanyan naynay ton patawag a pitongtongan.

²⁷Kalabas na duay taon, si Porcio Festo sinalatan ton Gobirnador si Felix. Lapud labay nen Felix ya alaen so maung a linawa da ray Judio, pinaolyan toy Pablo ed prisowan.