Read Pangasinan SARAY GAWGAWA 25 Bible Online

SARAY GAWGAWA 25 - Pangasinan bible

SARAY GAWGAWA 25

¹"Sinmabiy Festo ed luyag a panooleyan to. Kalabas na taloy agew, manlupad Cesarea linmad Jerusalem.

²"Imbaga ed sikatod man na saray manunan papari tan saray pangulo da ray Judio so kason sumpad kinen Pablo. Kinerew dad sikaton

³"paiyakar toy Pablo ed Jerusalem, ta walay plano ra a sabaten tan pateyen ed dalan.

⁴"Inmebat si Festo, Aprisoy Pablo ed Cesarea, et magano ak lan ompawil diman.

⁵"Pila yo lad Cesarea ira tay pangulo yo tan diman da akusaen yan too no tuan walay kasalanan to.

⁶"Nanayam niy Festo na walo o samploy agew ed Jerusalem, insan pinmawil ed Cesarea. Nen ontombuk ya agew, inmirung ed panagsintinsiaan tan ingganggan ton iparontal dad sikato si Pablo.

⁷"Kasabi nen Pablo, niliber na saray Judion nanlapud Jerusalem tan amayamay iray ambebelat ya ipapakasalanan dad sikato, balet ag da ra met lamlamang napaneknekan.

⁸"Inkuanen Pablo a pangyagel tod sikaton dili, Anggapoy ginawak a sumpad Ganggan na saray Judio, odino sumpad Timplo odino sumpad Impirador.

⁹"Labay nen Festo ya alaen so maung a linawa da ray Judio, kanyan tinepet tod kinen Pablo, Labay moy onlad Jerusalem, ta diman ta ka bistaen ed sarayan bengatla?

¹⁰Inmebat si Pablo, Wadya ak ed arap na korti na Impirador. Dia ak nepeg a bistaen. Anggapoy ginawak a kasalanan ed saray Judio tan kabkabat mo ya.

¹¹No sinumpak so ganggan o nanggawa ak na antokaman a nepeg a pakadusaan koy patey, sipaparaan ak ya ompatey. Balet no anggapoy katwaan da ray ipapakasalanan dad siak, anggapoy makapangipalimad siak ed sikara. Say Impirador so aapirengan ko.

¹²Kasumpal nen Festo ya akitongtong ed saray sumisimbawa to inkuanto, Inmapireng kad Impirador, say Impirador sirin so laen mo.

¹³Kalabas na pigay agew, sinmabid Cesarea si Ari Agripa tan si Bernice, ta pagalangan day Festo.

¹⁴Nen akapambayag la rad man, imbaga nen Festo ed ari so kipapasen nen Pablo. Inkuanto, Wala diay sakey a lakin priso ya intilak nen Felix.

¹⁵Nen wala ak ed Jerusalem, inakusad siak na saray mamatakken da ray Judio, tan kinerew dan dusaen ko.

¹⁶Inkuankod sikara ya aliwan ogali na saray mibabaley na Roma so mandusay siopaman a naakusa no ag ni akiarapan ed saray mangaakusad sikato, tan ag ni naitday pankanawnawan mangyagel ed laman ton dili.

¹⁷Kanyan nen sinmabi ra dia ag ak la nanabalay oras ko. Diad ontombuk ya agew, inmirung ak ed panagsintinsiaan tan impatawag ko.

¹⁸Nen nanaarapan ira, ag da met inakusad saray ambebelat a kasalanan ya iilaloan kon ibaga ra.

¹⁹Say nansasangsangan da say nipaakar ed rilihion dan dili tan sakey a toon manngaray Jesus. Inatey la yan too, balet si Pablo papaneknekan ton mabilay.

²⁰Ag ko amtay gawaen kon pangimbistiga ed sayan kaso, kanyan tinepet kod kinen Pablo no labay toy onlad Jerusalem tan diman so pangimbistigaan ed sikato.

²¹Balet ag to labay nen Pablo. Kinerew to ingen a paguardiaan tan labay ton say Impirador so manintinsiad sikato. Kanyan impaguardiaan ko ya anggad ag ko ni nibakid Impirador.

²²Inkuanen Agripa ed kinen Festo, Labay ko met a dengelen ya too. Dengel mo nabwas sirin, ebat nen Festo.

²³Kaimbuas, sinmabi ra di Agripa tan Bernice; amayamay iray sirimonyan pamagalang ed sikara. Linmoob irad kuarton panagsintinsiaan a kaiba da ray pangulo na saray sondalo tan saray matalonan totood suidad. Ingganggan nen Festo ya iyakar dad may Pablo.

²⁴Inkuanen Festo, Ari Agripa, tan amin yo ran wadya natan: Niay toon inakusad siak na amin a Judio, dia tan dimad Jerusalem. Iyeeyag dan ag to nepeg so mambilay yan too.

²⁵Balet anggapoy arumog kon makasengeg no akin et patey so dusa to. Kinerew ton say Impirador so manintinsiad sikato, kanyan ginetmak ibakik.

²⁶Balet anggapoy malinew ya isulat kod Impirador nipaakar ed sayan too. Kanyan iyaarap kod sikayo tan lautlad sika, Ari Agripa, pian walay nisulat ko, kasumpal tin imbistigaen.

²⁷Ta para siak ag nepeg ya ibakid Impirador so sakey a prison ag nipalinew iray ipapaksalanan dad sikato.